«Շատ վտանգավոր սցենար է, մենք լուրջ խնդիրներ կունենանք». Թևանյանը սթափության կոչ է անում
(Թարմացված է 18:44 19.02.2021)
Անդրանիկ Թևանյանի կարծիքով`ստեղծված իրավիճակում ռուս խաղաղապահները ստանձնել են ոչ միայն Արցախի, այլ նաև Սյունիքի ու Հայաստանի անվտանգության երաշխավորի պարտավորությունները։ Հայաստանի վերջի սկիզբը կամ ինչպես վերականգնել կորցրած սուբյեկտայնությունը
Նոյեմբերի 9-ից հետո պատերազմը ֆորմալ կանգնեցվել է, բայց կապիտուլյացիան շարունակվում է բոլոր հարթակներում։ Sputnik Արմենիայի հետ զրույցում նման կարծիք հայտնեց քաղաքագետ Անդրանիկ Թևանյանը` մեկնաբանելով Հայաստանում ընթացող զարգացումները։
«Դա երևում է և՛ Հայաստանի սահմանների սեղմման, և՛ Արցախի փաստացի պետականության կորստի, և՛ Հայաստանի սուբյեկտայնության վերացման տեսքով։ Գաղտնիք չէ, որ Արցախը փաստացի ռուսական պրոտեկտորատի տակ է անցել, և Արցախում ռուսները ոչ միայն խաղաղապահ ֆունկցիա են կատարում, այլ անվտանգություն են ապահովում»,- ասաց նա։
Նրա խոսքով` ռուսներին ու ռուսական իշխանություններին, ինչ խոսք, պետք է շնորհակալություն հայտնել։ Եթե ՌԴ ջանքերի շնորհիվ պատերազմը չկանգնեցվեր, հնարավոր է` Ստեփանակերտն էլ մերը չլիներ, «Հաղթելու ենք» լոզունգի ներքո տանելու էին դեպի վերջնական պարտություն և Արցախի ամբողջական հայաթափում։
Թևանյանի կարծիքով`ստեղծված իրավիճակում ռուս խաղաղապահները ստանձնել են ոչ միայն Արցախի, այլ նաև Սյունիքի ու Հայաստանի անվտանգության երաշխավորի պարտավորությունները։
«Կարելի է ասել` Հայաստանում բանակ չունենք, որովհետև Հայաստանի բանակը չի երևում, օրինակ, Սյունիքում տեղի ունեցող վտանգավոր գործընթացների ժամանակ, իսկ դա նշանակում է, որ տարածաշրջանում այս վիճակը երկար չի կարող գոյատևել»,- նշեց քաղաքագետը։
Արևմուտքն ամբողջ թափով անցել է հակառուսական գործողությունների, Դոնբասի տարածաշրջանում սպասվում է հերթական լայնամասշտաբ պատերազմը։ Արևմուտքը մեծ խաղադրույքներ է անում նաև Թուրքիայի վրա։ Եթե մենք չկարողանանք մեզ պաշտպանել և իրական դաշնակիցներ ձեռք բերել, Հայաստանը կարող է ոտնատակ արվել։
«Ես դա համարում եմ շատ վտանգավոր սցենար, եթե մենք չսթափվենք և մեր սուբյեկտայնությունը չվերականգնենք, իսկ դրա առաջին նախապայմանը իշխանափոխությունն է, բավականին լուրջ խնդիրներ կունենանք»,- հավելեց Թևանյանը։
Որքան էլ զարմանալի հնչի, բայց Հայաստանը ռուսական «գուբերնիայի» չվերածելու համար ամենաշատը շահագրգռված է պաշտոնական Մոսկվան, քանի որ Ռուսաստանը ցանկանում է իր շահերը տարածաշրջանում պահպանել արբիտրի և ոչ խնամակալի կարգավիճակով։
Հայի բախտ. Լիբանանում վիճակը վատ է, բայց մարդիկ երկրից դուրս գալ չեն կարողանում
(Թարմացված է 22:02 08.03.2021)
Բեյրութի «Ազդակ» թերթի գլխավոր խմբագիր Շահան Գանդահարյանը Sputnik Արմենիայի եթերում անդրադարձել է Լիբանանի ներքաղաքական զարգացումներին, հասարակական հուզումներին ու հայ համայնքի առջև ծառացած խնդիրներին։
Գանդահարյան. Լիբանանում անհամաձայնությունների հետևանքով ֆինանսատնտեսական ճգնաժամն ահագնանում է
Շահան Գանդահարյանի փոխանցմամբ` Լիբանանում իրավիճակը սրվել է հիմնականում ֆինանսական աննախադեպ, սուր ճգնաժամի պատճառով, ինչը հասավ բարձրակետին, որովհետև լիբանանյան դրամանիշը կտրուկ, գահավեժ անկում արձանագրեց։ Ըստ նրա`թեև ցուցարարները փակում են ճանապարհները, սակայն դրանք որոշ ժամանակ անց վերաբացվում են իրավապահ մարմինների կողմից։ Բանակը նույնպես ներգրավվել է ճանապարհների ապաշրջափակման աշխատանքներում։
«Հայ համայնքը` որպես միասնական ամբողջություն, չի մասնակցում ցույցերին, սակայն կան շատ քաղաքացիներ, որոնք դժգոհ են և ցասումով փողոց են դուրս եկել` բողոքելու քաղաքական անորոշության, անհամաձայնությունների դեմ, ինչի հետևանքով ֆինանսատնտեսական ճգնաժամն ահագնանում է»,– նշեց Բեյրութի «Ազդակ» թերթի գլխավոր խմբագիրը։
Գանդահարյանի պնդմամբ` խնդիրներն անշուշտ միայն ներլիբանանյան չեն, որովհետև Լիբանանը շարունակում է հեռակառավարվել արտաքին կենտրոնների, տարածաշրջանում ազդեցության գոտիներ ունեցող գլխավոր խաղացողների կողմից, հետևաբար ճգնաժամի հանգուցալուծումը բարդ է, կառավարության հստակ կազմի ձևավորումը նույնպես տեսանելի չէ։
©
Sputnik / Aram Nersesyan
«Տեղի հայկական կազմակերպությունների կենսագործունեությունը համավարակի պատճառով արդեն իսկ ենթարկվել էր խիստ սահմանափակումների, ու թեև երկիրը կամաց–կամաց դուրս է գալիս այդ վիճակից, սակայն մահացության ու վարակակիրների թվերը տակավին բարձր են։ Դրան ավելացան ցույցերի պատճառով մարդկանց տեղաշարժի արգելափակումները, ինչը բնականաբար բացասական ազդեց առանց այդ էլ սառեցված ընդհանուր կենսագործունեության վրա։ Սա վերաբերում է ամբողջ Լիբանանին, հետևաբար նաև հայ համայնքի հոգևոր, հասարակական, մշակութային, քաղաքական ու սոցիալական կառույցների գործունեությանը»,– նշեց «Ազդակ» թերթի գլխավոր խմբագիրը։
Գանդահարյանի տեղեկացմամբ` չնայած ֆինանսատնտեսական սուր ճգնաժամին`լիբանանահայերի շրջանում զանգվածային արտագաղթ չկա, թեև երբ ճգնաժամ է և առկա են տարաբնույթ խնդիրներ, առաջանում է երկիրը լքելու ցանկություն, նկատվում են նման միտումներ, սակայն ներկա պահին անորոշություն է, մարդկանց տեղաշարժը կապված է մեծ ֆինանսական ծախսերի հետ։
Բեյրութի պայթյունից հետո 1100 լիբանանահայ տեղափոխվել է Հայաստան մշտական բնակության
Նույնիսկ այն մարդիկ, որոնք բանկերում հաշիվներ ունեն, չեն կարողանում շարժել իրենց գումարները, կանխիկացնել կամ փոխանցումներ կատարել։
«Ազդակ» թերթի գլխավոր խմբագրի խոսքով` Լիբանանի բանկային համակարգը տնտեսության կարևոր հենասյուներից էր, ինչն այսօր չեզոքացվել է, հիմնավորապես խախտվել, և այդ ամենն ազդում է երկիրը լքելու` մարդկանց որոշումների վրա։ Այդուհանդերձ, հայրենիքի հետ կապը կա, «Լիբանանյան ավիաուղիներ» ընկերությունը շաբաթվա կտրվածքով իրականացնում է Բեյրութ–Երևան չվերթերը, սակայն մարդկանց հոսքը զանգվածային չէ։
Նշենք, որ լիբանանյան լրատվամիջոցների տեղեկատվության համաձայն` ցուցարարներն այրվող անվադողերով ու աղբամաններով արգելափակել են Բեյրութի ելքերն ու մուտքերը։ Նման իրավիճակ է ստեղծվել նաև երկրի այլ քաղաքներում։ Բացի այդ, ցուցարարները արգելափակում են տրանսպորտային ուղիները նաև Լիբանանի հարավում։ Քաղաքացիները պահանջում են միջոցներ ձեռնարկել կյանքի պայմանները բարելավելու և պարետային ժամը վերացնելու ուղղությամբ, որը հաստատվել է երկրում կորոնավիրուսի տարածման պատճառով։
«Մենք պարտավոր ենք մնալ». բեյրութահայերը չեն պատրաստվում լքել ավերակի վերածված իրենց տները
թեգերը:
Անվերահսկելի գնաճ և կորսված ռազմական պոտենցիալ. ինչ պետք է անի իշխանությունը, որ չի անում
Մարգարյան. «Գնաճը զսպելու համար պետք է ավելացնել տարբեր շերտերի օժանդակության փաթեթները»
Ատոմ Մարգարյանի դիտարկմամբ` առաջնահերթություն է նախևառաջ ոչ արդյունավետ, հատկապես կառավարման ապարատի վրա կատարվող ծախսերի սահմանափակումը, և երկրորդ` սոցիալապես խոցելի շերտերի համար անհրաժեշտ օժանդակության փաթեթների ավելացումը, հատկապես ընտանեկան նպաստներ ստացող մարդկանց տրամադրվող հատկացումների մասով, նաև սոցիալապես խոցելի մյուս շերտերի` փախստականների, Արցախից ժամանակավորապես Հայաստան տեղափոխված ընտանիքների, ինչպես նաև գործազուրկների սոցիալական օժանդակության ծրագրերի ավելացումը։
©
Sputnik / Наталья Селиверстова
«Բայց, մեծ հաշվով, դա կարճաժամկետ, իրադրային լուծում է, իսկ երկարաժամկետ լուծումն, իհարկե, նոր աշխատատեղեր բացելուն, փոքր բիզնեսը խթանելուն միտված ծրագրերին եռանդուն կերպով օժանդակելն է, այսինքն` ֆինանսական ռեսուրսների հասանելիության մեծացումը թե՛ ուղղակի` սուբսիդավորման գործիքներով, և թե՛ անուղղակի միջոցներով` հարկային արտոնություններով։ Անհրաժեշտ է մեծացնել սկսնակ և ընտանեկան բիզնեսներին աջակցող ծրագրերի քանակը»,– նշեց տնտեսագետը։
Մարգարյանի գնահատմամբ` գործող կառավարությունն իր կեցվածքի ու գործողությունների մեջ բավականաչափ իներտ է, մի տեսակ շոկի մեջ է, դեռ ուշքի չի եկել պատերազմի հարվածներից և բոլոր ուղղություններում տնտեսական քաղաքականության առումով անորոշ վիճակ է` ռիսկերը մնում են։
Հայաստանի տնտեսությունը հետճգնաժամային վերականգնման առաջին նշաններն է ցուցադրում. Փաշինյան
Տնտեսագետը կարծում է, որ հատկապես բյուջեի ծախսային հատվածում առաջնային պետք է լինի ռազմական կորսված պոտենցիալի վերականգնումը, ինչն, ըստ նրա, անհրաժեշտ է անել շատ արագ, ինչպես նաև ստեղծել ռեսուրսների լրացուցիչ աղբյուրներ։
©
Sputnik / Lilit Harutyunyan
«Այդ ամենը գործող կառավարության ուժերից վեր է, մինչդեռ կարելի է ստեղծել հավելյալ ռեսուրսներ ստվերի հաղթահարման միջոցով։ Որոշ ոլորտներում, ինչպիսին օրինակ հանքարդյունաբերությունն է, պառլամենտական վերջին հանձնաժողովի զեկույցի համաձայն` ոչ մի մետաղական հանքավայր շահույթով չի աշխատել, ինչն աբսուրդ է։ Առաջին հայացքից հենց այդտեղ է երևակվում այն աղբյուրը, որի հնարավորություններն այս կաբինետը վաղուց պետք է բացահայտեր ու դներ շրջանառության մեջ»,– նշեց տնտեսագետը։
Մարգարյանի պնդմամբ` կառավարությունը դա չի արել և ցանկություն էլ չունի անելու, ուստի անհրաժեշտ են քաղաքական արմատական փոփոխություններ, ինչից հետո միայն կարելի է սկզբունքորեն լուծված տեսնել առկա խնդիրները։
Տեղեկացնենք, որ Պետական վիճակագրական ծառայության հրապարակած տվյալների համաձայն` Հայաստանի սպառողական շուկայում 12-ամսյա գնաճը (2021 թվականի փետրվարը` 2020 թվականի փետրվարի նկատմամբ) կազմել է 5.3 տոկոս, իսկ նախորդ ամսվա նկատմամբ` 0.6 տոկոս։
Ռազմական ծախսերը պարտքո՞վ են արել. ինչու է աճում պետական պարտքն ըստ տնտեսագետի
Վերջին 10 տարիների փետրվար ամսվա սպառողական գների ինդեքսի ուսումնասիրությունը ցույց է տալիս, որ 2021 թվականի փետրվարին արձանագրված գնաճը վերջին վեց ամսվա ընթացքում ամենաբարձրն է։
թեգերը:
Կողոպտել են «Սիսական» ջոկատի հրամանատար Աշոտ Մինասյանի տունը և գողացել նրա շքանշանները
(Թարմացված է 23:17 08.03.2021)
Այդ տանը ոչ ոք հիմա չի ապրում։ Այն, որպես հայրական օջախ, վերածվել էր Աշոտ Մինասյանի` Արցախյան պատերազմում զոհված եղբոր` Աղվան Մինասյանի թանգարանի։
ԵՐԵՎԱՆ, 8 մարտի - Sputnik․ Անհայտ անձինք կողոպտել են «Սիսական» ջոկատի լեգենդար հրամանատար Աշոտ Մինասյանի հայրական տունը։ Լուրը Sputnik Արմենիայի հետ զրույցում հաստատեց նրա քրոջ դուստրը` Արմինե Սահակյանը։
Նշենք, որ Աշոտ Մինասյանի հայրական տունը գտնվում է Սիսիանի Լծեն գյուղում։
Մեր զրուցակցի խոսքով` այդ տանը ոչ ոք հիմա չի ապրում։ Այն որպես հայրական օջախ վերածվել էր Արցախյան պատերազմին մասնակցած որդիների թանգարանի։ Կողոպուտի մասին նրանց զանգել, տեղեկացրել է հարևանը։
©
Sputnik / Asatur Yesayants
«Ջարդել են ամեն ինչ և տարել են հրամանատարի` առաջին Արցախյան պատերազմի ռազմական շքանշանները: Տարել են նաև զոհված մորեղբորս` Աղվանի Մինասյանի շքանշանները ու նրա մատանին, որը պահում էինք որպես մասունք։ Աղվանի նկարները գցել են գետնին և քայլել վրայով»,–ասաց հրամանատարի ազգականը` հավելելով, որ հնարավոր է` դիտավորյալ արված քայլ է` վախեցնելու, լռեցնելու նպատակ են ունեցել։
Սահակյանը նշեց, որ տան ամեն ինչը խառնել, թափել են գետնին, տանը եղած օղիները մասամբ խմել, մասամբ բացել ու թափել են։ Սենյակներից մեկի վարագույրը մասամբ այրված է եղել, նա ենթադրում է, որ գուցե փորձել են այրել տունը։
Հիշեցնենք, որ ՀՀ ազգային անվտանգության ծառայությունը 2020-ի նոյեմբերի 14-ին ՀՀ վարչապետ Նիկոլ Փաշինյանի սպանության փորձի փաստով հարուցված քրեական գործի շրջանակներում որպես կասկածյալներ ձերբակալել էր մի շարք անձանց, այդ թվում՝ «Հայրենիք» կուսակցության ղեկավար Արթուր Վանեցյանին, ՀՀ ԱԺ նախկին պատգամավոր, ՀՀԿ խմբակցության ղեկավար Վահրամ Բաղդասարյանին, ՀՅԴ անդամ Աշոտ Ավագյանին, ինչպես նաև Սիսիանի կամավորականների ջոկատի հրամանատար Աշոտ Մինասյանին։
Բոլոր 4 կասկածյալներին մեղադրանք է առաջադրվել Քրեական օրենսգրքի 35-300-րդ հոդվածի 1-ին մասի (իշխանության յուրացման), 35-305-րդ հոդվածի (պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման) և 235-րդ հոդվածի (ապօրինի զենք զինամթերք պահելու) կասկածանքով։
թեգերը: