Հնարավո՞ր է արդյոք այս իրողությունների դեպքում կիրառել հակակոռուպցիոն ռազմավարություն
(Թարմացված է 17:38 03.01.2021)
ՀՀ արդարադատության նախկին փոխնախարար Տիգրան Խաչիկյանը Sputnik Արմենիայի եթերում անդրադարձել է այն հարցին, թե ինչպիսին էր 2020 թվականը կոռուպցիայի դեմ պայքարի առումով։ Խաչիկյան. «Անհնար է հակակոռուպցիոն ռազմավարությունն արդյունավետորեն կիրառել այս քաղաքական իրողությունների դեպքում»
ՀՀ արդարադատության նախկին փոխնախարար Տիգրան Խաչիկյանի դիտարկմամբ` չգրանցվեցին այն արդյունքները, որոնք ակնկալվում էին ի սկզբանե իշխանափոխությունից հետո և կառավարության տված խոստումները 2020 թվականի կտրվածքով` նույնպես չիրականացան։ Ըստ նրա` հակակոռուպցիոն ռազմավարությամբ սահմանված են բազմաթիվ միջոցառումներ, սակայն դրանցից քչերն են կյանքի կոչվել ըստ ժամկետների և դրանցում դրված նպատակներին համահունչ, իսկ «Հակակոռուպցիոն կոմիտեի մասին» օրենքի նախագիծը հայտնի չէ, թե որ փուլում է, մինչդեռ նախատեսվածի համաձայն` պետք է գործարկվի այս տարվանից։
©
Photo : press office of the Parliament of RA
«Նույնը վերաբերում է ապօրինի գույքի բռնագանձման ընթացակարգերին։ Թեև օրենքն ընդունել ենք, բայց մինչև այս պահը հասկանալի չէ, թե ինչ ուսումնասիրություններ են իրականացվել, այնինչ անցել է չորս ամիս, և օրենքն արդեն կարող էր կիրառվել ամբողջ ծավալով։ Կան նաև գործեր, որոնք չեն էլ ենթադրում ուսումնասիրության երկար ժամկետներ, բայցևայնպես, անհասկանալի է, թե ինչ փուլում են գտնվում, առավել ևս, երբ տարեկան հաղորդումներ ու հաշվետվություններ պետք է ներկայացվեն, թե ընթացիկ ժամանակաշրջանում առհասարակ ինչ է կատարվել այդ ուղղությամբ»,– նշեց ՀՀ արդարադատության նախկին փոխնախարարը։
Անդրադառնալով այն հարցին, որ մինչ օրս կոռուպցիայի հատկանիշներով որևէ անձ դատապարտված չէ, Խաչիկյանն ընդգծեց, որ խնդրի հետ կապված` կան մի քանի ելակետեր, որոնցից մեկն, օրինակ, մինչ այդ բարձրաձայնված քաղաքական կամքի ցածր մակարդակն է, թեև ի սկզբանե խոսում էին անհրաժեշտ կամքի դրսևորման մասին, սակայն 2,5 տարի անց, ըստ նրա, ունենք տրամագծորեն հակառակ պատկեր, նույնիսկ առկա է խճողված ու խեղաթյուրված քաղաքական մթնոլորտ։
Նոր գործիքակազմն ընդդեմ կոռուպցիայի. ի՞նչ անել, որ այն առավել արդյունավետ «աշխատի»
«Միանշանակ, անհնար է հակակոռուպցիոն ռազմավարությունն արդյունավետորեն կիրառել առկա քաղաքական իրողությունների պարագայում, նույնիսկ տրամադրություն չկա խոսելու հակակոռուպցիոն պայքարի գործիքակազմի մասին, քանզի կորցրել ենք հայրենիք, կորցրել ենք ազգային ոգին ու մեր զարթոնքը, հետևաբար, նման պայմաններում ռազմավարական միջոցառումների մասին խոսելն ավելորդ է»,– նշեց ՀՀ արդարադատության նախկին փոխնախարարը։
Խաչիկյանի գնահատմամբ` այժմ ունենք ակնհայտ նոր քաղաքական իրողություններ, որոնց պայմաններում հակակոռուպցիոն պայքարի բոլոր գործիքակազմերը դառնում են սկզբունքորեն անիմաստ, դրանք մնում են սոսկ մշակված շատ լավ և որակյալ փաստաթղթեր, սակայն դրանց իրացման մակարդակը երկրում ցածր է։
Կոռուպցիան նվազել է, բայց համակարգում խնդիրները լուծող չկա․ տնտեսագետը՝ ներդրումների մասին
Համավարակի տեսքով ֆորսմաժորային վիճակը կարող է խառնել բոլորի խաղաքարտերը. Մադոյան
(Թարմացված է 23:38 18.01.2021)
«Օրբելի» հետազոտական կենտրոնի վերլուծաբան Գոռ Մադոյանը Sputnik Արմենիայի եթերում անդրադարձել է Հայաստանում գարնանն արտահերթ խորհրդարանական ընտրություններ անցկացնելու հեռանկարին, ինչպես նաև «Իմ քայլի» պատգամավորների վարքագծին, որոնք լքում են խմբակցությունը։
Մադոյան. «Արտահերթ ընտրությունների կոնկրետ ժամկետների մասին խոսելն այս պահին ճիշտ չէ»
Գոռ Մադոյանի դիտարկմամբ` եթե երկրում կորոնավիրուսի պատճառով սահմանափակումները խստացվեն կամ համաճարակի նոր ալիք սկսվի, ընտրություններ չեն կարող անցկացվել։ Ըստ նրա` ներկա պահին արտահերթ ընտրություններն անհրաժեշտ են և պետք է անցկացվեն հնարավորինս շուտ, քանի որ երկիրը քաղաքական առումով վերբեռնման կարիք ունի, սակայն առկա է ֆորսմաժորային իրավիճակ համավարակի տեսքով, ինչը կարող է խառնել բոլորի քաղաքական խաղաքարտերը։
«Այդ առումով խոսել արտահերթ ընտրությունների կոնկրետ ժամկետների մասին ճիշտ չէ։ Շատ ավելի տրամաբանական է, որ եթե ամեն ինչ գնա այս տեմպերով, այսիքն` համաճարակային վիճակը թուլանա և քաղաքական ուժերը, գոնե դրանց մեծամասնությունը այս կամ այն կերպ գան կոնսենսուսի, նույնիսկ լռելյայն կոնսենսուսի` առանց հայտարարությունների, գուցե այդ դեպքում լինեն ընտրություններ, բայց կոնկրետ ժամկետների առումով կան բազմաթիվ հարցականներ, որոնք պայմանավորված են տարբեր հանգամանքներով և հնարավոր չէ դրանք բոլորը հաշվարկել»,– նշեց վերլուծաբանը։
Անդրադառնալով «իմքայլական» պատգամավորների խմբակցությունից դուրս գալու խնդրին` Մադոյանն ընդգծեց, որ «Իմ քայլը» դաշինքն ԱԺ–ում մեծամասնություն է, ձևավորվել է հեղափոխության արդյունքում և ընդհանուր էյֆորիայի տակ այնտեղ բավականին տարասեռ պատգամավորներ են հայտնվել, որոնք կուսակցական կուռ համակարգ չեն տեսել։ Ուստի շատ բնական է, որ երբ նվազել է հանրային լեգիտիմությունը պատերազմից հետո, նրանք պետք է դուրս գային խմբակցությունից և ներկայանային որպես անկախ պատգամավորներ։
Վերլուծաբանի կարծիքով` անկախ պատգամավորների ինստիտուտը խնդրահարույց է։ Ըստ նրա` եթե պատգամավորները կուսակցություններ չեն ձևավորելու և եթե խոսվում է ամբողջովին համամասնական ընտրակարգի անցնելու մասին, հետևաբար անկախ պատգամավորների պարագայում ռեյտինգայինի գաղափարն, ըստ էության, այլևս չի գործի։
Մադոյանի խոսքով` նրանց, ովքեր 2018 թվականին ընդունում էին պատգամավորական մանդատն ու նշում, որ ծառայում են մեկ գաղափարի և կիսում են նույն քաղաքական ծրագիրը, իհարկե ոչ ոք չէր խոստացել, որ քաղաքական պատասխանատվությունը միշտ պետք է լինի քաղցր ու ցանկալի։ Նրանք կիսում էին միայն լավը, իսկ վատի դեպքում հեռացան պատասխանատվությունից։
Ինչի՞ համար էր վարչապետը հանդիպել ԱԺ «Իմ քայլը» խմբակցության հետ․ Մակունցը մանրամասնում է
ՌԴ–ն փորձում է հստակություն մտցնել ՀՀ իշխանության փոխարեն. Լավրովի հայտարարության հետքերով
ՌԴ-ն փորձում է հստակություն մտցնել ՀՀ իշխանության փոխարեն. Լարիսա Ալավերդյանը` Լավրովի հայտարարության մասին
Ադրբեջանում գտնվող հայ գերիների մասին Լավրովի հայտարարությունը հայ հասարակությանն իրազեկելու փորձ է։ Sputnik Արմենիայի հետ զրույցում նման կարծիք հայտնեց Հայաստանի առաջին օմբուդսման, «Ընդդեմ իրավական կամայականության» ՀԿ նախագահ Լարիսա Ալավերդյանը։
«Հայաստանի պատկան մարմինների անգործության կամ ամբողջական տեղեկություն չտրամադրելու հետևանքով առաջ են գալիս տարբեր ասեկոսեներ և տարակարծություններ, քանի որ նրանք չեն տրամադրում ամբողջական և կոնկրետ տեղեկություններ»,- ասաց նա։
Ալավերդյանի խոսքով` ՌԴ արտգործնախարարը որոշել է պարզություն մտցնել այդ հարցում`Հայաստանի իշխանությունների փոխարեն։
©
Sputnik / Asatur Yesayants
Գաղտնիք չէ, որ բոլոր ծնողները չէ, որ իրազեկված են` իրենց զավակները գերեվարված են, թե ոչ, ողջ են, թե մահացած. իշխանությունը վախենում է նրանց ամբողջական թիվը հրապարակել։
«Դա կարող է լինել մի պատկառելի թիվ և հնարավոր է` շատ ավելի մեծ բողոքի ալիք բարձրացնի հասարակության կողմից. Կարծում եմ` իրենք տալիս են մաս-մաս այդ տեղեկությունը, և դա քաղաքականություն է, որը ես համարում եմ անտեղի»,- նշեց նա։
Ալավերդյանի կարծիքով` Ադրբեջանում գտնվող բոլոր գերիները պետք է վերադարձվեն բանակցային ճանապարհով, որից հետո միայն դրանց կտրվի իրավական գնահատական։
Ռուսաստանն ուզում է լուծել գերիների հարցը․ Լավրովը մանրամասներ է հայտնել
Հիշեցնենք` 2020 թվականի ամփոփիչ ասուլիսում Ռուսաստանի արտաքին գործերի նախարար Սերգեյ Լավրովն այսօր` հունվարի 18–ին, անդրադարձավ նաև հայ գերիների խնդրին և նշեց, որ հայակական կողմից ներկայացված ցուցակներն ամբողջական չեն և այժմ կողմերն աշխատում են դրանց ճշգրտման ուղղությամբ։
Լավրովն «էկզոտիկ» է համարել Ղարաբաղը Ռուսաստանի կազմ մտցնելու առաջարկը
Պարենային ինքնաբավության խնդիրն Արցախում դժվար թե լուծվի առկա հողատարածքներով. Ավետիսյան
(Թարմացված է 23:51 18.01.2021)
«Ամբերդ» հետազոտական կենտրոնի ավագ փորձագետ, տնտեսագիտության դոկտոր, պրոֆեսոր Սամվել Ավետիսյանը Sputnik Արմենիայի հետ զրույցի ընթացքում խոսել է պարենային անվտանգության խնդիրների մասին, որոնք ավելի ցցուն են դարձել արցախյան պատերազմից հետո։ Սամվել Ավետիսյանի դիտարկմամբ` պարենային անվտանգությունը դարձել է ամենակարևոր հիմնախնդիրներից մեկը, և Հայաստանին պատուհասած երկու արհավիրքները` համավարակն ու պատերազմն էական ազդեցություն են թողել պարենային անվտանգության վրա։
«Սկզբում կորոնավիրուսը խաթարեց հասարակական կյանքի ռիթմը, իսկ հետո արցախյան պատերազմն իր հետ բերեց զգալի կորուստներ, մասնավորապես Արցախի գյուղնախարարի վկայությամբ` հողատարածքների 75 տոկոսն անցավ թշնամուն։ Եթե հաշվի առնենք, որ Արցախում գյուղատնտեսական նշանակության հողատարածքների 90 տոկոսը դրված էր հացահատիկի ու հատիկաընդեղենային մշակաբույսերի տակ, ապա պարզ է դառնում, թե որն է կորուստի առյուծի բաժինը»,– նշեց տնտեսագետը։
Ավետիսյանը ևս մեկ անգամ հիշեցրեց, որ մեր պարենային պաշարները համալրվում էին նաև Արցախից եկած ցորենով, քանզի տարեկան ներկրվում էր 30 հազար տոննա ցորեն, 18 հազար տոննա գարի, և հիմա քիչ է ասել, որ պաշարներն այլևս չեն գա, որովհետև, Ավետիսյանի կանխատեսմամբ, կստեղծվի մի իրավիճակ, երբ ստիպված կլինենք արդեն մեր բաժնից մաս հանել Արցախի համար։
Մասնագետի համոզմամբ`պարենային ինքնաբավության խնդիրն Արցախում դժվար թե լուծվի պատերազմից հետո մնացած հողատարածքներով։ Նա անդրադարձավ Հայաստանի և Արցախի պարենային հաշվեկշռի կազմման մեթոդաբանությանը, ինչպես նաև պարենային ինքնաբավությանը միտված պետական քաղաքականությանը` խոսելով գործարարների հետ կնքվելիք ֆյուչերսային, այսինքն` ապագային միտված պայմանագրերի անհրաժեշտության մասին։
թեգերը:
թեմա: