Շտապօգնության կանչերից և ոչ մեկն անարձագանք չի մնում: Sputnik Արմենիայի հետ զրույցում հայտնեց «Շտապօգնություն» ՓԲԸ–ի տնօրեն Թագուհի Ստեփանյանը՝ հերքելով մամուլում տարածված այն տեղեկությունները, թե շտապօգնության աշխատակիցները կա՛մ հրաժարվում են կանչ ընդունել, կա՛մ շատ ուշ են տեղ հասնում:
Կորոնավիրուս, սիրտ-անոթային խնդիրներ, սուր-շնչառական հիվանդություններ ու վնասվածքներ: Սրանք այն հիմնական խնդիրներն են, որոնց համար մարդիկ դիմում են շտապօգնության աշխատակիցներին՝ անհետաձգելի բուժօգնություն ստանալու ակնկալիքով: Ընկերության տնօրենը հավաստիացնում է՝ փորձում են բոլորին հասնել, բայց այն օրերին, երբ կանչերի թիվը նախատեսվածից շատ է լինում, ստիպված են առաջնահերթությունը տալ առավել հրատապություն ունեցող դեպքերին:
«Օրական միջինում 900-1000 կանչ ենք սպասարկում, եղած ռեսուրսներն էլ բավարար են։ Ինչ վերաբերում է արձագանքին, ապա այդ մասին միշտ խոսվել է և միշտ ասվել, որ շտապօգնությունը պետք է կատարի անհետաձգելի կանչերը, իսկ մնացած դեպքերում մարդիկ պետք է դիմեն իրենց ընտանեկան բժիշկներին»,- ասաց նա:
Ստեփանյանի խոսքով՝ թեպետ սեփական աշխատակիցներին խրախուսելու ցանկությունը մեծ է, սակայն ֆինանսական միջոցներ չկան. ոչ վերջին եռամսյակում, ոչ էլ դեկտեմբերին շտապօգնության աշխատակիցներից որևէ մեկը պարգևավճար չի ստացել և չի ստանալու:
Շտապօգնությունն աշխատում է ուժերի գերլարմամբ․ քաղաքացիներին խնդրում են ըմբռնումով մոտենալ
«Ընդհանարապես ոչ մի տարի չի եղել պարգևավճար մեր աշխատակիցների համար, մեր աշխատակիցները պարգևատրվել են միայն ապրիլ, մայիս, հունիս ամիսներին՝ կորոնավիրուսի դեմ պայքարի ժամանակ, դրանից հետո այլևս պարգևավճարներ չեն եղել»,- ընդգծեց նա:
Նշենք, որ մամուլում լուրեր են շրջանառվում («Ժողովուրդ» օրաթերթ), թե քաղաքացիներն ահազանգում են շտապօգնության ծառայության վատ աշխատանքի մասին: Նրանք դժգոհում են, որ հաճախ շտապօգնության աշխատակիցներն ուշանում են կամ, առհասարակ, հրաժարվում են կանչ ընդունել, ընդ որում, ամենևին կապ չունի՝ զանգը պայմանավորված է կորոնավիրուսով, թե ոչ:
