Վիգեն Հակոբյան

Չեմ կարծում, որ այս պահին իշխանության գալն ինչ–որ մեկի համար գայթակղիչ է. քաղտեխնոլոգ

63
(Թարմացված է 11:45 18.11.2020)
Քաղտեխնոլոգ Վիգեն Հակոբյանը Sputnik Արմենիայի եթերում անդրադարձել է ՀՀ նախագահ Արմեն Սարգսյանի ուղերձին։ 
Հակոբյան. «Չեմ կարծում, որ հենց այս պահին իշխանության գալն ինչ–որ մեկի համար գայթակղիչ է»

ՀՀ նախագահ Արմեն Սարգսյանը երկրում ստեղծված իրավիճակով պայմանավորված` նոյեմբերի 16-ին ուղերձ է հղել, որում մասնավորապես մատնանշել է վարչապետի պաշտոնավարման դադարեցման և արտահերթ խորհրդարանական ընտրություններ անցկացնելու անհրաժեշտությունը։

Վիգեն Հակոբյանի դիտարկմամբ` այդ ուղերձն ընդհանուր առմամբ հնչեց քաղաքական ուժերի, հանրային գործիչների հետ նախագահի հանդիպումներից հետո, որոնց վրա հիմնվելով` Արմեն Սարգսյանը ներկայացրեց ձևավորված հանրային պահանջը։ 

«Նախագահը փաստեց, որ այդ պահանջը Նիկոլ Փաշինյանի հրաժարականն է, այնուհետև ազգային համաձայնության պրոֆեսիոնալ և բանիմաց կառավարության ձևավորումը, իսկ հետո, երբ երկրում կայունանա իրավիճակը` նաև արտահերթ ընտրությունների անցկացումը։ Նախագահի ուղերձը ժամանակին էր, եթե չասեմ, նույնիսկ մի փոքր ուշացած, բայց ամեն դեպքում պետք է հաշվի առնել, որ անցնելու էր որոշ ժամանակ, քանզի աշխատանք էր կատիարվել»,– նշում է քաղտեխնոլոգը։

Փաշինյանի հրաժարականի կոչեր, արցունք ու ցավ. փոթորկված Երևանը նոյեմբերի 11-ին

Վիգեն Հակոբյանը ելնելով իրավիճակից կարծում է, որ վարչապետի հրաժարականի հանրային պահանջը բարձրացվեց երկրի գլուխ համարվող պաշտոնատար անձի մակարդակի, և, ըստ էության, առաջարկ արվեց ներկայիս լարված իրավիճակն ինչ–որ կերպ լիցքաթափել։

«Ազգային համաձայնության կառավարության ձևավորումը պայմանավորվածությունների խնդիր է, այսինքն` պետք է նույնպես տեղի ունենա բանակցությունների արդյունքում։ Դա մեկ մարդու որոշելու խնդիր չէ։ Այսօրվա քաղաքական մեծամասնությունը, որը պատասխանատու է պարտության համար, քաղաքական, բարոյական, պարզապես մարդկային տեսանկյունից իրավունք չունի հետայսու իշխանավարել, ուստի պետք է քաղաքական որոշում ընդունի և փոխի վարչապետին, ընդ որում` պարտադիր չէ, որ նոր վարչապետը լինի հենց «Իմ քայլը» խմբակցությունից»,– նշում է քաղտեխնոլոգը։ 

Իսկ թե ով պետք է լինի նոր վարչապետը, դա, ըստ Հակոբյանի, բանակցելու թեմա է։ Նա չի կարծում, որ հենց այս պահին իշխանության գալը  գայթակղիչ է, որովհետև կարելի է պատկերացնել, թե դա ինչ բարդ խնդիր է, ինչպիսի ծանր պատասխանատվություն։

Քաղտեխնոլոգը վստահ չէ, որ ժամանակավոր կառավարության գործունեության շրջանում կլինի մեկ կառավարություն, որովհետև լինելու է բավականին ծանր ժամանակահատված` սկսած բարոյահոգեբանական գործոնից, վերջացրած բանակը մարտունակ վիճակի բերելով, իսկ սոցիալ–տնտեսական խնդիրները Հայաստանում արդեն երեսուն տարուց ի վեր կրում են խրոնիկ բնույթ։ Այդ պատճառով էլ լուրջ քաղաքական գործիչների մոտ, ըստ Հակոբյանի, ցանկություն չի առաջանա հենց այս պահին ստանձնել այդ չափազանց պատասխանատու պաշտոնը։ 

63
թեգերը:
Հրաժարական, Իշխանություն, Վիգեն Հակոբյան
Ըստ թեմայի
Նիկոլ Փաշինյանը բացատրեց, թե ինչու հրաժարական չի տվել հայտարարությունը չստորագրելու համար
Արցախի նախագահը հանդիպել է պատգամավորների հետ. նրանց մի մասը հրաժարական է պահանջում
Խաղաղ գործընթացի որևէ փուլում չի եղել Շուշիից հրաժարվելու հարց. ԱԳՆ
Արտակ Զաքարյան

Որտեղ փնտրել հայ գերիների վերադարձի բանալին. Զաքարյանը՝ ՌԴ նախագահին ուղղված նամակի մասին

44
(Թարմացված է 17:25 01.12.2020)
ՊՆ նախկին փոխնախարար Արտակ Զաքարյանը Sputnik Արմենիայի եթերում անդրադարձել է Ադրբեջանում գտնվող հայ գերիներին հետ վերադարձնելու նպատակով ՌԴ նախագահին ուղղված ՀՀ նախագահի նամակին:
Որտեղ փնտրել հայ գերիների հետ վերադարձի բանալին. Զաքարյանը՝ ՌԴ նախագահին ուղղված նամակի մասին

Գործող իշխանությունների ապաշնորհ քաղաքականության հետևանքով Հայաստանը որպես միջազգային սուբյեկտ, որպես պետություն կորցրել է իր բոլոր կարողությունները: Sputnik Արմենիայի հետ զրույցում նման կարծիք հայտնեց ՀՀ ՊՆ նախկին փոխնախարար, ՀՀԿ անդամ Արտակ Զաքարյանը՝ մեկնաբանելով Ադրբեջանում գտնվող հայ գերիների հետ վերադարձի գործընթացին միջնորդելու նպատակով ՌԴ նախագահ Վլադիմիր Պուտինին ուղղված ՀՀ նախագահ Արմեն Սարգսյանի և մնացածի նամակների նպատակը:

«Հանրապետության նախագահի նամակն ուղղված ՌԴ-ին ինչ-որ առումով նաև Հայաստանի արդեն ընկճված, ճզմված դիրքերի մասին է խոսում։ Որպես միջազգային սուբյեկտ, որպես պետություն Հայաստան արդեն կորցրել է իր բոլոր կարողությունները և, հատկապես նման իշխանություններ ունենալով, ուղղակի հայտնվել է ցավալի «իզգոյի» իրավիճակում»,- ասաց նա:

Զաքարյանի խոսքով՝ եթե Հայաստանի գործող իշխանություններն ի վիճակի չեն խնդրով զբաղվել, մնում է հույսը դնել Արցախում տեղակայված խաղաղապահ ուժերի, Կարմիր խաչի և ՌԴ նախագահ Վլադիմիր Պուտինի անմիջական ներգործության վրա: Սակայն բոլոր սլաքները ՌԴ ուղղելն էլ ճիշտ չէ, չէ որ Հայաստանն էլ ինքնիշխան պետություն է, ունի երկրի ղեկավար, և, եթե բոլոր հարցերի բանալիները Ռուսաստանում ենք փնտրում, էլ ինչներիս է պետք ապաշնորհ ու ապիկար իշխանության գոյությունը:

«Ռուսաստանի Դաշնության ջանքերն այդ առումով շատ-շատ կարևոր են, և կարծում եմ, որ ժամանակի ընթացքում դրանք իրենց արդյունքը տալու են, բայց չէ որ մենք պետություն ենք, ունենք իշխանություն իբրև թե: Բոլոր սլաքները և բոլոր ալիքները դեպի ՌԴ տանելը խոսում է այն մասին, որ մենք օր առաջ պետք է այս իշխանություններից ազատվենք»,- նշեց Զաքարյանը:

Նրա կարծիքով՝ գործող վարչապետի ապիկարության հետևանքն է նաև նոյեմբերի 9-ի եռակողմ փաստաթղթում գերիների հետ վերադարձի ժամկետների բացակայությունը: Ու մինչև Հայաստանն ու անհայտ կորածների, գերեվարվածների հարազատները, քաղաքական գործիչներն ու անհատները փորձում են խնդրի լուծման հրատապությունը բարձրաձայնել միջազգային հարթակներում, Ադրբեջանում մտածում են արդեն բանակցային սեղանի շուրջ գերիների հետ վերադարձի դիմաց ևս մեկ կարևորագույն հարց փակել:

«Կարդաց և հուզվեց». անհետ կորած զինվորների ծնողների նամակը դեսպանատունը Մոսկվա կուղարկի

Հիշեցնենք՝ երեկ ՀՀ նախագահ Արմեն Սարգսյանը ՌԴ նախագահ Վլադիմիր Պուտինին ուղղված նամակում խնդրել էր միջնորդել Ադրբեջանում գտնվող հայ գերիների հետ վերադարձի հարցում:

Ավելի վաղ նույնաբովանդակ մի նամակ էլ գերիների ու անհայտ կորածների հարազատներն էին հանձնել ՀՀ-ում ՌԴ դեսպանի խորհրդականին, նոյեմբերի 29-ին մտավորականներն այդպիսի մի նամակ փոխանցեցին ՀՀ-ում ՌԴ դեսպան Սերգեյ Կոպիրկինին: Ռուսաստանի հայերի միության նախագահ Արա Աբրահամյանը նույն հարցով հանդիպել էր ՌԴ նախագահի միջազգային հարցերով օգնական Յուրի Ուշակովի հետ:

44
թեգերը:
Նիկոլ Փաշինյան, Արմեն Սարգսյան, նամակ, Վլադիմիր Պուտին, Ռուսաստան, Ադրբեջան, ռազմագերի, գերի
Ըստ թեմայի
Գերիների վերադարձն ու դիակների փոխանակումը հրատապ լուծում է պահանջում. Հայաստանի ՄԻՊ
Ադրբեջանում հայտնված 13 հայ գերիների պաշտպանության համար ՄԻԵԴ–ը հրատապ միջոց կկիրառի
Գերիների վերադարձն ու անհայտ կորածների խնդիրներն առաջնային են. բողոքի երթը` լուսանկարներով
Հրանտ Միքայելյան

Ո՞րն է թուրքական և ադրբեջանական շուկաների բացման քաղաքական գինը

158
«Կովկաս» ինստիտուտի վերլուծաբան Հրանտ Միքայելյանը Sputnik Արմենիայի եթերում անդրադարձել է ՀՀ էկոնոմիկայի նորանշանակ նախարար Վահան Քերոբյանի տեսակետին, որն առնչվում է հետպատերազմյան տնտեսությունը զարգացնելու հեռանկարին։ 
Միքայելյան. «Անհրաժեշտ է հասկանալ թուրքական և ադրբեջանական շուկաների բացման քաղաքական գինը»

Էկոնոմիկայի նախարարը Հանրային հեռուստաընկերությանը տված հարցազրույցում մասնավորապես նշել էր, որ բացվելու են թուրքական նավահանգիստները և ընձեռվելու են բազմաթիվ լավ հնարավորություններ։ Ըստ նրա` գուցեև բացվի Ադրբեջանի շուկան մեզ համար, և մեր շուկան` Ադրբեջանի համար։

Հրանտ Միքայելյանի դիտարկմամբ` հայտարարության քաղաքական ենթատեքստի առումով պետք է հիշել, որ դրանում կա կոնկրետ կետ, որի համաձայն` տարածաշրջանում բոլոր կոմունիկացիաները պետք է ապաշրջափակվեն, այդուհանդերձ դժվար է ակնկալել, որ Ադրբեջանն ու Թուրքիան կգնան այդ քայլին, քանզի նրանց կողմից նման արձագանք դեռ չկա։ 

«Ճանապարհների շրջափակումը Հայաստանի վրա ճնշում գործադրելու միջոց է, և իրավիճակը դժվար թե շատ արագ փոխվի, մանավանդ որ չկա որևէ հաշտություն, և Թուրքիայի ու Ադրբեջանի մոտեցումները Հայաստանի ու հայերի նկատմամբ չեն փոխվել։ Իսկ ինչ վերաբերում է տնտեսական ենթատեքստին, ապա կոմունիկացիաների ապաշրջափակումը թեև կարող է դրական ազդեցություն ունենալ մեր տնտեսության վրա, բայցևայնպես թուրքական սահմանի բացման հետ կապված հաշվարկները, որոնք ակտիվորեն ներկայացվում էին տասը տարի առաջ, ցույց տվեցին, որ առավելություններն այդքան էլ մեծ չեն կարող լինել»,– նշեց վերլուծաբանը։ 

Միքայելյանի կարծիքով` գուցե այդ դեպքում մեր ՀՆԱ–ն կավելանա կես տոկոսով, սակայն այդ դեպքում անհրաժեշտ է հասկանալ դրա քաղաքական գինը և մտածել պոտենցիալ վտանգների մասին։

Անդրադառնալով էկոնոմիկայի նախարարի լավատեսությանը` Միքայելյանն ընդգծում է, որ թուրքական ապրանքների ներմուծման արգելքը գործելու է կես տարով, և իշխանությունը կարող է այդ արգելքը չերկարաձգել ու իր կողմից լուծել խնդիրը, սակայն վերլուծաբանը հորդորում է չմոռանալ, որ Թուրքիան տնտեսության ոլորտում և հասարակության ներսում կարող է ազդեցիկ դիրքերի հասնել, ինչպես եղավ օրինակ Աջարիայում, հետևաբար այստեղ խոսքը վերաբերում է ոչ միայն օգուտներին, այլև՝ պրոբլեմներին։ 

«Թուրքական ապրանքների ներմուծման արգելքի պարագայում տեղական արտադրողը կարող է միայն մասամբ լրացնել 200-270 մլն դոլարի շրջանառության բացը։ Երբ գործում են պատժամիջոցներ, տեղական արտադրողը պետք է հասկանա պլանավորման հորիզոնը և օրինակ հինգ տարվա կտրվածքով ավելացնի իր հզորությունները, կատարի ներդրումներ, մինչդեռ կես տարվա տնտեսական արգելքի պարագայում առկա հզորությունները բավարար չեն լինի ցանկալի արդյունք ապահովելու համար»,– նշեց վերլուծաբանը։ 

Մնում է «Okul defteri»–ների էջերին, կամ ինչո՞ւ Թուրքայի տնտեսությունն այլևս «չի ձգում»

Միքայելյանի գնահատմամբ` թեև տեղական արտադրողն ամբողջության չի կարող լրացնել բացը, բայց երբ կառավարությունը սերտորեն աշխատի արտադրողների հետ, տա հնարավորություններ ու արտոնություններ, այդ դեպքում գուցե դրությունը շահեկանորեն կփոխվի։

158
թեգերը:
Հրանտ Միքայելյան (քաղաքագետ), տնտեսություն, Թուրքիա, Հայաստան
Ըստ թեմայի
Կորոնավիրուսը, Հայաստանի տնտեսությունն ու պոպուլիզմը. ի՞նչ սպասել ապագայում
Ի՞նչ հետևանք կունենա թուրքական ապրանքների ներկրման արգելքը ՀՀ տնտեսության վրա
Ռազմական դրությունն իր ազդեցությունն է ունեցել տնտեսության վրա. Մհեր Գրիգորյան
Նիկոլ Փաշինյան. արխիվային լուսանկար

Փաշինյանի հիվանդագին ինքնասիրությունը խափանել է ՀՀ և Արցախի նախկին նախագահների ծրագրերը

0
Արցախի ու Հայաստանի նախկին նախագահները որոշել էին Նիկոլ Փաշինյանին աջակցող հայտարարություններ անել, բայց նա խափանել է այդ ծրագրերը:

ԵՐԵՎԱՆ, 1 դեկտեմբերի - Sputnik. Արցախի ու Հայաստանի բոլոր նախկին նախագահները պատրաստ են եղել իրենց աջակցությունը հայտնել ՀՀ վարչապետ Նիկոլ Փաշինյանին: ՀԱԿ մամուլի խոսնակ Արման Մուսինյանը Facebook-ում գրառում է արել, որում, անդրադառնալով Արցախի պաշտոնաթող նախագահներ Բակո Սահակյանի ու Արկադի Ղուկասյանի այսօրվա հայտարարությանը, ի հավելումն հայտնում է, որ պայմանավորվածություն էր ձեռք բերվել առ այն, որ աջակցության նույնպիսի հրապարակային ուղերձներով պետք է հանդես գային նաև ՀՀ նախկին նախագահներ Լևոն Տեր-Պետրոսյանը, Ռոբերտ Քոչարյանն ու Սերժ Սարգսյանը, որպեսզի Փաշինյանի որոշումը անհապաղ հրադադարի վերաբերյալ, Մուսինյանի մեկնաբանությամբ, չդիտվեր որպես նրա անձնական նախաձեռնություն, և դրա ամբողջ պատասխանատվությունը չընկներ նրա վրա:

«Ավելի պարզ ասած` նրա դեմքը փրկելու համար,- գրում է Մուսինյանը և շարունակում,- Դժբախտաբար, Փաշինյանի հիվանդագին ինքնասիրությունը նրան թույլ չտվեց հասկանալ այս քայլի կարևորությունը, և նա կտրականապես արգելեց հրապարակել Արայիկ Հարությունյանի նամակը, դրանով խափանելով նաև Արցախի և Հայաստանի նախկին նախագահների աջակցության ուղերձների հրապարակումը»:

Մուսինյանը նշում է, որ Տեր-Պետրոսյանը նույնիսկ պատրաստել էր իր գրավոր հայտարարությունը, որը նույն պատճառով այն ժամանակ չէր հրապարակվել: Բայց այսօր ՀԱԿ խոսնակն այն ներկայացնում է ընթերցողների ուշադրությանը.

«Ղարաբաղյան շարժման առաջին օրվանից «Ղարաբաղ» կոմիտեն, ՀՀՇ-ն և Հայաստանի հետագա բոլոր իշխանությունները Ղարաբաղյան հակամարտության կարգավորման հարցում ոչ մի քայլ չեն արել առանց Լեռնային Ղարաբաղի ղեկավարության համաձայնության: Այնպես որ, Հայաստանի ներկայիս իշխանությունները չեն կարող, ավելին` իրավունք չունեն անտեսելու Արցախի իշխանությունների պահանջը. Լևոն Տեր-Պետրոսյան»:

Մենք չենք պատրաստվում փախչել որևէ տեղ. Նիկոլ Փաշինյան

Մուսինյանը հիշեցնում է, որ այդ ամենը տեղի է ունեցել հոկտեմբերի 19-ին, երբ դեռ պատերազմի վիճակը կատաստրոֆիկ չէր, և եթե այդ պահին կրակը դադարեցվեր, հայկական կողմը կխուսափեր հազարավոր նոր զոհերից և տարածքային հետագա կորուստներից:

Հիշեցնենք` այսօր ավելի վաղ հայտարարությամբ էին հանդես եկել նաև Արցախի պաշտոնաթող նախագահներ Արկադի Ղուկասյանն ու Բակո Սահակյանը: Նրանք հայտնել էին, որ հոկտեմբերի 18-ին Արայիկ Հարությունյանը դիմել է իրենց աջակցությանը։ Պատերազմական գործողությունների դադարեցման հարցում Արցախի նախագահները կարևորել էին նաև Հայաստանի պաշտոնաթող նախագահների աջակցությունը:

Հոկտեմբերի 19-ին, անսալով նրանց խորհրդին, Արցախի նախագահ Արայիկ Հարությունյանը պատերազմի դադարեցման և ԵԱՀԿ Մինսկի խմբի շրջանակներում բանակցային գործընթացի վերսկսման վերաբերյալ համապատասխան նամակներ է պատրաստել՝ ուղղված ԵԱՀԿ Մինսկի խմբի համանախագահող երկրների նախագահներին և ՀՀ վարչապետին: Սակայն վարչապետ Փաշինյանը պատճառաբանել է, որ Ադրբեջանի քաղաքականության հետևանքով ստեղծված իրավիճակի պայմաններում սույն նամակների հղումը կորցրել է իր նպատակահարմարությունը:

Հիշեցնենք՝ նոյեմբերի 29-ին ՀՀ վարչապետ Նիկոլ Փաշինյանը Facebook-ի իր էջում գրառում էր արել՝ նշելով, թե հոկտեմբերի 19-ին իրեն զանգահարել է Արցախի նախագահ Արայիկ Հարությունյանը և ասել, որ պետք է կանգնեցնել պատերազմը: Փաշինյանի խոսքով՝ նա նշել է, որ փոխանցում է ոչ միայն իր տեսակետը, այլև ԼՂՀ պաշտոնաթող նախագահներ Արկադի Ղուկասյանի, Բակո Սահակյանի, նաև Ռոբերտ Քոչարյանի, Սերժ Սարգսյանի, Լևոն Տեր-Պետրոսյանի անունից:

Փաշինյանը նշել է, որ զանգահարել է ՌԴ նախագահին, ասել, որ համաձայն է պատերազմը դադարեցնել:

«Ասաց, որ մինչև առավոտ կքննարկի Ալիևի հետ ու ետ կզանգի: Հաջորդ օրը Բակո Սահակյանը և Արկադի Ղուկասյանն ինձ հետ հանդիպման ժամանակ ասացին, որ համաձայն չեն առանց Արցախի կարգավիճակի ճշգրտման կամ ճշգրտման մեխանիզմի որևէ համաձայնության գալուն: Ըստ էության՝ ասացին նաև Ռ. Քոչարյանի, Ս. Սարգսյանի և Լ. Տեր-Պետրոսյանի անունից»,–գրել է նա:

Վարչապետը հավելել է, որ այդ ամենը կարևոր չի եղել այդ պահին, որովհետև ինքը կայացրել էր իր որոշումը և պատրաստվում էր այն տանել մինչև վերջ:

«Մենք կարող ենք այդ թուղթը պատռել և գցել մի կողմ, բայց...». Նիկոլ Փաշինյան

0
թեգերը:
Նախագահ, Հայաստան, Արցախ, Արկադի Ղուկասյան, Լևոն Տեր–Պետրոսյան, Նիկոլ Փաշինյան
թեմա:
Իրադրությունը Հայաստանում և Արցախում հայտարարության ստորագրումից հետո