Ադրբեջանի տարածած տեղեկությունը պաշտոնական արտահոսք է, որի նպատակն է ազդել ներհայաստանյան քաղաքական զարգացումների վրա։ Նման կարծիք ունի քաղտենոլոգ Վիգեն Հակոբյանը։ Sputnik Արմենիայի հետ զրույցում նա նշեց, որ բոլոր նմանատիպ հայտարարությունները, որոնք առնչվում են Արցախին ու նրա շուրջ ծավալվող գործընթացներին, սովորաբար բավականին բուռն են ընկալվում Հայաստանում` նույնիսկ ձևավորելով քաղաքական օրակարգեր։
Սեպտեմբերի 23-ին Բաքուն Լավրովի անունից սկանդալային հայտարարություն էր արել։ Ադրբեջանի խորհրդարանի կայքում հրապարակված հաղորդագրության մեջ նշվում էր, որ խորհրդականների հետ հանդիպման ընթացքում ՌԴ արտգործնախարար Սերգեյ Լավրովն իբր ասել է, թե ՀՀ վարչապետ Նիկոլ Փաշինյանի` Լեռնային Ղարաբաղի մասին հայտարարությունները խոչընդոտում են հիմնախնդրի կարգավորման գործընթացը, և որ ռուսական կողմը կարգավորման գործընթացում հանդես է գալիս հօգուտ «օկուպացված 5 շրջանների» վերադարձի, շփման գծում խաղաղապահների տեղակայման և տրանսպորտային կապի վերականգնման։ Ավելի ուշ ՌԴ ԱԳՆ–ն պաշտոնապես կոչ արեց կողմնորոշվել բացառապես Մոսկվայի դիրքորոշմամբ, ոչ թե ուրիշների մեկնաբանություններով։
«Քանի որ հայաստանյան կողմը շատախոս չէ, միշտ բավականին ժլատ տեղեկություն է տալիս, որոշ դեպքերում էլ` իրար հակասող, հետևաբար դրսից եկող և նույնիսկ Ադրբեջանից հնչող ցանկացած լուր գոնե որոշ ժամանակ դառնում է հավաստի տեղեկության աղբյուր, ու երբ լինում է տեղեկատվական վակուում, ապա բացը լրացվում է նման ինֆորմացիայով և դառնում տարբեր վերլուծությունների, մեկնաբանությունների առիթ»,– ասաց քաղտեխնոլոգը։
Հակոբյանի խոսքով`այդ ամենը գալիս է նրանից, որ պաշտոնական Երևանը չափից դուրս գաղտնապահ է, թեև սիրում է ասել, որ երբեք այսքան բաց չի եղել, մինչդեռ այնքան է այդ գաղտնապահության մեջ խճճվում ու խճճում բոլորին, որ վակուումը շատ հեշտ լցում է դրսից եկող ինֆորմացիաներով` ճիշտ, կիսով չափ ճիշտ և բացարձակ կեղծ։
