Արմեն Բադալյանի դիտարկմամբ` իրավիճակն այնպիսին է, որ առկա է սոցիալ–տնտեսական ծանր իրավիճակ, համավարակից ավելի քան 1000 մարդ է մահացել, ինչը նույնպես հարուցում է հասարակության դժգոհությունը, կառավարությունը երբեմն այնպիսի որոշումներ է ընդունում, որոնք հարվածում են տնտեսվարող սուբյեկտների գործունեությանը։ Այդ ամենից բացի, կան նաև Ամուլսարի, կրթական չափորոշիչների, Ստամբուլյան կոնվենցիայի հետ կապված խնդիրները։
«Բնական է, որ ընդդիմադիր ուժերը չեն կարող հաշվի չառնել հասարակության շրջանում առկա դժգոհությունն ու ձևավորվող բացասական տրամադրությունները և չեն կարող կողքից հանդես գալ դիտորդի կարգավիճակով, հետևաբար նպատակահարմար են գտել իրենց վերաբերմունքն այդ ամենի հանդեպ արտահայտել հանրահավաք անցկացնելով։ Իսկ ինչ վերաբերում է հանրահավաքի բազմամարդությանը, ապա այդ հանգամանքը կախված կլինի կազմակերպիչների գրագետ աշխատանքից»,– Sputnik Արմենիային ասաց քաղտեխնոլոգը։
Բադալյանի կարծիքով` հոկտեմբերի 8-ին նախանշված հանրահավաքին կմասնակցեն ոչ միայն նրանք, ովքեր կգնան հրապարակ, այլև նրանք, ովքեր ուղիղ ռեժիմով համացանցում կհետևեն հանրահավաքին, ինչը նույնպես ցուցիչ է, և կարող է դիտարկվել տարբեր տեսանկյուններից։
«Վերջին 30 տարիների ընթացքում իշխանության բոլոր ներկայացուցիչները նշել են, որ ընդդիմության անցկացրած հանրահավաքներն անիմաստ են եղել, հատկապես հանրապետականները շեշտում էին, որ իրենք քաջածանոթ են հանրությանը հուզող խնդիրներին և պատրաստ են դրանք լուծել։ Փաստորեն «Իմ քայլը» գնում է ՀՀԿ–ի ճանապարհով, և տրամաբանության համաձայն` գործող իշխանությունը նախորդներից պես կրկնում է, որ ինքը ճիշտ է, իսկ ընդդիմությունը սխալ»,– նշեց քաղտեխնոլոգը։
Բադալյանի խոսքով`գործող իշխանությունն ամբողջությամբ ժառանգել է նախորդների գործելաոճը, ընդդիմադիրների նկատմամբ ցուցաբերվում է նույն գործելակերպը, ինչպես տարիներ առաջ։ Ըստ նրա`անգամ ժառանգել են նույն բառապաշարը, որով քննադատում են ընդդիմությանը։
Ինչ է կատարվում. «Իմ քայլը» խմբակցության ներկայացուցիչը հերքում է տարածված լուրերը
