Սերոբ Խաչատրյան

Հեռավար ուսուցումը կարո՞ղ է փոխարինել դեմ առ դեմ ուսուցմանը. փորձագետի կարծիք

181
(Թարմացված է 14:17 26.06.2020)
Կրթական հարցերով փորձագետ Սերոբ Խաչատրյանը Sputnik Արմենիայի եթերում գնահատել է հեռավար ուսուցման գործընթացը վերջին երեք ամիսների կտրվածքով և անդրադարձել այն հարցի, թե կարո՞ղ է արդյուք այդ ձևաչափն ընդունվել որպես այլընտրանքային միջոց։ 
Խաչատրյան. «Հեռավար ուսուցումը կարող է լինել այլընտրանքային, բայց ոչ փոխարինող»

Սերոբ Խաչատրյանի դիտարկմամբ` առաջին հերթին պետք է ընդունել, որ դա պարտադրված գործընթաց էր, այսինքն` այլ տարբերակ չկար, քան անցնել հեռավար կրթության։ Այդ իմաստով մեր համակարգն ի սկզբանե պատրաստ չէր հեռավար ուսուցման մեթոդին, որովհետև դրան անցնելու համար անհրաժեշտ է ունենալ կատարյալ տեխնոլոգիաներ, համակարգչային ապահովվածություն, բարձր որակի ինտերնետ, վերապատրաստված ուսուցիչներ, էլեկտրոնային նյութեր, սակայն այդ ամենը չկար կամ շատ քիչ կար։ 

«Խոսել այն մասին, որ այս երեք ամիսների ընթացքում ապահովվեց որակյալ կրթություն, ճիշտ չի լինի, բայցևայնպես նշեմ, որ դրական կողմեր կային։ Օրինակ` ուսուցիչներն ու դասախոսները հասկացան, որ պետք է տիրապետել թվային գործիքներին, իմանալ հեռավար աշխատելու ձևեր, քանզի կարող են լինել իրավիճակներ, երբ ստիպված ես ապավինել հեռավար ուսուցմանը։ Այդ իմաստով վերջին երեք ամիսներին նկատվեց մեծ հետաքրքրություն նոր բաներ սովորելու, փորձելու և կիրառելու առումով»,– նշում է կրթական հարցերով փորձագետը։  

Խաչատրյանի գնահատմամբ` սա լավ հնարավորություն է տալիս համակարգում առաջընթաց ապահովել, սակայն ընթացքում տեսանելի էին նաև որոշ խնդիրներ։ Օրինակ` աշակերտների մի զգալի մասը չմասնակցեց դասընթացներին, մի մասն էլ գուցե ֆիզիկապես մասնակցեց, սակայն մատների արանքով նայեց այդ գործընթացին, հատկապես որոշ առարկաների պարագայում։ Ըստ փորձագետի` ուսուցիչներից շատերն օգտագործում էին այնպիսի հարթակներ, որոնք այդքան էլ հարմար չեն կրթության համար, հետևաբար կիրառված հեռավար ուսուցման ընդհանուր մակարդակը ցածր էր։

Ընդունելության հեռավար քննության դեպքում օբյեկտիվորեն գնահատելու աստիճանը կնվազի. ռեկտոր

Սերոբ Խաչատրյանի համոզմամբ` հեռավար ուսուցումը կարող է լինել այլընտրանքային, բայց ոչ փոխարինող, այսինքն`մտածել, որ հեռավար ուսուցումը կարող է փոխարինել դեմ առ դեմ ուսուցմանը, անընդունելի է, նման բան չի կարող լինել։ Ըստ փորձագետի` հեռավար ուսուցումը կարող է լրացնել, որոշ դեպքերում լինել այլընտրանք, օրինակ` ԲՈՒՀ–ական համակարգում, սակայն հեռավարը չի կարող փոխարինել ֆիզիկականին, որովհետև կրթության մեջ շատ կարևոր է անմիջական շփումը, ներկայությունը։ 

 

181
թեգերը:
Հայաստան, բուհ, դպրոց, Սերոբ Խաչատրյան, Հեռավար ուսուցում
Կարեն Սիմոնյան

Ինչ կլինի, եթե Ադրբեջանն անտեսի եվրոպական կառույցների կոչերն ու հորդորները

0
(Թարմացված է 18:24 03.08.2020)
Աժ «Լուսավոր Հայաստան» խմբակցության պատգամավոր, Եվրոպական ինտեգրման հարցերի մշտական հանձնաժողովի նախագահի տեղակալ Կարեն Սիմոնյանը Sputnik Արմենիայի եթերում անդրադարձել է Եվրամիության կողմից Ադրբեջանի նկատմամբ կիրառվելիք հնարավոր պատժամիջոցների հարցին։  
Սիմոնյան. «Ադրբեջանին պատժամիջոցների ենթարկելու Եվրախորհրդարանի կոչը թեև ուշացած, բայց տեղին է»

Եվրոպական խորհրդարանում մեծությամբ երկրորդ խմբակցությունը` «Սոցիալիստների և դեմոկրատների առաջադեմ ալյանսը» կոչ է արել Եվրամիությանը պատժամիջոցներ կիրառել ադրբեջանցի որոշ պաշտոնյաների նկատմամբ, որոնք պատասխանատու են Ադրբեջանում ընդդիմության և քաղաքացիական հասարակության դեմ բռնաճնշումների համար։

«Ադրբեջանի՝ Մեծամորին հարվածելու սպառնալիքը հանցագործություն է»․ Արծրուն Հովհաննիսյան

Կարեն Սիմոնյանի դիտարկմամբ` թեև հայտարարությունը բավականին ուշացած էր, սակայն տեղին էր ու պետք է լիներ, հետևաբար, ինքը սպասում է Եվրոպական խորհրդարանում առկա մյուս ուժերի արձագանքներին նույն հարցի վերաբերյալ, քանի որ ամենօրյա ռեժիմով ականատես ենք լինում, թե ինչպես են Ադրբեջանում խախտվում մարդու իրավունքները, ականատես ենք լինում նաև Ադրբեջանի` որպես ահաբեկիչ երկրի վարքին, քանզի նա վերջերս պաշտոնական մակարդակով հայտարարում էր Մեծամորի ատոմակայանին հարվածելու մասին։ Այս ամենը պետք է ստանա համարժեք պատասխան։ 

«Ողջունում եմ Եվրոպական խորհրդարանի թվով երկրորդ ուժի մոտեցումը և հույս ունեմ, որ եվրոպական կառույցն ականջալուր կլինի հայտարարությանն ու քայլեր կձեռնարկի` Ադրբեջանին ստիպելու չխախտել մարդու իրավունքներն իր ներսում ու չանել ահաբեկչական բնույթի հայտարարություններ»,– նշում է ԱԺ պատգամավորը։ 

Սիմոնյանի կարծիքով` հիշյալ հայտարարությունը նաև հայկական խորհրդարանական դիվանագիտության արդյունքն է, որովհետև ՀՀ ԱԺ պատգամավորները ներգրավված են եվրոպական կառույցներում, ակտիվ աշխատում են և փորձում բարձրաձայնել հիմնահարցերը։

Նրա փոխանցմամբ` հայ–ադրբեջանական սահմանի վերջին դեէսկալացիային առնչվող հայտարարությունների և օբյեկտիվ տեղեկատվության մատուցման միջոցով հայ պատգամավորները կարողացան եվրոպացի գործընկերներին ներկայացնել առկա խնդիրները, որոնք վերաբերում են ինչպես Ադրբեջանի ներքաղաքական իրավիճակին, աղաղակող իրավախախտումներին, այնպես էլ այդ երկրի ռազմատենչ հռետորաբանությանը։ 

«Ադրբեջանն, իհարկե, ցանկացած տարբերակով, այդ թվում` խավիարային և սովորական դիվանագիտությամբ, փորձելու է ամեն ինչ անել, որպեսզի հայտարարությունը մնա լոկ որպես այդպիսին և չդառնա իրականություն, սակայն հույս ունեմ, որ եվրոպացի գործընկերները ողջախոհ կգտնվեն, ճիշտ որոշում կկայացնեն` հասկանալով, որ Ադրբեջանում կատարվող իրավախախտումների դեմ չպայքարելու դեպքում ճգնաժամն ավելի կխորանա ու վտանգավոր կդառնա հենց Ադրբեջանի հասարակության համար, էլ չասեմ, որ Ադրբեջանի խեղկատակ քաղաքականության արդյունքում վտանգվում է նաև մեր զինվորների կյանքը»,– նշում է ԱԺ պատգամավորը։ 

Ալիևի խորհրդականը վստահեցրել է, որ Մեծամորի ԱԷԿ-ին հարվածելու հարց օրակարգում չի եղել

Պատգամավորի կարծիքով` եթե Ադրբեջանն անտեսի եվրոպական կառույցների կոչերն ու հորդորները, դա իր հետևանքը կունենա միջազգային ասպարեզում, քանզի կարգելվի որոշ պաշտոնյաների մուտքը Եվրամիության տարածք, իսկ Ադրբեջանը, որպես պետություն, չի ընկալվի հուսալի, համարժեք գործընկեր, հետևաբար, կառաջանանան խնդիրներ կապված Ադրբեջանի միջազգային վարկի ու հեղինակության հետ, նա պարզապես կընկալվի որպես անլուրջ և անպարկեշտ գործընկեր։ 

Ադրբեջանի սպառնալիքի կշիռը. պաշտպանվա՞ծ է Մեծամորի ատոմակայանը հարվածներից

0
թեգերը:
Կարեն Սիմոնյան, պատժամիջոցներ, Եվրախորհուրդ, Եվրոպա, Հայաստան, Ադրբեջան
Ըստ թեմայի
Պատրիարք Կիրիլը Երևանին և Բաքվին խաղաղության կոչ է արել
ԵԱՀԿ Մինսկի խումբը Երևանին և Բաքվին կոչ է արել պատրաստվել բանակցությունների
«Մահաբեր բիզնես»․ Մնացականյանն Իսրայելին կոչ է արել դադարեցնել զենքի մատակարարումը Բաքվին
Նիկիտա Սիմոնյանը խաղաղության կոչ է արել հայերին և ադրբեջանցիներին. տեսանյութ
Բաբկեն Պիպոյան

Շուկայում գյուղմթերքի իրացումը կազմակերպելու առումով լուրջ խնդիրներ կան․ ինչ պետք է անել

54
(Թարմացված է 13:03 02.08.2020)
«Իրազեկ և պաշտպանված սպառող» ՀԿ նախագահ Բաբկեն Պիպոյանը Sputnik Արմենիայի եթերում անդրադարձել է գյուղմթերքի իրացման գործընթացում առկա խնդիրներին։
Շուկաներում գյուղմթերքի իրացումը կազմակերպելու առումով լուրջ խնդիրներ կան․ ինչ պետք է անել

«Իրազեկ և պաշտպանված սպառող» ՀԿ նախագահ Բաբկեն Պիպոյանի դիտարկմամբ` շրջանառվող լուրերը, թե գյուղացին իր աճեցրած բերքի հասույթից 30 տոկոս եկամուտ է ստանում, հարաբերական են, քանի որ այդ տվյալը ֆիքսված չէ։ Ինչ վերաբերում է չվերամշակվող մթերքին, այսինքն՝ պատրաստի հումքի իրացմանը, ապա, ըստ Պիպոյանի` թեև մեծածախ շուկայում իրացվում է բնամթերքը, սակայն հիմնականում գյուղացին չի զբաղվում ամբողջական գործընթացով։

«Այստեղ ի հայտ են գալիս միջնորդները, որոնք մեծածախ շուկայում ապրանքը վաճառում են առանձին տաղավարներից կամ սեղաններից։ Ընդ որում` նրանք հաշվի են առնում, որ ամբողջ քանակի որոշ մասը չեն կարողանալու վաճառել, ուստի կատարում  են սորտավորում` առանձնացնելով բարձր, միջին և ցածր դասի ապրանքը, և այդ դեպքում գներն էլ բնականաբար տարբեր են։ Այս ամենով հանդերձ մենք շուկայում իսկապես ունենք գյուղմթերքի իրացումը կազմակերպելու հետ կապված լուրջ խնդիրներ»,– Sputnik Արմենիայի հետ զրույցում ասաց «Իրազեկ և պաշտպանված սպառող» ՀԿ նախագահը։

Պիպոյանը հիշեցրեց, որ 2013 թվականից ի վեր խոսում են իրատեսական գների սահմանման, գների կարգավորման մեխանիզմների կիրառման մասին, սակայն դա որպես համակարգ չի ներդրվում շուկաներում, ինչի պատճառով էլ առաջանում են կազմակերպչական բնույթի խնդիրներ։ Անդրադառնալով Երևանի Կասյան փողոցի գյուղմթերքի տոնավաճառը փակելու հարցին` Պիպոյանն ընդգծեց, որ այն պետք է մտահոգի գյուղատնտեսության ոլորտում քաղաքականություն մշակողներին։

Վնասատուներ, եղանակ, թե գյուղացու սխալ մոտեցում. ինչու է ծիրանի բերքը քիչ ու անորակ

«Բայց եթե մի կողմ թողնենք այն զգացումը, որ սպառողները մթերքը գնում էին առաջին ձեռքից՝ հենց գյուղացուց, ապա զուտ գնային առումով այնպես չէ, որ այդ շուկան էականորեն տարբերվում էր մյուսներից։ Այդուհանդերձ քաղաքականություն մշակող և վարող Էկոնոմիկայի նախարարության տեսանկյունից Կասյանի շուկան շատ խնդրահարույց էր, որովհետև այն գյուղացին, որն օբյեկտիվորեն ասում էր, թե իրեն ձեռնտու չէ ապրանքը տալ միջնորդին կամ վերավաճառողին, որպեսզի մարդիկ հետո այդ ապրանքը գնեն երկրորդ կամ երրորդ ձեռքից, իր ժամանակի մի մասն էլ հատկացնում էր իրացումը կազմակերպելուն և ինքնուրույն սահմանում գներ, հետևաբար այդ գյուղացին ընկալվում էր որպես ռեալ խոչընդոտ»,– նշեց «Իրազեկ և պաշտպանված սպառող» ՀԿ նախագահը։

Պիպոյանը վկայակոչում է արտասահմանյան երկրների պրակտիկան, որտեղ քաղաքակիրթ մակարդակով կազմակերպվում է ամբողջական գործընթացը, և յուրաքանչյուր օղակ զբաղվում է իր գործով` գյուղացին աճեցնում է բերքը, տեղափոխողն ու իրացնողն էլ իրենց աշխատանքն են կատարում, հետևաբար մեզ մոտ էլ պետք է գործի նույն սխեման, ամեն ոք պետք է շահագրգռված լինի կատարել միայն իր գործը։ Ըստ այդմ` եթե գյուղացին ինքն է ցանկանում զբաղվել մթերքի իրացմամբ, նշանակում է՝ այդ գործընթացի կազմակերպումը վատ վիճակում է։ Պիպոյանի համոզմամբ` գյուղացիներին խնդիրը հանգամանորեն բացատրելու համար նախ պետք է հանգամանորեն հասկանալ այն։

Հայաստանի արևահամ այցեքարտը. ծիրանի բերքահավաքը` լուսանկարներով

Նշենք, որ մամուլում շրջանառվող լուրերի  համաձայն` գյուղացին իր աճեցրած բերքի հասույթից լավագույն դեպքում ստանում է 30 տոկոս եկամուտ, մյուս մասը բաժին է ընկնում միջնորդներին ու վերավաճառողներին, այսինքն` գործը լավ չի կազմակերպվում, մրցակցային իրացում բացարձակապես չկա։

54
թեգերը:
Շուկա, գյուղմթերք, Բաբկեն Պիպոյան, Հայաստան
Ըստ թեմայի
Կորոնավիրուսը կխանգարի՞ գյուղմթերքի արտահանմանը. ինչ է արել ՀՀ կառավարությունը
Առաջին արձագանքը կարկտահարությանը. գյուղմթերքը թանկացավ
Ռուսական շուկան սիրում է հայկական գյուղմթերքը. ՌԴ–ն` արտահանման գերակա ուղղություն
Գյուղմթերքի վաճառողները պահանջում են իրենց վերադարձնել Մհեր Մկրտչյանի հրապարակը