Հաշմանդամություն ունեցող անձանց իրավունքները ՀՀ–ում մեծամասամբ ոտնահարվում են. Ալավերդյան
(Թարմացված է 23:17 11.06.2020)
«Ունիսոն» ՀԿ գործադիր տնօրեն Արմեն Ալավերդյանը Sputnik Արմենիայի եթերում անդրադարձել է նախաձեռնությանը, որով գործադիրը հավանություն է տվել «Հաշմանդամություն ունեցող անձանց իրավունքների մասին» կոնվենցիայի կամընտիր արձանագրությունը վավերացնելու մասին ՀՀ օրենքի նախագծին։ Ալավերդյան. «Հաշմանդամություն ունեցող անձանց իրավունքները ՀՀ–ում մեծամասամբ ոտնահարվում են»
«Ունիսոն» ՀԿ գործադիր տնօրեն Արմեն Ալավերդյանի կարծիքով` կառավարության քայլը ճիշտ է և ողջունելի, բայց ուշացած, քանի որ կոնվենցիան Հայաստանը վավերացրել է դեռ 2010 թվականին, և միայն տասը տարի անց պատրատվում է ի վերջո վավերացնել նաև կամընտիր արձանագրությունը։
©
Sputnik / Armenuhi Mkhoyan
«Արդյունքը կլինի այն, որ անհատներն այսուհետ կկարողանան իրենց բողոքներով ուղղակիորեն դիմել ՄԱԿ–ի հաշմանդամության հարցերող զբաղվող կոմիտեին, ինչն իհարկե կխթանի մեր չինովնիկների զգաստությունը, ավելի մեծ պատասխանատվությունը հաշմանդամություն ունեցող անձանց իրավունքների պաշտպանության ոլորտում», –նշում է «Ունիսոն» ՀԿ գործադիր տնօրենը։
Ալավերդյանը ցավով արձանագրում է այն իրողությունը, որ հաշմանդամություն ունեցող անձանց իրավունքները Հայաստանում մեծամասամբ ոտնահարվում են ու անտեսվում։
«Բերեմ ամենաթարմ օրինակը. կորոնավիրուսի տարածման պարագայում հաշմանդամություն ունեցող անձանց համար նախատեսված են հստակ ցուցումներ Առողջապահության համաշխարհային կազմակերպության, տարբեր այլ հեղինակավոր միջազգային կազմակերպությունների կողմից, որոնք հորդորում են հենց թիրախային, նպատակային կերպով աջակցել հաշմանդամություն ունեցող մարդկանց` համավարակը հաղթահարելու գործում։ Սակայն մեզ մոտ նույնիսկ կառավարության կողմից իրականացվող միջոցառումների ցանկում հաշմանդամություն բառը չես գտնի»,– ասում է «Ունիսոն» ՀԿ գործադիր տնօրենը։
Աշխարհում եզակի երգչախումբ. հաշմանդամություն ունեցող հայ երգիչները նվաճում են մեծ բեմերը
Նրա գնահատմամբ` եթե մոռանանք ներկա իրավիճակը, հաշմանդամություն ունեցող անձանց համար տակավին խնդրահարույց է մատչելիության հարցը, այսինքն` դեռ կան հանրային նշանակության շատ շենքեր և տրանսպորտային միջոցներ, որոնք հարմարեցված չեն նշված խմբի անձանց։ Կան խնդիրներ նաև կրթության ոլորտում։
Թեև իշխանությունները որդեգրել են համընդհանուր ներառականության սկզբունքը, սակայն այդ ամենը մնում է թղթի վրա, մինչդեռ պետք է կիրառվի իրական կյանքում։ Ըստ Ալավերդյանի` զբաղվածության ոլորտում կա 90 տոկոսից ավել գործազրկություն, ինչը խայտառակ ցուցանիշ է։
«Այդուհանդերձ, հուսով ենք, որ վերջին քայլերը կնպաստեն իրավիճակի դրական ու որակական փոփոխությանը։ Երբ կամընտիր արձանագրությունը վավերացվի, Հայաստանի համար դառնա օրենք, մենք կիրազեկենք մարդկանց, թե դա ինչ ազդեցություն կունենա և ինչ հնարավորություններ կբացի նրանց համար, որպեսզի ավելի պաշտպանված լինեն մեր երկրում»,– նշում է «Ունիսոն» ՀԿ գործադիր տնօրենը։
Ալավերդյանի տեղեկացմամբ` հաշմանդամություն ունեցող անձանց իրավունքներով զբաղվող կազմակերպությունների և ՀՀ աշխատանքի ու սոցիալական հարցերի նախարարության միջև համագործակցությունը ոչ փայլուն է, ոչ էլ զրոյական, գերատեսչությունն իրենցից երբեմն ուզում է մասնագիտական կարծիքներ նախապատրաստվող նախագծերի վերաբերյալ, բայց կարծես դրանով ամեն ինչ սահմանափակվում է, մինդեռ համագործակցությունը պետք է լինի ավելի արդյունավետ։
Հաշմանդամություն ունեցող հայուհու ձեռքբերումը պետք է վարակիչ լինի բոլորի համար. Թաթոյան
«Իրանի դեմ լուրջ տանդեմն այսօր էլ է տեսանելի». Բալասանյանը` ԱՄՆ քաղաքականության մասին
(Թարմացված է 22:15 22.01.2021)
Փորձագետ, ԵՊՀ Միջազգային հարաբերությունների և դիվանագիտության ամբիոնի դոցենտ Գրիգոր Բալասանյանը Sputnik Արմենիայի եթերում անդրադարձել է մերձավորարևելյան տարածաշրջանում վերջին իրադարձություններից հետո առաջացած իրավիճակին և հատկապես Իրանի շուրջ ընթացող զարգացումներին։Բալասանյան. «Այսօր էլ տեսանելի է ԱՄՆ–Իսրայել լուրջ տանդեմն Իրանի դեմ»
Գրիգոր Բալասանյանի դիտարկմամբ` ԱՄՆ–ում կայացած նախագահական ընտրությունների ֆոնին իրանական կողմը թաքուն լավատեսությամբ փորձեց արձանագրել, որ այդ ընտրությունների արդյունքում ԱՄՆ–Իրան հարաբերություններում որոշակի ջերմացում և բարելավում կնկատվի, և Վաշինգտոնը կհրաժարվի այն թշնամական քաղաքականությունից, որ վերջին տասնամյակներին վարում է Իրանի նկատմամբ, սակայն միջազգայնագետը վկայակոչեց միջազգային հարաբերությունների փորձը, ըստ որի` ԱՄՆ–ի յուրաքանչյուր նախագահի ընտրություններից հետո երկրի արտաքին քաղաքականության մեջ մեծ հաշվով ոչինչ չի փոխվում։
©
Sputnik / Сергей Гунеев
Եռակողմ հայտարարության 9-րդ կետը. ձեռնտո՞ւ է Իրանին Նախիջևանի միջանցքի բացումը
«Բայդենի այն հայտարարությունները, որ իրենք կվերանայեն Թրամփի վարած քաղաքականությունը և Իրանի հետ կապված որոշակի զիջումների, թուլացումների կգնան, արվեցին քարոզարշավի ժամանակահատվածում ընտրազանգվածին իր կողմ ներգրավելու համար, որովհետև ԱՄՆ–ն Իրանի հետ կապված ունի շատ լուրջ ծրագրեր»,– նշեց միջազգայնագետը։
ՀՀ էկոնոմիկայի նախարարն ու ևս երկու պաշտոնյա կգործուղվեն Իրան
Բալասանյանի կարծիքով` մի կողմից առկա է Իրանի նախագահ Հասան Ռոհանիի հուսադրող հայտարարությունն ու թաքուն լավատեսությունն առ այն, որ միգուցե կարող է ինչ–որ բան փոխվել ԱՄՆ–ի քաղաքականության մեջ, բայց մյուս կողմից այսօր էլ տեսանելի է ԱՄՆ–Իսրայել լուրջ տանդեմն Իրանի դեմ, որովհետև Իրանն այդ երկրների համար Մերձավոր Արևելքում այն գործոնն է, որն ընդդիմանում է ամերիկյան աշխարհաքաղաքականության ամբողջ ծավալով իրականացմանը։
Թուրքիան թուլացրել է իր դերակատարումը, բայց չպետք է մոռանալ Էրդողանի քայլերը. Պետրոսյան
(Թարմացված է 18:38 22.01.2021)
Արաբագետ Արմեն Պետրոսյանը Sputnik Արմենիայի եթերում անդրադարձել է այն հարցին, թե Ջո Բայդենի նոր վարչակազմը ինչպիսի քաղաքականություն կվարի Մերձավոր Արևելքում և ինչպես կվերաբերվի մասնավորապես Թուրքիային։Պետրոսյան. «Բայդենի վարչակազմի հետ աշխատանքի առումով Թուրքիայում լրջորեն նախապատրաստվել են»
Արմեն Պետրոսյանի դիտարկմամբ` բավականաչափ բարդ է կանխատեսել, թե ինչպիսի քաղաքականություն կիրականացնի ԱՄՆ–ն, որովհետև այնպես է ստացվել, որ տարածաշրջանային գործընթացները շղթայական փոխկապակցվածության տրամաբանություն են ձեռք բերել հատկապես Ռուսաստանի և Թուրքիայի ներգրավվածությամբ տարբեր խնդիրներում։
©
Sputnik / Владимир Федоренко
«Ականատես ենք լինում, որ մի հակամարտության գոտում, որտեղ այս երկու երկրները հարաբերվում են, կա շահերի զիջում, բայց մեկ այլ հակամարտության գոտում նոր ակնկալիքների դաշտ է բացվում։ Այդ առումով կարելի է Ռուսաստանի ու Թուրքիայի փոխգործակցությունը դիտարկել Սիրիայի և Արցախի հետ կապված վերջին զարգացումների համատեքստում։ Անկարան Սիրիայում զիջեց, բայց արցախյան խնդրում Ռուսաստանի հետ հասավ համաձայնության»,– նշեց արաբագետը։
Պետրոսյանի կարծիքով` Թուրքիան շատ լավ կարողանում է օգտագործել իր առավելություններն ու կարևորությունը տարածաշրջանային բոլոր աշխարհաքաղաքական դերակատարների հետ հարաբերություններում և միաժամանակ հասկանում է, որ ԱՄՆ–ի համար կարևոր երկիր է, ու օգտագործում է կարևորության հանգամանքը, զուգահեռաբար Ռուսաստանն ամեն կերպ փորձում է Թուրքիային դուրս բերել ՆԱՏՕ–ից, ուստի վերջինս իր հերթին ձգտում է օգտագործել նաև այդ հանգամանքը, աշխարհագրական դիրքը, իսկ Եվրոպայի հետ հարաբերվելիս Թուրքիան փորձում է օգտագործել սիրիացի միգրանտների հետ կապված ճգնաժամը։
«Իսկ արդեն Բայդենի վարչակազմի հետ աշխատանքների առումով Թուրքիայում, բնականաբար, արդեն իսկ լրջորեն նախապատրաստվել են և անգամ որոշակի դիրքավորում են ստանձնել։ Եթե նկատել եք, առնվազն վերջին մեկ ամսվա կտրվածքով Թուրքիան թուլացրել է իր նախկին հավակնոտ և ապակայունացնող դերակատարումը գրեթե բոլոր հակամարտային գոտիներում, փոխել է հռետորաբանությունը Հայաստանի նկատմամբ և խոսում է սահմանները բացելու, համատեղ ձևաչափեր ստեղծելու մասին»,– նշեց արաբագետը։
Պետրոսյանի գնահատմամբ` Թուրքիան փորձում է դրական, կառուցողական միջավայր ձևավորել, որպեսզի այդ հիմքերի վրա սկսի բանակցություններն ու հետագա աշխատանքներն ԱՄՆ–ի հետ, բայց չպետք է մոռանալ, որ Էրդողանի կառավարության քայլերը մեծ հաշվով կրում են կարճաժամկետ, իմիտացիոն բնույթ։
Անկարա-Բաքու-Իսլամաբադ եռյակ. պատահակա՞ն է զորավարժությունների վայրի ընտրությունը ՀՀ-ի մոտ
Կրկին երկրաշարժ է եղել. Վայոց Ձորի և Սյունիքի մարզերում այն զգացվել է 3-4 բալ ուժգնությամբ
(Թարմացված է 18:58 23.01.2021)
Էպիկենտրոնային գոտում ստորգետնյա ցնցման ուժգնությունը կազմել է 5-6 բալ:
ԵՐԵՎԱՆ, 23 հունվարի – Sputnik. ՀՀ արտակարգ իրավիճակների նախարարությունը տեղեկացնում է, որ այսօր Նախիջևան քաղաքից 34 կմ դեպի հյուսիս-արևելք երկրաշարժ է տեղի ունեցել, որը զգացվել է նաև Վայոց Ձորի և Սյունիքի մարզերում։
©
Photo : Matt Katzenberger
«Հունվարի 23-ին` տեղական ժամանակով ժամը 17:22-ին, գրանցվել է երկրաշարժ հյուսիսային լայնության 39.50⁰ և արևելյան երկայնության 45.56⁰ աշխարհագրական կոորդինատներով՝ Նախիջևան-Հայաստան սահմանային գոտում` Նախիջևան քաղաքից 34 կմ հյուսիս-արևելք։ Օջախի խորությունը եղել է 10 կմ, այն 4.3 մագնիտուդ ուժգնության է եղել»,–նշված է հաղորդագրության մեջ։
Էպիկենտրոնային գոտում ստորգետնյա ցնցման ուժգնությունը կազմել է 5-6 բալ:
Երկրաշարժը զգացվել է Վայոց Ձորի մարզի Եղեգնաձոր և Վայք քաղաքներում՝ 3-4 բալ և Սյունիքի մարզի Գորայք գյուղում՝ 3 բալ ուժգնությամբ:
Հիշեցնենք` նույն տարածքում երկրաշարժ էր գրանցվել նաև հունվարի 18–ին և 22–ին։