Սասուն Բաղդասարյանի դիտարկմամբ` հանցագործություններ կատարվում են ամեն օր, պարզապես վերջին դեպքերն աղմկահարույց էին։ Ըստ նրա` ոստիկանությունում կատարվող բարեփոխումների հիմքում առաջնահերթ դիրքեր պետք է ունենան հենց ոստիկանության աշխատաոճն ու գործելակերպի փոփոխությունները, ինչպես նաև դրան պետք է զուգակցվի հասարակության վստահության բարձրացումը։
«Գիտակցելով մեր ազգային առանձնահատկությունները, հասարակության ներսում առկա արժեհամակարգն ու քրեական ենթամշակույթի գործոնը` նշենք, որ մեր կաղապարված հասարակության պարագայում ոստիկանության բարեփոխումները ձեռնարկված են ճիշտ ժամանակին և պայմանավորված են ոչ միայն տեղի ունեցած աղմկահարույց դեպքերով, այլև մեր արժեհամակարգով։ Որոշ դեպքերում ոստիկանության կողմից ուժի չկիրառումը գալիս է կաղապարված մտածելակերպից»,– նշում է համալսարանի իրավաբանական վարչության պետը։
Բաղդասարյանի խոսքով՝ ոստիկանության բարեփոխումների առաջնահերթ խնդիրներից մեկը հենց հանցագործությունների արդյունավետ կանխարգելմանն է վերաբերում։
«Ներկայիս ոստիկանությունը կենտրոնացված համակարգ է, և նրա խնդիրների մեջ մտնում է հանցագործությունների բացահայտումը, մարդկանց իրավունքների պաշտպանությունը, իրավապահ գործունեությունը։ Գավառում տեղի ունեցած դեպքերը վկայում են, որ ոստիկանության բարեփոխումները պետք է տանել վերոհիշյալ ուղղությամբ»,– ասում է իրավաբանը։
Բաղդասարյանի համոզմամբ` հանցագործությունների արդյունավետ կանխարգելումը պայմանավորված կլինի նաև արհեստավարժ և մասնագիտացած ոստիկանություն ունենալու հանգամանքով, որովհետև մեր փոքրածավալ հասարակությունում, հատկապես մարզերում գործող ոստիկանական ծառայությունների աշխատակիցներն ինչ–ինչ պատճառներով երբեմն չեն դիմում ուժի կիրառման, ինչի դրդապատճառները թե՛ սոցիալական են, թե՛ կենցաղային, թե հարազատ–բարեկամական։
Գավառի սպանությունների կադրերը՝ առանց մոնտաժման. նոր տեսանյութ է հրապարակվել
Իրավաբանի տեղեկացմամբ` հանցագործությունները շատանում են այն ժամանակ, երբ վատթարանում է մարդկանց սոցիալ–տնտեսական վիճակը, հետևաբար նման պայմաններում շատ կարևոր է, թե ինչ մակարդակում է գտնվում ներիրավական մշակույթն ու իրավաընկալումը, և ինչ իրավագիտակցական մակարդակ ունի քաղաքացին։
Հիշեցնենք` ապրիլի 28-ին հայտնի դարձավ, որ Գավառում հնչած կրակոցների հետևանքով 2 մարդ է մահացել, իսկ 6–ին տեղափոխել են քաղաքի հիվանդանոց։ Ավելի ուշ տեղեկություն տարածվեց, որ մի խումբ մարդիկ ներխուժել են բուժկենտրոն ու փորձել են սպանել տուժածներից երկուսին։ Նշվում էր նաև, որ այդ ժամանակ հիվանդանոցում ոչ միայն ոստիկաններ են եղել, այլ նաև ՀՀ ոստիկանապետ Արման Սարգսյանը։ Այսօր, սակայն, ոստիկանության լրատվության և հասարակայնության հետ կապերի վարչության պետ Աշոտ Ահարոնյանը հայտարարեց, որ ոստիկանապետը տեղում չի եղել, իսկ հիվանդանոցում որևէ մեկին չեն սպանել։
Քննչական կոմիտեում դեպքի առթիվ քրգործ է հարուցվել, արդեն 15 մարդ է ձերբակալվել։
Սպանություններից ու հարձակումից հետո ի՞նչ էր կատարվում Գավառում. լուսանկարներ
