Քաղտեխնոլոգ Վիգեն Հակոբյանի դիտարկմամբ` ՀՀ–ից հնչող արձագանքները պայմանավորված են պրագմատիզմով, այսինքն` մեր իշխանությունները հաշվի են նստում առկա իրողությունների հետ, որոնք կան Արցախում։ Ըստ նրա` ուժերի հարաբերակցությունն ի սկզբանե հուշում էր, որ Արայիկ Հարությունյանը բավականին լավ հնարավորություններ ունի։
«Արայիկ Հարությունյանը նաև փորձել է վերջին երկու տարվա ընթացքում ցուցաբերել լոյալություն ՀՀ ներկայիս իշխանությունների նկատմամբ։ Գուցե կատարվել են որոշակի աշխատանքներ, գուցե ներկայացրել է ինչ–որ ծրագրեր, ինչը ՀՀ ներկայիս իշխանությունների համար պակաս կարևոր հանգամանք չէ»,– նշում է քաղտեխնոլոգը։
Ինչ վերաբերում է արտգործնախարար Մասիս Մայիլյանին, ապա Վիգեն Հակոբյանը կարծում է, որ նա առանց ՀՀ իշխանության մի թևի աջակցության դժվար թե առաջադրվեր։ ՀՀ իշխանություններն այս ընտրություններում հանդես են եկել երկու հիմնական ֆավորիտով, և այն փաստը, որ տեղի ունեցավ երկրորդ փուլ, դա էլ ՀՀ իշխանությունների համար ձեռնտու տարբերակ էր, որովհետև նրանք էլ ինչ–որ չափով իրենց լուման ունեցան Արայիկ Հարությունյանի վերջնական հաղթանակի մեջ։
Հակոբյանի կարծիքով` եղել են քաղաքական պայմանավորվածություններ, որովհետև Արայիկ Հարությունյանը կոմպրոմիսային թեկնածու է այսօրվա ՀՀ իշխանության և Արցախի ռազմաքաղաքական էլիտայի համար։ Քաղտեխնոլոգը չի բացառում, որ Արայիկ Հարությունյանն ամենավատ թեկնածուն չէր նաև նախկինների համար։
«Արայիկ Հարությունյանն անցել է երկար քաղաքական ճանապարհ` 11 տարի լինելով վարչապետ Բակո Սահակյանի պաշտոնավարման ընթացքում, ունենալով սերտ կապեր նաև նախկին իշխանության տարբեր թևերի հետ։ Պարզ էր նաև, որ Արայիկ Հարությունյանը բավականին լուրջ ռեսուրսային առավելություն ուներ մնացած թեկնածուների նկատմամբ»,– նշում է քաղտեխնոլոգը։
Նրա գնահատմամբ` քանի դեռ Հայաստանի ներքաղաքական դաշտում ուժերի նման հարաբերկացություն է, դժվար թե Արայիկ Հարությունյանը ՀՀ իշխանությունների թիկունքում նախապատրաստի դավադրություններ, հետևաբար, նման խոսակցություններն անիմաստ են։
Քաղաքական հետապնդում չի լինի. Արայիկ Հարությունյանը համախմբման կոչ է անում
Քաղտեխնոլոգի համոզմամբ` մոտ ապագայում մեզ չի սպառնում նախկին իշխանությունների վերադարձը, իսկ գործող իշանության համար իրական վտանգ կարող է առաջանալ այն ժամանակ, երբ ձևավորվեն այլընտրանքային նոր ուժեր, որոնք չեն առնչվել նախկին իշխանությունների հետ։
Հիշեցնենք՝ մարտի 31–ին Արցախում կայացած նախագահական ընտրությունների առաջին փուլից հետո մրցապայքարում էին մնացել նախկին վարչապետ (պետնախարար), «Ազատ Հայրենիք» կուսակցության ղեկավար Արայիկ Հարությունյանն ու արտգործնախարար Մասիս Մայիլյանը։
Ընտրությունների առաջին փուլի արդյունքում Արայիկ Հարությունյանը ստացել էր ձայների 49,26%-ը, արտգործնախարար Մասիս Մայիլյանը՝ 26,4%-ը։
Ապրիլի 14-ին անցկացվեց ընտրությունների երկրորդ փուլը, որի արդյունքում հաղթեց Արայիկ Հարությունյանը։ Բոլոր 282 ընտրատեղամասերի քվեաթերթիկների մշակման արդյունքում Հարությունյանի օգտին քվեարկել է 39 860 մարդ, Մայիլյանի օգտին ՝ 5 428:
Արցախում նախագահ է ընտրվել Արայիկ Հարությունյանը. Սարգսյանն արդեն շնորհավորել է
