Կրթական հարցերով փորձագետ Սերոբ Խաչատրյանի դիտարկմամբ՝ այն դպրոցները, որոնք հնարավորություն ունեին անցնելու հեռավար ուսուցման, միանգամից գնացին այդ քայլին։ Ըստ Խաչատրյանի` այժմ հարյուրավոր ուսուցիչներ օգտագործում են հեռավար տարբեր հարթակներ, ինչի արդյունքում մեր կրթական համակարգը հայտնվելու է թվային գրագիտության ավելի բարձր մակարդակում։
«Բայց այստեղ կա խնդիր` կապված պետական ծրագրի հետ, որը պետք է իրականացվի։ Քանի որ ուսումնական տարին մոտենում է ավարտին, բացը լրացնելու տեղ շատ չունենք։ Առաջ է գալու քննությունների խնդիրը, զորակոչի հարցը, ընտանքիների ամառային մեկնումների հետ կապված խնդիրը։ Բացի այդ, հեռավար ուսուցումը տեխնիկապես ոչ բոլորին է հասանելի, կազմակերպված ձևով միասնական հարթակ չկա, հետևաբար շատ երեխաներ, ովքեր չունեն համակարգիչ, սմարթֆոն, կամ էլ ուսուցիչը չունի հեռավար դասընթաց վարելու հմտություն, ապա նրանք մեկ ամիս կհայտնվեն բարձիթողի վիճակում»,– Sputnik Արմենիայի հետ զրույցում ասաց նա։
Խաչատրյանի համոզմամբ` ստեղծված իրավիճակում միակ հարթակը, որն ունի հասանելիության ամենամեծ տոկոսը, բյուջեի հաշվին աշխատող հանրային հեռուստաալիքն է։ Որպեսզի ուսուցումը հասանելի լինի առավելագույն թվով աշակերտների համար, պետք է օգտագործել «Հ 1»–ի եթերը։
Ըստ փորձագետի՝ բոլորն էլ տանն ունեն հեռուստացույց, շատերն էլ հանրայինին կարող են հետևել ինտերնետային տարբերակով, հետևաբար, Հանրային հեռուստաընկերությունը պետք է վերածվի համազգային հեռուստադպրոցի։
Օրվա կադր. Արայիկ Հարությունյանը թույլ չի տա` «հանգիստ նստեն տեղները»
«Պետք է կազմել համազգային դասացուցակ, օրը բաժանել առանձին ժամերի։ Օրինակ` առաջին դասարանցիները կարող են հեռուստացույցի դիմաց նստել 10–ից 11–ն ընկած ժամանակահատվածում` ստանալով իրենց առաջադրանքները և անհրաժեշտության դեպքում լսեն ուսուցիչների բացատրությունները, եթե խոսքն առնչվում է մաթեմատիկական, բնագիտական կամ լեզուների հետ կապված խնդիրներին։ Այսպես հնարավորություն կունենանք յուրաքանչյուր դասարանին տրամադրել մեկական ժամ` գոնե պետական ծրագիրը նրանց հասանելի դարձնելու համար»,– նշեց կրթական հարցերով փորձագետը։
Ուսումնական տարվա ավարտը կհետաձգվի՞. պատասխանում է նախարարը
Խաչատրյանը թեև կարծում է, որ «Հ 1»–ի համար կարող են առաջանալ դժվարություններ, սակայն հեռուստաալիքը կարող է պետբյուջեից ստանալ հավելյալ աջակցություն, հակառակ դեպքում հասանելիության առումով ուրիշ տարբերակ չկա։ Ըստ նրա`թեև հեռավար ուսուցումը շատ լավ երևույթ է, սակայն այդ գործընթացը լինելու է հախուռն, անկազմակերպ ու անհամաչափ։
