Արամ Սարգսյանի կարծիքով՝ պատահական չէր, որ Սերգեյ Լավրովը հենց այս օրերին եկավ Հայաստան, որովհետև իրադարձությունները տարածաշրջանում շատ բուռն են զարգանում, և պետք է զուգահեռներ անցկացնել Սիրիայում Թուրքիայի կատարած գործողությունների հետ: Sputnik Արմենիայի հետ զրույցում այս մասին ասաց ՀԴԿ նախագահ Արամ Սարգսյանը։
Սարգսյանի կարծիքով` Սերգեյ Լավրովը Երևանում փարատեց այն մտավախությունները, որոնք կային հայ հանրության շրջանում հատկապես Թուրքիա-Ռուսաստան համագործակցության առթիվ:
«Մեր բարեկամության հիմքերը շատ ուժեղ են». Մնացականյանը` Լավրովի հայստանյան այցի մասին
Երկրորդ կարևոր հանգամանքն այն է, որ արցախյան խնդրի կարգավորման վերաբերյալ Լավրովը հնչեցրեց կարևոր հայտարարություն, ըստ որի՝ առանց Լեռնային Ղարաբաղի ժողովրդի համաձայնության` որևէ որոշում ընդունվել չի կարող: Սարգսյանի դիտարկմամբ՝ սա շատ սկզբունքային դիրքորոշում է ու կարևորագույն հարցադրում, ինչը մեզ պետք է պարտադրի այս ուղղությամբ շարունակել մեր քաղաքական գիծը:
«Լավրովը ևս մեկ անգամ շեշտը դրեց նրա վրա, որ հայ-ռուսական հարաբերությունները զարգանում են շատ դինամիկ, ինչը նույնպես կարևոր է, որովհետև այստեղ ռուսաֆոբ ուժերը փորձում են իրենց հաճո հայտարարություններ ու տրամադրություններ ներարկել հատկապես երիտասարդների ուղեղներում, հետևաբար, կարևոր է, թե ինչ հիմունքներով ու ինչպես են զարգանալու հայ-ռուսական հարաբերությունները: Մենք դաշնակիցներ ենք և պետք է ունենանք շատ վստահելի հարաբերություններ բարեկամ երկրի հետ»,-նշում է ՀԴԿ նախագահը:
Անդրադառնալով ռուսական լրատվամիջոցներում և փորձագիտական շրջանակներում հաճախ հանդիպող դատողություններին առ այն, որ Ռուսաստանի ղեկավարությունը որոշակի անվստահությամբ է վերաբերվում Հայաստանի նոր իշխանություններին, Արամ Սարգսյանը նշում է, որ անհանգստությունները չի կարելի համարել անցյալում մնացած, որովհետև մեր երկրում, ցավոք սրտի, տեղի են ունենում այնպիսի իրադարձություններ, որոնք դեռ թույլ չեն տալիս վստահաբար ասել, որ անհանգստությունները մնացել են անցյալում:
Ինքնագրեր, լուսանկարներ և նամակներ. Երևանի ուսանողները Լավրովին ռոք աստղի նման դիմավորեցին
Արամ Սարգսյանի համոզմամբ՝ շատ կարևոր է այն հանգամանքը, թե հատկապես երիտասարդության շրջանում ում և ինչպիսի ուժերի կողմից ինչպիսի վերաբերմունք է ձևավորվում Ռուսաստանի նկատմամբ:
