Թուրքիայի նախագահ Ռեյեփ Թայիփ Էրդողանն իհարկե կտրուկ հայտարարություններ անում է, սակայն կա տարբերություն թուրքական քաղաքական, քարոզչական մեքենայի ու նախագահի միջև: Քարոզչամեքենան երբեմն նախապատրաստում է մի քայլ, իսկ Էրդողանն իր հայտարարությամբ ձախողում է այդ ամենը կամ էլ ձգտում է իրեն հարմարեցնել ամբողջ քարոզչամեքենան: Sputnik Արմենիայի հետ զրույցում այս մասին ասաց Թուրքագետ Ռուբեն Մելքոնյանը։
«Էրդողանն, օրինակ, հայտարարեց, որ չի ճանաչում Սիրիայի տարածքային ամբողջականությունը, սակայն Սոչիում ստորագրեց հակառակն ապացուցող փաստաթուղթ: Նույնը տեղի ունեցավ նաև ռուսական ինքնաթիռի խոցման պարագայում, երբ սկզբում հանդես եկավ հակառուսական հայտարարություններով, իսկ հետո Պուտինին դիմում էր «թանկագին ընկեր» ձևակերպմամբ»,-նշում է Ռուբեն Մելքոնյանը:
Թուրքագետի կարծիքով՝ Էրդողանն իր անձնական նկրտումներով, ու թուրքական պետության քաղաքական, քարոզչական մեքենան հայտնվել են տարբեր կողմերում: Այդուհանդերձ, ԱՄՆ-ն Թուրքիայի քաղաքականության ու հասարակական ընկալման մեջ դեռ շարունակում է պահպանել իր մի փոքր խորհրդավոր դերը, քանի որ դա ունի նաև խորքային ընկալումներ: Թուրքիան որպես ԱՄՆ-ի դաշնակից այլ երկիր է. ոչ որպես դաշնակից, մեկ այլ երկիր է:
Հիմա էրդողանը ցանկանում է փոխել այդ իմիջը, այսինքն` լինել դաշնակից, բայց ավելի հավասար հարթության վրա:
«Էրդողանը նաև մեսիջ է հղում ԱՄՆ-ին, ցույց տալով, որ տարածաշրջանային խնդիրները նախևառաջ պետք է լուծեն տեղի երկրները՝ Թուրքիան, Ռուսաստանն ու Իրանը: Եթե առաջ Թուրքիան այդ հարցերում ընկալվում էր որպես ԱՄՆ-ի խոսնակ կամ ժանդարմ, ապա այժմ ձգտում է լինել ինքնուրույն խաղացող»,-ասում է Ռուբեն Մելքոնյանը:
«Հայերը մեզ խանգարում են». Արգենտինայում Թուրքիայի դեսպանի մոտ սրվել է «օսմանյան ալերգիան»
Թուրքագետի ընկալմամբ՝ խնդիրն ունի տարբեր ասպեկտներ, բայցևայնպես, Թրամփի ու Էրդողանի հանդիպումը կայանալու է, որտեղ Էրդողանը կփորձի հակադարձել նաև Կոնգրեսի կողմից Հայոց ցեղասպանությունը ճանաչող բանաձևի ընդունմանը, ինչը Թուրքիայում կօգտագործեն Էրդողանի իմիջն ամրապնդելու համար:
