ՀՀ բնապահպանության նախարարության «Դիլիջան» ազգային պարկի տնօրեն Սուրեն Աղաջանյանը Sputnik Արմենիայի հետ զրւյցում անդրադարձել է պարկում եղջերուների էնդեմիկ տեսակի բազմացման խնդրին ու նշել, որ տարիներ առաջ ազնվացեղ եղջերուներ նշված տարածքում եղել են, սակայն 1990-ական թվականներից հետո անտառից վերացան:
«Նրանց քանակը կարելի էր հաշվել հազարներով: 1967 թվականին եղջերուները Ռուսաստանի Խաբարովսկի շրջանից տեղափոխվել էին Դիլիջանի արգելոց, որտեղ բազմացման համար կային բարենպաստ պայմաններ: Կենդանիները որոշ ժամանակ անց շատացան, նրանց կարելի էր խմբերով հանդիպել նույնիսկ ամեն քայլի»,- ասաց նա:
Աղաջանյանի խոսքով` վերջին տաս տարում մեզ մոտ եղջերուներ չեն նկատվում:
«Վերացման պատճառը հիմնականում որսագողությունն է: Նախկինում գրանցվում էին որսագողության շատ-շատ դեպքեր»,- նշեց Աղաջանյանը:
Ենոքյան. «Տարիներ շարունակ ասում էինք այդ մասին, բայց լսող չկար»
Նրա փոխանցմամբ՝ միջազգային բնապահպանական կառույցները հովանավորեցին եղջերուների էնդեմիկ տեսակի վերականգնման ծրագիրը, ինչը մեծ քայլ է: Ծրագրով ութ եղջերու տեղափոխեցին արգելոց և հիմա նրանց թիվը դարձել է տասնմեկ: Հաջորդ տարի ակնկալվում է ևս հինգ ձագի ծնունդ: Նրանց կտեղափոխեն 9 հեկտարի չափով նոր տարածք, որտեղ նրանք մարդկանց հետ շփում չեն ունենա:
«Թեղուտի» հարցն օրակարգում է. բուլղարացիները նոր հետազոտություն կանեն
Աղաջանյանը համոզված է, որ կարճ ժամանակ անց էնդեմիկ եղջերուների տեսակը Դիլիջանի անտառներում կվերականգնվի: Նրան ուրախացնում է նաև այն, որ արգելոցում տարեցտարի ավելանում է այցելուների, զբոսաշրջիկների հոսքը:
