Ռոբերտ Քոչարյանի պաշտպանական խմբի անդամ Արամ Վարդևանյանը Sputnik Արմենիայի հետ զրույցում անդրադարձել է Հրայր Թովմասյանի լիազորությունները դադարեցնելու հարցով ՍԴ դիմելու մասին ԱԺ որոշման նախագծին`շեշտելով, թե այնպես է ստացվել, որ այդ նախագծում նշված է նաև իր անունը՝ այնքանով, որ Սահմանադրական դատարանում դատավարության կողմ, տվյալ դեպքում՝ դիմողի ներկայացուցիչ՝ եղել է ինքը: Եվ այդպես է 2019 թվականի հունվարից:
«Առաջին դիմումը ՍԴ՝ ես եմ ներկայացրել: Բոլոր որոշումներն էլ հրապարակված են: Բայց, ամեն դեպքում, փորձ է արվում փոխկապակցվածություն դիտարկել ոչ թե Արամ Վարդևանյանի հետ, որովհետև բոլորին էլ հայտնի է, որ ՍԴ անդամներից որևէ մեկի հետ քավոր-սանիկական կապ չունեմ, այլ հարցն առնչվում է Արամ Օրբելյանին: Թեև ես ստորագրել եմ, բայցև ես ներկայացուցիչ չեմ: Մեկնաբանվում է այնպես, որ եթե Արամ Օրբելյանը որոշակի հայտարարություններ է արել, օրինակ, դիմումի վերաբերյալ, ուրեմն նա էլ է դատավարության կողմ, ինչն ակնհայտորեն չի համապատասխանում իրականությանը: Դիմումի ներկայացուցիչ և դատավարության կողմ հանդիսացել եմ ես, և դա հանրությանը բավականաչափ հայտնի փաստ է»,-նշում է Արամ Վարդևանյանը:
«Դատախազությունը չի ցանկանում տեսնել պարզ ճշմարտությունը». Արամ Վարդևանյան
Նրա փոխանցմամբ՝ իր պարագայում ներկայացվում է նաև նախկինում քաղաքական փոխկապակցվածություն Հրայր Թովմասյանի հետ: Ըստ նրա՝ հարցը պետք է քննել սահմանադրության լույսի ներքո: Արդյո՞ք Սահմանադրությունը և օրենսդրությունը թույլատրում են անձին, նախկինում նման գործունեության փորձ ունենալով հանդերձ, առաջադրվել, այնուհետև ընտրվել ՍԴ դատավոր: Վարդևանյանը համոզված է, որ թույլատրում են, և հենց սրանով էլ հարցի պատասխանը տրվում է:
Արամ Վարդևանյանը կարծում է, որ նույն կերպ պետք է մոտենալ նաև Վահե Գրիգորյանին:
«Իմ քայլը» Հրայր Թովմասյանի լիազորությունները դադարեցնելու գործընթաց է սկսել
Արամ Վարդևանյանի համոզմամբ՝ Հրայր Թովմասյանի դեպքում ՍԴ մասին օրենքով նախատեսված կարգապահական պատասխանատվության հիմքերի տեսանկյունից, նույնիսկ նկատողության համար սահմանված ապացուցման շեմը չի հաղթահարվում, էլ չենք կարող խոսել էական կարգավարական խախտման մասին:
