Թևան Պողոսյանի կարծիքով` Հայաստանի Հանրապետության անկախության 28 տարիներից ամեն տարին էլ ձեռքբերում է։
«Ունենք մեծացած Հայաստան, որովհետև ունենք և՛ Հայաստանի Հանրապետություն, և՛Արցախի, իսկ դա միասնական Հայաստանն է։ Ունենք գիտակցությունը, որ այս խնդիրները տանելու ենք առաջ, ու բոլորս ենք դա անելու։ Ունենք տարբեր ճյուղերում որոշ զարգացումներ, կարելի է դրանք տարբեր կերպ գնահատել։ Ունենք երկիր, որը փորձում է զարկ տալ ու զարգացնել ժողովրդավարական ինստիտուտները։ Ունենք, մարդիկ, որոնք հպարտանում են ՀՀ քաղաքացի լինելով, ունենք սփյուռք, որը հպարտանում, որ կա Հայաստանի Հանրապետությունը։ Այս ամենը ձեռքբերումներն են»,-փաստում է Թևան Պողոսյանը։
Ինչ վերաբերում է բացթողումներին, ապա Պողոսյանի խոսքով, կարելի է հազար ու մի բան թվարկել, որ ա՛յ կցանկանայինք, որ այսպես լիներ, բայց չենք հասել դրան։
«Ամեն մարդ իր համար իր երազածն է նկարագրում։ Այդուհանդերձ, կա Հայաստանի Հանրապետություն, որը 28 տարեկան է, և լինելու է հավերժ։ Իսկ բացթողումների վրա ուղղակի պետք է աշխատել»,-ասում է Պողոսյանը։
Ինչ վերաբերում է հարցին, թե որքանով կարող են ներկա իրավաքաղաքական գործընթացները ստվերել անկախության տոնի հերթական տարեդարձը, երբ քրեական հետապնդում է իրականացվում ՀՀ-ի անկախության ակունքներում կանգնած գործիչների նկատմամբ, Թևան Պողոսյանն ասաց, որ 1991 թվականից ի վեր եղել են դեպքեր, երբ երկրում քաղաքական լարվածություն է եղել։
«Երևի չի եղել այդպիսի մի տարի` 1991 թվականից ի վեր, որ տարբեր մարդիկ չեն նկարագրել իրավիճակներ, որ հետապնդվում են քաղաքական նպատակներով, և այդպես կարելի է թվարկել մինչև այսօր։ Խնդիրն այն է, որ մենք նշում ենք, որ անցած 28 տարիների ընթացքում եղել են այդպիսի երևույթներ, բայց դրանք հաղթահարելով պետք է առաջ շարժվենք»,-փաստում է Մարդկային զարգացման միջազգային կենտրոնի ղեկավարը։
Պողոսյանն ասում է, որ շատ է երազում այն օրվա մասին, երբ կարձանագրենք, որ այլևս նման բան չկա։
