Նիկոլայ Բաղդասարյան

Բաղդասարյան. «ՃՈ ակտերի բողոքարկման նոր կարգից կշահեն և՛ վարորդները, և՛ պետությունը»

111
(Թարմացված է 13:30 18.09.2019)
Խորհրդարանն առաջին ընթերցմամբ քննարկեց «Իմ քայլը» խմբակցության պատգամավոր Նիկոլայ Բաղդասարյանի հեղինակած օրինագծերը՝ վարչական իրավախախտումների վերաբերյալ օրենսգրքում փոփոխություններ կատարելու մասին: Ինչի՞ մասին է խոսքը:
Բաղդասարյան. «ՃՈ ակտերի բողոքարկման նոր կարգից կշահեն և վարորդները, և պետությունը»

Պատգամավոր Նիկոլայ Բաղդասարյանը Sputnik Արմենիայի հետ զրույցում հստակեցրեց, որ նախագիծը հիմնականում վերաբերում է երթևեկության կանոնների խախտման դեպքերի հետ կապված ճանապարհային ոստիկանության կողմից ընդունվող ակտերի վիճարկմանը: Ըստ էության, առաջարկվում է որոշակիորեն վերանայել ակտերի բողոքարկման գործող կարգն ու ընթացակարգերը, ինչի հետևանքով, ըստ օրինագծի հեղինակի, կբարձրանա այդ գործընթացի արդյունավետությունը, զուգահեռաբար նկատելիորեն կնվազի Վարչական դատարանի ծանրաբեռնվածությունը:

«Մենք ավելացնում ենք «ֆիլտր», որի արդյունքում կմաղվեն պրիմիտիվ բողոքները, էլ կարիք չի լինի դրա համար հասնել դատարան»,-նշում է պատգամավորն ու բացատրում, որ ավելացվող «ֆիլտրը» վարչական վերադասության մարմինն է լինելու, յուրօրինակ հաշտարար ատյան, որտեղ պարտավոր կլինեն դիմել բոլոր այն քաղաքացիները, ովքեր համաձայն չեն և վիճարկում են ՃՈ կազմած վարչական իրավախախտման ակտը: Զրուցակցի գնահատմամբ, որոշակի քանակությամբ բողոքներ այդ հարթության վրա արդեն լուծում կստանան, և Վարչական դատարանի ծանրաբեռնվածության մեջ նման «ակտային» գործերը մոտ 30 տոկոսով կնվազեն՝ ներկայում եղածի համեմատ:

«Պետությունն է շահում, որովհետև 2000 դրամ ակտը վիճարկելիս միջինը ծախսում էր 38 հազար դրամ, այսինքն՝ դա էլ չի կորցնի, և 150-160 միլիոն դրամ տնտեսելու հնարավորություն է ստեղծվում: Իսկ վարորդը կշահի, որովհետև իր գործը շատ արագ կքննվի. երաշխավորված 15 օրվա  ընթացքում նա իր հարցին այո կամ ոչ պատասխանը կստանա»,– ասում է Նիկոլայ Բաղդասարյանը:

Առաջարկվող նոր կարգը կարող է գործել արդեն եկող տարվա սկզբից, եթե ԱԺ-ն աշնանային նստաշրջանում ներկայացված օրինագծերն ընդունի: Պատգամավորի ունեցած տվյալներով` խոսքը վերաբերում է Վարչական դատարան դիմողների մոտ 55 տոկոսին կամ շուրջ 7000 անձի:

Ի դեպ, զրույցի ընթացքում տեղեկացանք, որ պատգամավորը հետաքրքրված է նաև ոչ խոշոր պատահարների դեպքում իրավիճակն արագ հարթելու, խցանում չառաջացնելու խնդրով և գործնական լուծում է փնտրում: 

 

111
թեգերը:
ավտովթար, Նիկոլայ Բաղդասարյան, ԱԺ, ՀՀ Ոստիկանություն, Հայաստան
Сероб Хачатрян

Դպրոցները նախ պետք է բացվեն 1-4-րդ դասարանցիների համար. Խաչատրյանը տարբերակ է առաջարկում

1
(Թարմացված է 18:15 15.08.2020)
Կրթության հարցերի փորձագետ Սերոբ Խաչատրյանը կողմ է հանրակրթական դպրոցների փուլային բացման տարբերակին։
Խաչատրյան. «Դասարանների տրոհման դեպքում պետք է ավելացնել ուսուցիչների աշխատավարձը»

Սերոբ Խաչատրյանի կարծիքով` սեպտեմբերին դպրոցները նախ պետք է բացվեն առաջինից չորրորդ դասարանցիների համար, ինչպես նաև գյուղական վայրերի այն դպրոցները, որոնք ունեն մինչև 200 աշակերտ։ Ըստ նրա` պետք է երկշաբաթյա ժամկետում հետևել գործընթացին, և եթե ամեն ինչ բարվոք ընթանա, հետո կարելի է բացել նաև մյուս դասարանները։

«Նման տարբերակի դեպքում դպրոցներում ծանրաբեռնվածություն չի առաջանա, մի փոքր պրակտիկան ցույց կտա, թե ինչի կարիք կա, ինչը պետք է փոխել, այսինքն`անհրաժեշտ է գործարկել դպրոցների աստիճանական բացման տարբերակը։ Սովորաբար օրենքներն ընդունում են ու դրանք տարածում բոլոր դպրոցների վրա, մինչդեռ կան ավելի խելամիտ մոտեցումներ։ Ըստ հետազոտության արդյունքների` մինչև 10 տարեկան երեխաները շատ թեթև են տարածում վիրուսը, թեև տարակարծություններ այդ հարցում էլ կան»,– Sputnik Արմենիային ասաց փորձագետը։

Խաչատրյանի դիտարկմամբ` սեպտեմբերին դպրոցները բացելու դեպքում ռիսկերն ու խնդիրները շատ–շատ են։ Նա կարևորում է նախ դպրոցների սանիտարահիգիենիկ վիճակը, որովհետև կան տասնյակ դպրոցներ, որտեղ ջուր չկա, սանհանգույցները վատ վիճակում են։ Երկրորդ խնդիրը կապված է որոշ դպրոցների շենքային պայմանների հետ, քանի որ դրանք կիսափուլ վիճակում են ու կեղտոտ, և շատ դժվար է այնտեղ ապահովել նորմալ պայմաններ։ Երրորդ խնդիրն էլ այն է, որ պետբյուջեից պետք է առանձնացվեն կլորիկ գումարներ, եթե դպրոցներում նախատեսվում է դասարանների տրոհում, և այդ դեպքում ավելանալու է ուսուցիչների դասաժամերը, հետևաբար անհրաժեշտ է ավելացնել ուսուցիչների աշխատավարձը։

«Իսկ ինչ է լինելու այն դեպքում, եթե ուսուցիչներն այլ ծանրաբեռնվածության, երկրորդ աշխատանքի պատճառով չկարողանան ավելի շատ ժամեր անցկացնել դպրոցում, կգտնվե՞ն նրանց փոխարինող մասնագետներ։ Կամ ասում են, որ օրինակ ֆիզկուլտուրայի ժամեր չեն լինելու, այդ դեպքում ինչպե՞ս պետք է վարվեն այդ մասնագետների հետ»,– նշում է փորձագետը։

Խաչատրյանն ուշադրություն է դարձնում այն հանգամանքին, որ Հայաստանում կա 72 երկհերթ և 4 եռահերթ դպրոց, հետևաբար հարց է ծագում` ինչպե՞ս է դրանցում իրականացվելու տրոհումը, քանի որ առաջանալու է տարածքի լուրջ խնդիր, այսինքն` պրոբլեմն առնչվում է ոչ միայն աշակերտների թվաքանակին, այլև շենքային հնարավորություններին։

Հիշեցնենք` ՀՀ կրթության, գիտության, մշակույթի և սպորտի նախարար Արայիկ Հարությունյանն օգոստոսի 10-ին հայտնեց, որ սեպտեմբերի 15-ից դասերը կվերսկսվեն հանրակրթական դպրոցներում, նախնական և միջին մասնագիտական հաստատություններում, երաժշտական, արվեստի, գեղարվեստի դպրոցներում՝ առկա ուսուցմամբ և սանիտարահիգիենիկ կանոնների պահպանմամբ։

1
թեգերը:
Սերոբ Խաչատրյան, Հայաստան
Լևոն Աբրահամյան

Մրցավազքը 6 երկիր է գլխավորում. հայ պրոֆեսորը` կորոնավիրուսի դեմ պատվաստանյութերի մասին

131
(Թարմացված է 15:44 15.08.2020)
Մոնրեալի համալսարանի վարակաբանության պրոֆեսոր Լևոն Աբրահամյանը Sputnik Արմենիայի եթերում խոսել է Ռուսաստանի Դաշնությունում, Իսրայելում և ԱՄՆ–ում ստեղծված պատվաստանյութերի ու դրանց կիրառելիության մասին։
Աբրահամյան. «COVID 19-ի դեմ 170 պատվաստանյութից միայն 8-ն է գտնվում ուսումնասիրման վերջին փուլում»

Լևոն Աբրահամյանի տեղեկացմամբ` մի շարք երկրներ միացել են Covid-19-ի դեմ արդյունավետ դեղամիջոց պատրաստելու մրցավազքին, որը գլխավորում են ՌԴ–ն, Չինաստանը, ԱՄՆ–ն, Իսրայելը, Ֆրանսիան ու Գերմանիան։ Ըստ նրա`այժմ գոյություն ունի պատվաստանյութի շուրջ 170 տարբերակ, որոնք հիմնականում գտնվում են կլինիկական ուսումնասիրության փուլում, դրանցից 130–ը գնահատման նախնական փուլում են։

«Պատվաստանյութի ուսումնասիրության գործընթացը սովորաբար ամիսներ է տևում։ Առաջին փուլում փորձարկումները կատարվում են 30-40 կամավորների վրա, երկրորդ փուլն ընդգրկում է 100-300 մարդ, իսկ երրորդ փուլում կատարվում է արդեն զանգվածային փորձարկում`ընդգրկելով ավելի քան 3000 կամավոր անկախ տարիքային ու սեռային պատկանելությունից։ Այս պահին միայն 8 պատվաստանյութ է գտնվում ուսումնասիրության վերջնական փուլում, որոնցից միայն երկուսն ունեն պետական մասնակի գրանցում, մեկը չինականն է, մյուսը` ռուսականը»,– նշում է վարակաբանության պրոֆեսորը։

Աբրահամյանի խոսքով` կորոնավիրուսի դեմ պատվաստանյութերի գրանցումը նշվում է որպես արտակարգ իրավիճակի գրանցում և նախատեսված է սահմանափակ օգտագործման համար, այսինքն` կիրառվում են միայն ծայրահեղ դեպքերում և հատուկ խմբի մարդկանց համար են։ Ըստ պրոֆեսորի`օրինակ չինական պատվաստանյութը նախատեսված է կիրառել բանակում, հետո նոր հասարակության այլ խավերում, իսկ ռուսական պատվաստանյութը, ըստ պետական հավաստագրի, նախատեսված է 18-65 տարեկան մարդկանց համար։

Հիշեցնենք՝ ՌԴ նախագահ Վլադիմիր Պուտինը օգոստոսի 11-ին ՌԴ կառավարության անդամների հետ խորհրդակցության ժամանակ հայտարարել էր, որ Ռուսաստանում գրանցվել է կորոնավիրուսի դեմ առաջին պատվաստանյութը։ ՌԴ նախագահի խոսքով՝ Ռուսաստանը COVID-19-ի դեմ պատվաստանյութ գրանցած առաջին երկիրն է։ Պատվաստանյութը բավականաչափ արդյունավետ է, ձևավորում է կայուն դիմադրողականություն և անցել է բոլոր անհրաժեշտ փորձարկումները։

Կորոնավիրուսի դեմ պայքարի օպերատիվ շտաբը հայտնել է, որ կորոնավիրուսի դեմ ռուսական պատվաստանյութը քաղաքացիական շրջանառության մեջ կմտնի 2021 թվականի հունվարի 1-ին։ Այն կոչվել է «Սպուտնիկ V»։

Առողջապահության համաշխարհային կազմակերպությունն էլ հայտարարել է, որ ողջունում է նոր կորոնավիրուսի դեմ պատրաստուկների հետազոտությունների ու մշակումների ոլորտի բոլոր ձեռքբերումները և մտադիր է ստուգել ռուսական պատվաստանյութի փորձարկումների տվյալները:

ԱՀԿ-ն ուզում է համոզվել, որ պատվաստանյութի հետազոտությունն իրականացվել է սահմանված ընթացակարգերին համապատասխան։ Կազմակերպությունը պատրաստ է գնահատել դեղի անվտանգությունն ու արդյունավետությունը: Դրա հետ մեկտեղ ԱՀԿ-ի մասնագետները շփման մեջ են ռուսաստանցի գիտնականների հետ:

131
թեգերը:
Լևոն Աբրահամյան (Մոնրեալի համալսարանի (Université de Montréal) վարակաբանության պրոֆեսոր), պատվաստանյութ, կորոնավիրուս
Ըստ թեմայի
Ռուսաստանում կորոնավիրուսի դեմ պատվաստանյութն առաջինը կստանան բժիշկներն ու տարեց մարդիկ
Ո՞ր երկրներն են Covid-19–ի դեմ պատվաստանյութ մշակել
Ռուսաստանում սկսվել է կորոնավիրուսի դեմ պատվաստանյութի արտադրությունը
Թրամփին պատմել են ռուսական պատվաստանյութի մասին