Ֆինասների նախարարությունում քննարկել են ԵԱՏՄ անդամ պետությունների շրջանակում իրականացվող փոխադարձ առևտրի կազմակերպման գործընթացում անուղղակի հարկերի հաշվարկման և վճարման ընթացակարգերի պարզեցման հնարավորությունները, նաև էլեկտրոնային եղանակով ծառայությունների մատուցման դեպքերում ԱԱՀ-ի գանձման սկզբունքներն ու ընթացակարգերը։ Այդ մասին Sputnik Արմենիայի հետ զրուցում ասաց ՀՀ ֆինանսների փոխնախարար Արման Պողոսյանը։
«Ի թիվս այլ հարցերի` գնահատել ենք ավելի ճկուն, ավելի մատչելի ընթացակարգեր ներդնելու հնարավորությունները, որոնք մեր գործարար շրջանակներին հնարավորություն կտան հարկային հաշվառումն իրականացնել պարզ կանոններով՝ տնտեսելով և՛ ժամանակ, և՛ ռեսուրս»,– ասաց Պողոսյանը:
Ֆինանսների նախարարի տեղակալի խոսքով՝ անդրադարձ է եղել նաև անդամ պետությունների հարկային մարմինների միջև փոխադարձ օգնության, համագործակցության գործիքների զարգացման հնարավորություններին, որոնք առավելապես ուղղված են հարկային մարմինների միջև գործակցության նոր մակարդակի ապահովմանը:
«Մենք` որպես հյուրընկալող երկիր, ձևավորել ենք մեր օրակարգային հարցերը՝ նպատակ ունենալով մեր տնտեսավարող սույբեկտների, նաև քաղաքացիների համար ձևավորել ավելի նպաստավոր միջավայր, պարզեցնել հարկային հաշվառման կանոնները և առհասարակ կրճատել այդ գործընթացի վրա ծախսվող ժամանակը»,- նշեց նա:
Որքան կթանկանա 20 տարեկան «Օպելը» հունվարից. կառավարությունը «ամորտիզատորներ» է դիտարկում
Փոխնախարարի խոսքով`նման հանդիպումները թույլ են տալիս մանրակրկիտ ուսումնասիրել ԵԱՏՄ անդամ երկրների հարկային քաղաքականության մեջ տեղի ունեցող փոփոխությունները և խթանել փորձի փոխանակումը։
