Փայլակ Թադեւոսյան

Թադևոսյան. «Հարկային գործոնի տարբերություն նախորդ և այս տարվա մեջ չեմ տեսնում»

40
(Թարմացված է 16:49 21.08.2019)
«Հարկատուների պաշտպանություն» ՀԿ ղեկավար Փայլակ Թադևոսյանը Sputnik Արմենիայի հետ զրույցում խոսել է 2019 թվականի առաջին կիսամյակի ընթացքում ընկերությունների վճարած հարկերի ձևավորման մասին։

Ըստ Թադևոսյանի` հարկային մուտքերի ավելացմանը կարող են նպաստել բազմաթիվ գործոններ, և յուրաքանչյուր հարկ վճարողի գործունեությունը ուսումնասիրելու արդյունքում միայն կարելի է որևէ եզրահանգում անել։

«Պետք է հասկանալ` տվյալ ընկերության վճարած հարկերն ավելացել են ստվերից դուրս գալու արդյունքում, թե երկու տարի առաջ կատարված ներդրումների պտուղներ է քաղում»,-պարզաբանում է Թադևոսյանը։

Տնտեսագետի խոսքով` պետք է տարանջատել ճյուղերը, այսինքն` որ ճյուղերի զարգացման կամ որ ճյուղերի եկամուտների հայտարարագրման ավելացմամբ է պայմանավորված այդ ամենը։

«Պետք է տարանջատում լինի նաև հարկատեսակների մասով, շահութահարկը պետք է այլ մոտեցումներով վերլուծել, անուղղակի հարկերը այլ ձևով, ինչպես նաև ուշադրություն դարձնել եկամտային հարկին»,–նշում է Թադևոսյանը։

Տնտեսագետը ենթադրում է, որ եթե նախկինում հայտարարվել է, որ աշխատատեղերի քանակը էապես ավելացել է, հետևաբար, դրան համարժեք կավելանան նաև եկամտային հարկի պետական բյուջեի մուտքերը։

«Որևէ գործոն միանշանակ առաջնային համարել և ասել դրանով է պայմանավորված` ճիշտ չի լինի»,–ասում է նա։

Թադևոսյանը նշում է, որ նախորդ տարվա համեմատ հարկային գործոնի տարբերություն առանձնապես չի տեսնում։ Վարչապետ Նիկոլ Փաշինյանն, անդրադառնալով առաջին 1000 խոշոր հարկ վճարողների և 2019 թ. հունվար-հունիս ամիսների ընթացքում նրանց վճարված հարկերի մեծությունների ցանկին, իր ֆեյսբուքյան էջում նշել է, որ 1000 խոշոր հարկատուների ցանկի վերին հորիզոնականներում տեղ զբաղեցրած, հանրային որոշակի հետաքրքրություն ներկայացնող ընկերությունների մեծ մասն այս տարվա առաջին կիսամյակում, նախորդ տարվա նույն ժամանակահատվածի համեմատ, զգալիորեն ավելացրել է պետական բյուջե վճարված հարկերի ընդհանուր մեծությունը:

Հայաստանի տնտեսությունն աշխուժացրել են սեզոնային գործոններն ու ավտովարկավորման շուկան

Մասնավորապես, «Ֆլեշ» ընկերությունը 2019-ի առաջին կիսամյակում, նախորդ տարվա առաջին կիսամյակի համեմատ վճարել է 58%-ով ավելի հարկ, «Յուքոմ» ընկերությունը վճարած հարկերի ծավալը գերազանցել է 26%-ով, «Նատալի Ֆարմ» ընկերությունը` 37%-ով, «Սպայկա» ընկերությունը` 117%-ով, «Սաս-Գրուպը» 82%-ով և այլն։ Կառավարության ղեկավարը նաև հիշեցնում է, որ այս տարվա առաջին կիսամյակում հազար խոշոր հարկ վճարող ընկերությունները նախորդ տարվա նույն ժամանակահատվածի համեմատ պետական բյուջե են վճարել 64 միլիարդ դրամով ավելի գումար: Նկատենք, որ թե 2018 թվականի երկրորդ եռամսյակում և թե այս տարվա նույն ժամանակահատվածում 1000 խոշոր հարկ վճարողների ցուցակը գլխավորում է «Զանգեզուրի պղնձամոլիբդենային կոմբինատը։

 

40
թեգերը:
Հայաստան, հարկային օրենսգիրք, խոշոր հարկատու, եկամտահարկ, հարկեր

sys_stories