«Այլընտրանք» հետազոտական կենտրոնի ղեկավար, տնտեսագիտության դոկտոր, պրոֆեսոր Թաթուլ Մանասերյանը Sputnik Արմենիայի հետ զրույցում մեկնաբանում է բանկերի՝ շահույթով աշխատելու մասին տվյալները, որոնք, ըստ Ազգային ժողովի տնտեսական հարցերի մշտական հանձնաժողովի նախագահ, իշխող՝ «Իմ քայլը» խմբակցության պատգամավոր Բաբկեն Թունյանի՝ պայմանավորված են իրենց կայացրած որոշմամբ։
«Այդ պարագայում կտեսնենք, որ շահույթի աճի միտումներ կային հատկապես համաշխարհային ֆինանսական ճգնաժամին հաջորդած տարիներին»,-նկատում է Թաթուլ Մանասերյանը։
Նրա խոսքով` բանկերի շահույթի ավելացումը թեև առաջին հայացքից կարող է դրական թվալ, այդուհանդերձ, պայմանավորված է նաև այն հանգամանքով, որ ներդրումների համար այլ՝ ավելի շահավետ վայր կամ ոլորտ ավանդատուները չեն տեսնում, այդ պատճառով էլ գերադասում են իրենց գումարները պահել բանկերում։
«Դա էլ իր հերթին վկայում է բանկերի նկատմամբ վստահության որոշակի գործոնի մասին, քանի որ առանց այդ վստահության՝ բանկերում նման գումարներ չէին շրջանառվի»,-կարծում է տնտեսագետը։
Ըստ Մանասերյանի` բանկերի շահույթի աճը պետք է համադրել տնտեսական աճի կամ տնտեսական ակտիվության ցուցանիշի հետ, և պարզ կլինի, որ առկա միտումներին հակառակ որևէ ցուցանիշ չի գրանցվել։
Բանկերի զուտ շահույթը եղել է 37.9 մլրդ դրամ՝ 4.4%-ով ավելի, քան նախորդ տարվա նույն ժամանակահատվածում։
Թունյանը գրել էր, որ սա նշանակում է, որ ԱԺ-ում իրենք ճիշտ որոշում են կայացրել՝ պետտուրքերի ավելացման հիմնական բեռը գրավատներից ու փոխանակման կետերից տեղափոխելով բանկերի վրա, որովհետև շահութահարկի 2% նվազեցումից ամենից շատ հենց բանկային ոլորտն է շահում։
