Պետք է հանրությանը բացատրել, թե ինչ անել շոգին ու տապին դիմանալու և վտանգների մեջ չհայտնվելու համար։ Sputnik Արմենիային ասել է ընտանեկան բժիշկ, թերապևտ Նարինե Ղալումյանը։
Բժիշկը խորհուրդ է տալիս շատ հեղուկ օգտագործել` հատկապես ջուր, մրգեր, թեթև սնունդ ընդունել։ Այդպես են վարվել նաև մեր պապերը` ավելի շատ օգտագործել են մածուն, թան, խորոված բանջարեղեն։
Ղալումյանը նշում է, որ ցանկալի է որքան հնարավոր է շատ լինել բնության գրկում, եթե հնարավոր է ծովափնյա, գետափնյա վայրերում, իսկ եթե չկա նման հնարավորություն` ջրային թրջոցներով պարուրեք ձեզ։
«Facebook-ում շատ ժամանակ մի անցկացրեք, եղեք բնության գրկում, ծանր ու նեգատիվ լուրեր մի կարդացեք, զբոսնեք մաքուր օդին»,–ասում է Նարինե Ղալումյանը։
Բժիշկը խորհուրդ է տալիս սովորույթ դարձնել գլխարկով տանից դուրս գալը, նաև հովանոց վերցնել` ճառագայթներից պաշտպանվելու համար։
Բացի այդ, ըստ Ղալումյանի` զգուշություն պետք է ցուցաբերել նաև դեղորայքի հարցում։ Անհրաժեշտ է բուժող բժշկի հետ վերանայել դեղաչափերը։
Բժիշկ–թերապևտը նշում է, որ ամռան տապին պետք չէ այցելել ֆիթնես ակումբներ, պետք է նախապատվությունը տալ լողավազանին։
