Նորայր Նորիկյան

Նորիկյան. «Մոնիթորինգի խումբ ձևավորելով` հանցագործություն չեն բացահայտում»

22
(Թարմացված է 09:51 05.07.2019)
Փաստաբան Նորայր Նորիկյանը Sputnik Արմենիայի հետ զրույցում անդրադարձել է խաղաղ պայմաններում զոհված զինծառայողների գործերը բազմակողմանի և օբյեկտիվ քննելու համար ստեղծված մոնիթորինգի աշխատանքային խմբից ՀԿ–ների դուրս գալու փաստին։

 

Նորիկյանի կարծիքով` հասարակական կազմակերպությունները ճիշտ կանեն, որ դուրս գան մոնիթորինգի աշխատանքային խմբից։ 

 

Ըստ փաստաբանի` զինված ուժերում տարիներ շարունակ տեղի են ունեցել հանցագործություններ, որոնց հետևանքով մարդիկ են մահացել, սպանվել, իսկ հարուցված քրեական գործերը չեն բավարարել տուժողների հարազատներին, քանի որ նրանց մոտ վստահություն չի եղել այդ կառուցների նկատմամբ։

«Մոնիտորինգի խումբ ձևավորելով հանցագործություն չեն բացահայտում, որովհետև ակնհայտ է, որ Հայաստանի քրեական օրենսդրությունը հստակ սահմանել է հանցագործության բացահայտման գործիքակազմը»,–ասում է Նորիկյանը։

Փաստաբանը նշում է` ի սկզբանե ակնհայտ էր, որ մոնիտորինգի խումբը չէր լուծելու իր առջև դրված խնդիրները, այդ հանձնաժողովից ակնկալիքները շատ էին, և ակնհայտ էր, որ այդ մարմինը չի արդարացնելու իրեն։

Հիշեցնենք` վարչապետ Նիկոլ Փաշինյանի հանձնարարությամբ` 2019 թվականի նոյեմբերին ՀՀ քննչական կոմիտեն ստեղծեց հասարակական մոնիթորինգի աշխատանքային խումբ՝ ներգրավելով տասը իրավապաշտպան կազմակերպությունների, որոնց հետ համաձայնագիր էր ստորագրվել խաղաղ պայմաններում զոհված զինծառայողների գործերը բազմակողմանի և օբյեկտիվ քննելու համար։ Քննչական կոմիտեն հայտարարել էր, որ խմբի նպատակը զինծառայողների մահվան դեպքերի առթիվ հարուցված առանձին քրեական գործերի քննարկումն է, այն գործերի, որոնց վերաբերյալ նախաքննության մարմնի կողմից իրականացված քննության բազմակողմանիությունն ու օբյեկտիվությունը կասկածի տակ է դրվում հասարակության կողմից։

Վերջին օրերին մամուլում հրապարակումներ հայտնվեցին այն մասին, որ մոնիտորինգի խմբում ներգրավված ՀԿ-ները դժգոհ են զինվորական գործերի բացահայտմանն ուղղված աշխատանքներից։

Ավելի ուշ Քննչական կոմիտեն հերքեց այդ տեղեկությունները` դրանք կոչելով հերյուրանք, ու հայտարարեց, որ ՔԿ ղեկավարությունը որևէ կերպ չի խոչընդոտել խմբի գործունեությունը:

Կոմիտեն վստահեցրեց, որ մոնիտորինգի խումբը շարունակում և շարունակելու է իր բնականոն գործունեությունը, ընդ որում՝ աշխատանքային հանդիպումները կազմակերպվելու են ամեն երկու շաբաթը մեկ:

22
թեգերը:
Բանակ, ՀՀ քննչական կոմիտե, Հայաստան

sys_stories