«Անցումային արդարադատության գործիքների կիրառման հեռանկարները Հայաստանում» խորագրով խորհրդարանական լսումներին մասնակցած Նաիրա Զոհրաբյանը նշում է, որ դրանք չտվեցին մի քանի հիմնական հարցերի պատասխաններ։
«Արդյո՞ք իշխանությունն իր քաղաքական կամքով ու գործիքակազմով չի կարող օրենսդրորեն անել այն փոփոխությունները, որոնք պետք է արվեն դատական համակարգում, որ դիմում է նման ծայրահեղ միջոցների»,- տարակուսում է պատգամավոր Նաիրա Զոհրաբյանը։
Պատգամավորը վստահ է, որ դատական համակարգը միանշանակ ունի բարեփոխումների կարիք։
«Ի՞նչ գործիքակազմ է ընտրելու Հայաստանի իշխանությունը, ո՞րն է լինելու այդ անկախ մարմինը, ովքե՞ր են լինելու այն բացարձակ անաչառ փորձագետները, իրավաբանները, որոնք անցկացնելու են վեթինգը»,- հարց է հնչեցնում պատգամավորը։
Զոհրաբյանը համարում է, որ այո, Հայաստանի դատական համակարգը ճահիճ է, որը պետք է քանդվի։
«Եթե պիտի պրոցեսը գնա քաղաքական վենդետաների ճանապարհով, ապա մենք երկիրը տանելու ենք փակուղի»,- նշում է օրենսդիր մարմնի ներկայացուցիչը։
Լսումների նպատակն է շահագրգիռ քննարկման արդյունքում ձևավորել պատկերացում, թե հանրության տարբեր շրջանակներն ինչպես են գնահատում Հայաստանում անցումային արդարադատության կիրառման անհրաժեշտությունը, ինչ պատկերացումներ ունեն դրա վերաբերյալ և ինչ ակնկալիքներ կան այդ գործընթացից:
Մայիսի 24-ին Ազգային ժողովում անցկացվեցին «Անցումային արդարադատության գործիքների կիրառման հեռանկարները Հայաստանում» խորագրով խորհրդարանական լսումներ, որին մասնակցեցին պետական ու հասարակական կառույցների ներկայացուցիչներ, միջազգային փորձագետներ։ Խորհրդարանական լսումներին մասնակցել են նաև «Բարգավաճ Հայաստան» խմբակցության պատգամավորները, այդ թվում` Նաիրա Զոհրաբյանը։
