Մխիթար Ասլանյանը նշում է, որ կառավարության այս որոշման հետևանքով շուկան կգնա մոնոպոլիզացման, բանկերը կդառնան մոնոպոլ։
«60 տոկոս թանկացումը նշանակում է, որ շուկայից դուրս են մնալու գրավատներն ու փոխանակման կետերը` ֆինանսական շուկայում բանկերին թողնելով մոնոպոլ դիրքում։ 60 տոկոս թանկացումը նշանակում է, որ ո՛չ գրավատները, ո՛չ փոխանակման կետերը ֆինանսական գործունեություն ծավալելու հնարավորություն չեն ունենալու»,- նշում է Ասլանյանը։
Նրա գնահատմամբ` շատ թվով գրավատները դեռ չեն նշանակում, որ վերահսկողությունը թույլ է։ Ամենակարևոր վերահսկողությունը մրցակցությունն է, եթե կան մրցակիցներ՝ բանկերը, գրավատները և շուկայի մյուս մասնակիցները մրցում են և փորձում են ծառայություններն ավելի լավ մատուցել։
«Մրցակցության վերացմամբ, բանկերը կունենան շուկայում մոնոպոլ դիրք և կսկսեն ավելի թանկ վարկեր առաջարկել, և տեղին չէ հիմնավորումը, թե ԿԲ-ն թույլ չի տա։ Հիմա էլ բանկերը ցածր տոկոսադրույքներով միջազգային կառույցներից բերում են վարկեր և թանկ տրամադրում են բարձր գներով, ԿԲ-ն դա հիմնավորում է բանկերի ռիսկայնությամբ։ Եվ ոչինչ չի խանգարի ԿԲ-ին մյուս բոլոր դեպքերում բարձր վարկերը հիմնավորել նույն ռիսկի գործոնով»,– ասում է տնտեսագետը։
Ասլանյանի կարծիքով` գրեթե բոլոր գրավատներն ու փոխանակման կետերը կփակվեն, կմնան միայն ավելի խոշորները, որոնք հետագայում, չդիմանալով բանկերի հետ մրցակցությանը, դուրս կմղվեն շուկայից։
ՀՀ կառավարությունը «Պետական տուրքի մասին ՀՀ օրենքում փոփոխություններ և լրացումներ կատարելու մասին» նախագծով պատրաստվում է 60 անգամ ավելացնել տարեկան վճարվող պետական տուրքը գրավատների և փոխանակման կետերի համար։ Այսինքն` նախագիծը կյանքի կոչվելու դեպքում գրավատների համար ներկայիս 100 000 դրամի փոխարեն կսահմանվի 6 մլն, իսկ փոխանակման կետերի համար՝ 50 000 դրամի փոխարեն 3 մլն դրամ պետտուրք։ Նախագիծն առաջարկել է Կենտրոնական բանկը (ԿԲ) ու նաև սահմանել, որ բանկերի 3 մլն պետտուրքը պետք է դառնա 7 մլն դրամ։
