Գյումրու քաղաքապետ Սամվել Բալասանյանն ԱԺ առաջիկա ընտրություններին չի մասնակցի։ Նա այս մասին հայտարարեց այսօր` նոյեմբերի 10-ին, լրագրողների հետ զրույցում։ Մինչ այդ քաղաքական հարցերին չպատասխանելու պայմանով լրագրողներին ճեպազրույց տվող քաղաքապետն ի վերջո տեղի տվեց համառ պնդումներին։
«Գիտեմ ձեր հարցերը։ Չեմ մասնակցելու, անկուսակցական եմ, իմ որդիները չեն մասնակցելու։ Մի հատ ձայն ունեմ, կտամ իմ լավագույն ընկերոջը»,– ասաց Բալասանյանը։
Իսկ լավագույն ընկերը, նրա խոսքով, ՀՀ արտակարգ իրավիճակների նախարարի պաշտոնակատար Ֆելիքս Ցոլակյանն է։
Հիշեցնենք` Շիրակի նախկին մարզպետ, այժմ նախարարի պաշտոնակատար Ֆելիքս Ցոլակյանը հայտարարել է, որ ԱԺ արտահերթ ընտրություններում դարձյալ առաջադրվելու է ռեյտինգային ընտրակարգով ու դարձյալ Շիրակի մարզում: Ցոլակյանն ասել է նաև, որ կուսակցական երբեք չի եղել և չի պատրաստվում անդամակցել «Քաղաքացիական պայմանագիր» կուսակցությանը։
Շիրակի մարզպետ Կարեն Սարուխանյանն էլ հայտնել է, որ «Քաղաքացիական պայմանագիր» կուսակցությունն ԱԺ արտահերթ ընտրություններում 15 ռեյտինգային թեկնածու կունենա Շիրակի մարզում։
Նշենք` ԱԺ արտահերթ ընտրությունը նախատեսված է դեկտեմբերի 9-ին։
