ՀՀԿ խմբակցությունը խորհրդարանում պարտավոր չէ ծառայել և չի ծառայի Նիկոլ Փաշինյանի միահեծան իշխանությանը։ Այդ մասին երկուշաբթի խորհրդարանում լրագրողներին ասաց կուսակցության փոխնախագահ Արմեն Աշոտյանը։
«Գործիչներ կան, որոնք քաղաքական գործընթացներին կարող են վերաբերվել որպես լավություն կամ վատություն։ Լավություն կամ վատություն մենք իրար այստեղ չենք անում։ Մենք կրում ենք պատմական պատասխանատվություն Հայաստանում պետականության ամրապնդման, իշխանության ճյուղերի տարանջատման ամրապնդման և խորհրդարանի դերի ամրապնդման հետ կապված։ Սա լավությու՞ն է, թե՞ վատություն, գուցե որոշ մարդկանց քաղաքական շահերին վատություն է։ Բայց մենք այստեղ չենք սպասարկելու որոշ մարդկանց քաղաքական ամբիցաիներն ու շահերը։ Խորհրդարանն այստեղ չէ, որպեսզի սպասարկի բացառապես Նիկոլ Փաշինյանի միահեծան քաղաքականությունը», — ասաց Արմեն Աշոտյանը», — նշեց Աշոտյանը։
Աշոտյանը վստահ է, որ չի կարելի և անթույլատրելի է ընտրություններից 40 օր առաջ փոխել Ընտրական օրենսգիրքը։
Ազգային ժողովում այսօր երկրորդ անգամ տապալվեց Ընտրական օրենսգրքի փոփոխությունների փաթեթը: Փաթեթը կրկին ԱԺ օրակարգ բերելու համար ստորագրահավաք էին իրականացրել «Ելք» և «Ծառուկյան» խմբակցությունների պատգամավորները: Ընտրական օրենսգրքի առաջարկվող բարեփոխումներով ռեյտինգային ընտրակարգից անցում է կատարվում համամասնական ընտրակարգի, խորհրդարանի անցողիկ շեմը նվազեցվում է մեկ տոկոսով, կրճատվում է ընտրական գրավը:
Բացի այդ, առաջարկվում է ավելացնել խորհրդարանում խմբակցությունների նվազագույն թիվը երեքից մինչև հինգ (եթե չորրորդ խմբակցությունը հավաքի ձայների առնվազն 2%-ը), իսկ խորհրդարան մտնելու ընդհանուր շեմը նվազեցնել 5%-ից մինչև 4% կուսակցությունների համար և 7%-ից 6%` դաշինքների համար։
«Քաղաքացիական պայմանագիր» կուսակցությունը կարծում է, որ ՀՀԿ-ն փորձում է ամեն գնով ԱԺ բերել իր տեղի իշխանիկներին։
