«Ռուսական երկաթուղիների» դուստր ընկերության գրասենյակում որոշակի գործողություններ իրականացվել են, սակայն առանց դիմակավորված անձանց և լիովին քաղաքակիրթ ձևով, ՀՀ կառավարությունում լրագրողներին ասաց ՊԵԿ նախագահ Դավիթ Անանյանը։
Ավելի վաղ Sputnik Արմենիան հայտնել էր, որ օգոստոսի 14-ի լույս 15-ի գիշերը ՀՀ ՊԵԿ աշխատակիցները խուզարկություն են իրականացրել «Հարավկովկասյան երկաթուղի» ՓԲԸ-ում («Ռուսական երկաթուղիների» 100% դուստր ընկերություն)։ Փաստաթղթեր են առգրավվել։ Գործողություններին նաև հատուկ նշանակության ջոկատն է մասնակցել։
Անանյանն ընդգծեց` ծառայության աշխատակիցներն իսկապես ստուգումներ են իրականացրել ՀԿԵ-ում, բայց առանց ուժային գործողությունների։
«Դիմակավորված անձինք իսկապես եղել են, բայց նրանք սպասել են դրսում մեքենաների մեջ, որպեսզի փաստաթղթերը հասցնեն նշանակության վայր։ Ստուգումները գիշերն են իրականացվել միայն այն պատճառով, որ դատարանի թույլտվությունը ստացել ենք ուշ ժամի։ Միայն այդքանը», — ասաց Անանյանը։
Անանյանն իր աշխատակիցների գործողություններն ընդհանուր առմամբ հրաժարվեց մեկնաբանել` հայտարարելով, որ դրանք որոշակի գաղտնիություն են ենթադրում։
Sputnik Արմենիայի տեղեկությունների համաձայն` քրեական գործ է հարուցվել 9,7 մլն դրամի չափով (Մոտ 20 հազար դոլար) ԱԱՀ չվճարելու փաստով։
Սակայն ընկերությունում քրեական գործը հարուցելու մասին ծանուցում չեն ստացել։ Sputnik Արմենիային ՀԿԵ-ում ասացին, որ իրենց գործունեության 10 տարվա ընթացքում ընկերությունը միշտ բաց ու թափանցիկ է գործել, այդ թվում ՀՀ հարկային մարմինների հետ համագործակցության հարցերում։
«ՀԿԵ» ՓԲԸ-ն իր գործունեությունը Հայաստանում սկսել է 2008 թվականի հունիսի 1-ից։
«ՀԿԵ» ՓԲԸ-ն «Ռուսական երկաթուղիներ» ԲԲԸ-ի դուստր ընկերությունն է և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով:
