Ազգային ժողովի նիստերի դահլիճ

Ինչ են պատրաստվում անել ԲՀԿ–ն և ԼՀԿ–ն խորհրդարանից դուրս

105
(Թարմացված է 19:12 21.07.2021)
ԱԺ «Բարգավաճ Հայաստան» խմբակցության քարտուղար Արման Աբովյանը և «Լուսավոր Հայաստան» խմբակցության անդամ Անի Սամսոնյանը Sputnik Արմենիայի եթերում խոսել են իրենց քաղաքական ուժերի հետագա անելիքների մասին։

ԵՐԵՎԱՆ, 21 հուլիսի - Sputnik. Արման Աբովյանը անդրադարձավ վերջերս Նիկոլ Փաշինյանի և Գագիկ Ծառուկյանի միջև կայացած հանդիպմանն ու ասաց, որ այն ունեցել է ֆորմալ բնույթ, ընդամենը հետընտրական հանդիպում, որի ընթացքում որևէ պայմանավորվածություն չի եղել։ Ըստ նրա` ԲՀԿ–ն արտահերթ խորհրդարանական ընտրություններից հետո անմիջապես հայտարարեց, որ երբեք լոկ մանդատների համար չի պայքարել և մանդատը դիտարկել է գործիքներից մեկը քաղաքական ծրագրերն իրականացնելու համար։

«ԲՀԿ–ն այժմ էլ կա, մնում է քաղաքական դաշտում, դեպի ստվեր չենք գնալու, լինելու ենք ավելի ակտիվ` արձագանքելով ու մասնակցելով բոլոր քաղաքական գործընթացներին։ Ձևաչափերը տարբեր են»,– ասաց ԱԺ «Բարգավաճ Հայաստան» խմբակցության քարտուղարը։

Աբովյանի տեղեկացմամբ` իրենց գնահատականներում նույնպես ոչինչ չի փոխվել, շարունակում են պնդել, որ երկիրը հայտնվել է ծանրագույն իրավիճակում, ուստի ելքեր գտնելու գործընթացը շարունակում է մնալ արդիական։ Ըստ նրա`ԲՀԿ–ն արել և անելու է ամեն ինչ, որպեսզի նպաստի Հայաստանի բարգավաճմանը, հետևաբար բոլոր կուսակիցներն ու ԲՀԿ անդամ չհանդիսացող մարդիկ, ովքեր իրենց քայլերով կնպաստեն երկրի զարգացմանը, կլինեն անձամբ Գագիկ Ծառուկյանի ուշադրության կենտրոնում։

Անի Սամսոնյանն իր հերթին նշեց, որ «Լուսավոր Հայաստան» կուսակցությունը շարունակում է իր գործունեությունը։ Այս պահին իրենք վերլուծում են ընտրությունների արդյունքներն ու ստեղծված իրավիճակը` փորձելով վերհանել իրենց թերություններն ու սխալները, գույքագրել հնարավորությունները, որպեսզի շարունակեն ներդրում ունենալ հայաստանյան քաղաքական դաշտում։

Արմեն Սարգսյանը հանդիպել է Էդմոն Մարուքյանի հետ. ԼՀԿ առաջնորդը խոսել է իր ծրագրերի մասին

«Հետնտրական հանդիպման ժամանակ վարչապետի պաշտոնակատարը ներկայացրել է իրեն կից խորհրդատվական հարթակ ստեղծելու ծրագիրը, որը նախատեսված է արտախորհրդարանական ուժերի համար։ ԼՀԿ–ն Էդմոն Մարուքյանի գլխավորությամբ ողջունել է այդ նախաձեռնությունը, քանզի հանդես է եկել համերաշխության և համախմբման գաղափարներով, ուստի հաջողություն ենք մաղթում այդ հարթակին»,– նշեց «Լուսավոր Հայաստան» խմբակցության պատգամավորը։

Սամսոնյանի խոսքով` ԼՀԿ–ն այս պահին իր անելիքներն ունի և, ամենայն հավանականությամբ, չի մասնակցի հիշյալ հարթակի աշխատանքներին։ Ըստ նրա`Հայաստանը գտնվում է միջազգային ու տարածաշրջանային լուրջ մարտահրավերների առջև, և անկախ այն հանգամանքից` ԼՀԿ–ն խորհրդարանում է, թե ոչ, հստակեցնում է իր դերակատարությունն այդ մարտահրավերները հաղթահարելու գործում։

Սամսոնյանն ասաց, որ կուսակցությունում քննարկում են նաև առաջիկա ՏԻՄ ընտրություններին մասնակցելու հարցը։ Երբ պատգամավորական լիազորությունները դադարեն, «Լուսավոր Հայաստան» խմբակցության ներկայացուցիչները կորոշեն, թե որ ոլորտներում կարող են ինքնադրսևորվել ու շարունակել գործունեությունը, հետևաբար վերջին արտահերթ ընտրությունները ԼՀԿ–ի գործունեության համար բնավ վերջակետ չեն, և կա ամեն ինչ նորովի սկսելու մեծ հնարավորություն։

Ինչու ԲՀԿ-ն և ԼՀԿ-ն չհաղթահարեցին ԱԺ անցողիկ շեմը

Հիշեցնենք, որ հունիսի 20–ին կայացած արտահերթ խորհրդարանական ընտրությունների արդյունքներով վերոհիշյալ երկու քաղաքական ուժերը չհաղթահարեցին խորհրդարան անցնելու նվազագույն շեմը։ ԲՀԿ–ն ստացավ ձայների 3.95 % տոկոսը, իսկ ԼՀԿ–ն` 1.22% տոկոսը։

105
թեգերը:
Բարգավաճ Հայաստան կուսակցություն (ԲՀԿ), «Լուսավոր Հայաստան» կուսակցություն, Արման Աբովյան, Անի Սամսոնյան
Ըստ թեմայի
«Միշտ էլ արել ենք, անում ենք, անելու ենք». Գագիկ Ծառուկյանն ու Նիկոլ Փաշինյանը հանդիպել են
Դեսպաններին Երասխ տարեք. Էդմոն Մարուքյան
«Քաղաքագետները չարաչար սխալվում են». ԲՀԿ–ն գնահատական կտա ընտրությունների վերաբերյալ
Վրաստանի և Հայաստանի վարչապետները

Վրաստանի վարչապետն ուղերձ է հղել Նիկոլ Փաշինյանին

18
(Թարմացված է 17:18 03.08.2021)
Ղարիբաշվիլին ընդգծել է, որ տարածաշրջանի աշխարհաքաղաքական դինամիկան և առկա մարտահրավերներն ավելի նշանակալից են դարձնում Հայաստանի ու Վրաստանի միջև համագործակցությունը։

ԵՐԵՎԱՆ, 3 օգոստոսի – Sputnik. Վրաստանի վարչապետ Իրակլի Ղարիբաշվիլին շնորհավորական ուղերձ է հղել Նիկոլ Փաշինյանին ՀՀ վարչապետի պաշտոնում նշանակվելու կապակցությամբ: Տեղեկությունը հայտնում է վարչապետի մամուլի ծառայությունը։

«Թույլ տվեք անկեղծ շնորհավորել Հայաստանի Հանրապետության վարչապետի պաշտոնին նշանակվելու կապակցությամբ։ Տարածաշրջանի աշխարհաքաղաքական դինամիկան և առկա մարտահրավերներն ավելի նշանակալից են դարձնում մեր երկրների միջև համագործակցությունը ինչպես երկկողմ, այնպես էլ տարածաշրջանային ձևաչափում։ Հավատում եմ, որ Վրաստանի և Հայաստանի Հանրապետության միջև դարերի ընթացքում ձևավորված սերտ կապերն ու ավանդական բարիդրացիական հարաբերություններն ապագայում ավելի կամրապնդվեն: Նաև ցանկանում եմ պատրաստակամություն հայտնել ակտիվ երկխոսության համար այս փոխշահավետ համագործակցության էլ ավելի ամրապնդման գործում»,– գրել է Վրաստանի վարչապետն իր ուղերձում։

Արմեն Սարգսյանը զանգել է Նիկոլ Փաշինյանին

Ղարիբաշվիլին եղբայրական հայ ժողովրդին խաղաղություն և բարօրություն է մաղթել:Հիշեցնենք` Հայաստանի Հանրապետության նախագահը նորընտիր Ազգային ժողովի լիազորությունների ժամկետը սկսվելուց հետո անհապաղ վարչապետ է նշանակում Սահմանադրության 89-րդ հոդվածով սահմանված կարգով ձևավորված խորհրդարանական մեծամասնության ներկայացրած թեկնածուին:

Պաշտոնը ստանձնում եք կարևորագույն ժամանակաշրջանում. Փաշինյանը շնորհավորել է Սիմոնյանին

Իսկ քանի որ ԱԺ–ում մեծամասնություն են կազմում «Քաղաքացիական պայմանագիր» կուսակցության ցուցակով ընտրված պատգամավորները, նրանք երեկ առաջադրեցին Նիկոլ Փաշինյանի թեկնածությունը։

Ավելի ուշ ՀՀ նախագահ Արմեն Սարգսյանը հրամանագիր ստորագրեց, և Փաշինյանը կրկին նշանակվեց ՀՀ վարչապետ։

18
թեգերը:
Հայաստան, Վրաստանի Հանրապետություն, Նիկոլ Փաշինյան, Իրակլի Ղարիբաշվիլի
Հակոբ Արշակյան

Հակոբ Արշակյանը խոսեց Նավալնիին աջակցելու ակցիաներին մասնակցելու մասին

224
(Թարմացված է 16:15 03.08.2021)
Հակոբ Արշակյանը շեշտեց, որ ՀՀ քաղաքացի է և ելնում է Հայաստանի շահերից, իսկ Ռուսաստանը Հայաստանի ռազմավարական գործընկերն է։

ԵՐԵՎԱՆ, 3 օգոստոսի – Sputnik. «Քաղաքացիական պայմանագիր» կուսակցության կողմից ԱԺ փոխնախագահի թեկնածու Հակոբ Արշակյանին «Հայաստան» դաշինքի պատգամավոր Արեգնազ Մանուկյանը հիշեցրեց ՌԴ դեսպանատան մոտ Ալեքսեյ Նավալնիին աջակցելուն ուղղված բողոքի ակցիաներին իր մասնակցելը։

Մանուկյանը փորձեց ճշտել, թե Արշակյանը Նավալնիի գործունեության մասին այժմ ինչ կարծիք ունի։

«Խնդրում եմ դուք որակումներ չտաք, թե ես որ երկրի դեմ կամ կողմ եմ երբևէ ակցիաներ արել, որովհետև երբևէ որևէ միջոցառում, որին ես մասնակցել եմ որևէ պետության դեմ չի եղել։ Այն, ինչի մասին դուք նշում եք, մոտ 10 տարի առաջվա իրավիճակային դրվագային միջոցառում է եղել, և ես այդ մասով չեմ ցանկանա մեկնաբանություն տալ»,–ասաց Արշակյանը։

Նա շեշտեց, որ ՀՀ քաղաքացի է և ելնում է Հայաստանի շահերից, իսկ Ռուսաստանը Հայաստանի ռազմավարական գործընկերն է։

«Դա նշանակում է, որ մեր շահերը զուգահեռվում են, այլ ոչ թե խաչվում և այն երկրները, որոնց դեմ ես հանդես կգամ հակառակ վերաբերմունքով, դրանք Հայաստանի թշնամիներն են և հակառակորդները։ Ես ուզում եմ վերահաստատել, որ Ռուսաստանը Հայաստանի ռազմավարական գործընկերն է, և ես իմ գործունեությամբ ամեն ինչ անելու եմ, որպեսզի այդ գործընկերային հարաբերություններն էլ ավելի խորացվեն»,–ասաց նա։

Հանձնաժողովի 3 նախագահներն ընդդիմադիր կլինեն. ըստ Ռուստամյանի` պայմանավորվածություն չկա

Նրա խոսքով՝ ՀՀ բարձր տեխնոլոգիական արդյունաբերության նախարարի պաշտոնում աշխատելիս` ինքը բարձր մակարդակի հարաբերություններ է պահպանել ՌԴ գործընկերների և Հայաստանում Ռուսաստանի ներկայացուցիչների հետ։

Կալանավորված պատգամավորների բացակայությունը հարգելի է համարվում. Վլադիմիր Վարդանյան

224
թեգերը:
Հակոբ Արշակյան, ԱԺ, «Հայաստան» դաշինք, Ալեքսեյ Նավալնի, Բողոքի ակցիա, Ռուսաստան
Ըստ թեմայի
Ռոբերտ Քոչարյանը եկել էր, Արմեն Գևորգյանը` ոչ. դատական նիստը հետաձգվեց
Ռուբեն Ռուբինյանն ընտրվեց ԱԺ փոխնախագահ
Արմեն Սարգսյանը զանգել է Նիկոլ Փաշինյանին
Էմանուել Մակրոն, Նիկոլ Փաշինյան

Մակրոնը կարևորել է Հայաստանի և Ադրբեջանի միջև սահմանագծումը. նա խոսել է Փաշինյանի հետ

0
(Թարմացված է 18:37 03.08.2021)
Էմանուել Մակրոնը շնորհավորել է Նիկոլ Փաշինյանին և վերահաստատել է իր պատրաստակամությունը՝ շարունակելու հետևողական ջանքեր գործադրել տարածաշրջանում կայուն խաղաղության հաստատման ուղղությամբ:

ԵՐԵՎԱՆ, 3 օգոստոսի - Sputnik. ՀՀ վարչապետ Նիկոլ Փաշինյանը հեռախոսազրույց է ունեցել Ֆրանսիայի նախագահ Էմանուել Մակրոնի հետ: Տեղեկությունը հայտնում են կառավարության մամուլի ծառայությունից։

Ֆրանսիայի նախագահը Նիկոլ Փաշինյանին շնորհավորել է ՀՀ վարչապետի պաշտոնին նշանակվելու կապակցությամբ և բարձր գնահատել երկրում ժողովրդավարական գործընթացների անխափան իրականացումը:

«Ֆրանսիայի նախագահը հայտնել է Հայաստանին 200 հազար չափաբաժին պատվաստանյութ տրամադրելու որոշման մասին: Վարչապետ Փաշինյանը նախագահ Մակրոնին իր երախտագիտությունն է հայտնել այս առթիվ»,–ասված է հաղորդագրության մեջ:

ՀՀ վարչապետը տեղեկատվություն է տրամադրել Ադրբեջանի կողմից սահմանային վերջին սադրանքների, ինչպես նաև Ադրբեջանի ագրեսիվ հռետորաբանության վերաբերյալ՝ ընդգծելով, որ դրանց նպատակն է ապակայունացնել իրավիճակը տարածաշրջանում: Նա նաև անթույլատրելի է համարել հայ գերիների նկատմամբ Ադրբեջանում տեղի ունեցող շինծու դատավարությունները:

Նախագահ Մակրոնը հույժ կարևորել է Հայաստանի և Ադրբեջանի միջև սահմանագծումն ու սահմանազատումը: Համաձայնելով այս մտքին՝ ՀՀ վարչապետն ընդգծել է, որ հայ-ադրբեջանական սահմանազատում ու Լեռնային Ղարաբաղի հակամարտության կարգավորումը որևէ կերպ խաչաձևվող գործընթացներ չեն: Նա կրկնել է սահմանի երկայնքով ՀԱՊԿ դիտորդական առաքելություն տեղակայելու, կամ նման որոշման անհնարինության դեպքում՝ որպես այլընտրանք, ԵԱՀԿ Մինսկի խմբի համանախագահող երկրների դիտորդական առաքելության տեղակայման առաջարկությունը:

Տպավորություն է` ինչքան խնդիր կա, իշխող ուժի մեղքն է. Արշակյանը` սահմանի իրավիճակի մասին

Ֆրանսիայի նախագահը վերահաստատել է իր պատրաստակամությունը՝ շարունակելու հետևողական ջանքեր գործադրել տարածաշրջանում կայուն խաղաղության հաստատման ուղղությամբ:

ՀՀ վարչապետը համոզմունք է հայտնել, որ տարածաշրջանային համատեքստ ունեցող նախաձեռնություններն ու քայլերը կարող են հաջողության հասնել, եթե դրանք արժանանում են ԵԱՀԿ Մինսկի խմբի բոլոր համանախագահող երկրների հավանությանը:

Ադրբեջանցիները տարբեր տրամաչափի հրաձգային զինատեսակներից կրակել են Կութի ու Երասխի վրա

Վարչապետ Փաշինյանն ընդգծել է նաև, որ Հայաստանի կառավարությունը ողջունել է ԵԱՀԿ Մինսկի խմբի համանախագահների՝ նոյեմբերի 9-ին հաջորդած հայտարարությունները, այդ թվում՝ բանակցային գործընթացը վերականգնելու ուղղությամբ և պատրաստ է լիարժեք ներգրավվել բանակցային գործընթացում:

0
թեգերը:
Հայաստան, Ֆրանսիա, Էմանուել Մակրոն, Նիկոլ Փաշինյան, Սահման, Դեմարկացիա, Դելիմիտացիա, Ադրբեջան
Ըստ թեմայի
Սահմանային գոտում հրադադարը պետք է վերականգնել. Գավանը ԵԽԽՎ–ում զեկույցով հանդես կգա
Թաթոյանը սահմանային բնակիչների իրավունքի խախտումները ներկայացրել է միջազգային կառույցներին
Ի՞նչ քարտեզներ են փոխանցվել Երևանին և Բաքվին, կամ սահմանի լարումը սահմանազատման համար է