ԵՐԵՎԱՆ,29 հունիսի - Sputnik. Իշխանությունների ներսում այս պահին ՀՀ արտաքին գործերի նախարարի թեկնածուի փնտրտուքներ են, և այս պահին իշխանական փնտրտուքները կանգ են առել ՀՀ փոխվարչապետ Մհեր Գրիգորյանի վրա։ Այս մասին գրում է «Ժողովուրդ» օրաթերթը։
Ինչպես հայտնի է` մայիսի 27-ից ԱԳ նախարարությունը նախարար ու փոխնախարարներ չունի:
Բանն այն է, որ վերջինս ընդունված է ռուսական շրջանակների կողմից և ունի որոշակի փորձ և այդ պատճառով էլ ամենահավանական թեկնածուն է համարվում:
««Ժողովուրդ» օրաթերթը փորձեց անձամբ Մհեր Գրիգորյանից պարզել, թե արդյոք նման պաշտոնի առաջարկ ստացել է, թե ոչ։ Վերջինս նշեց, թե իրեն նշանակելու մասին որևէ տեղեկություն չունի։ Հստակեցմանը՝ եթե նման առաջարկ լինի, կընդունի՞ արդյոք, փոխվարչապետը պատասխանեց. «Կառավարության ձևավորման հետ կապված հարցեր այս պահին չեմ մեկնաբանում»»,–գրել է թերթն ու եզրակացրել` ասել է թե՝ ո՛չ հերքեց, ո՛չ հաստատեց տեղեկությունը:
Հիշեցնենք` մայիսի 27-ին հրաժարականի դիմում էր ներկայացրել ԱԳ նախարարի պաշտոնակատար Արա Այվազյանը:
Նույն օրը տեղեկություն տարածվեց, որ հրաժարականի դիմումներ են գրել նաև բոլոր փոխարտգործնախարարները։
Հունիսի 8-ին, ՀՀ վարչապետի պաշտոնակատար Նիկոլ Փաշինյանի որոշմամբ, նախարարի տեղակալներ Ավետ Ադոնցը, Արտակ Ապիտոնյանն ու Գագիկ Ղալաչյանն ազատվեցին զբաղեցրած պաշտոններից:
