ԵՐԵՎԱՆ, 15 հունիսի - Sputnik. Էջմիածնի քաղաքապետ Դիանա Գասպարյանը վստահեցնում է` աղմկահարույց ձայնագրությունը տեղի է ունեցել 2020 թվականի նոյեմբերի 16-ի ուշ երեկոյան, այն բանից հետո, երբ վարչապետը դիրքերում գտնվող մեր տղաներին կոչ է արել հավաքվել Երևանում: Գասպարյանը ֆեյսբուքյան իր էջում է գրառում կատարել` անդրադառնալով իր և տարածքային կառավարման և ենթակառուցվածքների նախարարի պաշտոնակատար Սուրեն Պապիկյանի զրույցի ձայնագրությանը։
Ինչպես արդեն հայտնել ենք, համացանցում հայտնվել է Գասպարյանի և Պապիկյանի զրույցի ձայնագրությունը, որտեղ Գասպարյանն ասում է, որ «Փաշինյանի հոգեկանը չի դիմանում» և «նա հանուն պետության պետք է գնա»։
Գասպարյանը վստահեցնում է, որ ձայնագրությունը հատվածներով կտրտած է և մոնտաժված, իսկ Փաշինյանի` զինվորներին Երևանում հավաքի կոչը միանշանակ չի ընդունվել շատերի կողմից։
«Դա էր պատճառը, որ Պապիկյանը հորդորում էր սպասել, ոչինչ չանել, մինչև կպարզվի, թե հայտարարությունն իրականում ինչ էր նշանակում: Հենց հաջորդ օրը Նիկոլ Փաշինյանը հայտարարեց, որ բռնությունը կամ բռնության (առավել ևս՝ զինված) հրահրումը որևէ կերպ չի կարող տեղ ունենալ կառավարության գործիքակազմում: Թիմում ծավալված առողջ քննարկման արդյունքում բոլոր հարցերը ստացան իրենց պատասխանները»,–վստահեցնում է Գասպարյանը։
Նրա խոսքով` անգամ մոնտաժված լինելու պարագայում ձայնագրությունից պարզ երևում է, որ այն կապված է կոնկրետ իրադարձության հետ, որն իր պարզաբանումն է ստանալու առավոտյան: Բացի այդ, ըստ Գասպարյանի, ակնհայտ է, որ ձայնագրությունը չի վերաբերում քարոզարշավի փուլին, երբ ԿԸՀ-ում արդեն գրանցված են ընտրություններին մասնակցող քաղաքական ուժերը, դրանց համամասնական ցուցակների առաջին դեմքերը և պրակտիկորեն պարզապես անհնար է որևէ մեկի, տվյալ դեպքում՝ Փաշինյանին փոխարինել որևէ այլ քաղաքական գործչով:
Փաշինյանը հարբած զանգել է Էջմիածնի քաղաքապետին ու վերջին հայհոյանքները տվել. մանրամասներ
Էջմիածնի քաղաքապետը կարծում է, որ ձայնագրությունը հրապարակելը հետապնդում է հանրությանը մոլորության մեջ գցելու, թիմի ներսում պառակտվածության տպավորություն ստեղծելու նպատակ:
«Ես հպարտ եմ, որ մի թիմի անդամ եմ, որտեղ կա խոսքի ազատություն, որտեղ կարող է ծավալվել առողջ քննարկում ցանկացած հարցի շուրջ և որտեղ դրա համար ոչ թե պատժում ու հալածում են, այլ ըմբռնումով և գրկախառնությամբ ընդունում»,–նշված է Գասպարյանի գրառման մեջ։
Էջմիածնի քաղաքապետը նաև լուսանկարներ է հրապարակել, որոնցից մեկու երևում է, թե ինչպես են գրկախառնվել Փաշինյանի հետ. Գասպարյանը նշում է, որ դա երեկ Էջմիածնի իրենց երթի ժամանակ է եղել։
