ՀՀ ԿԸՀ

ԿԸՀ-ում հերթ էր. կուսակցությունները շտապում էին գրանցվել ընտրությունների համար

146
(Թարմացված է 22:03 26.05.2021)
Արտահերթ խորհրդարանական ընտրություններին մասնակցելու են ինչպես հայտնի և փորձառու քաղաքական ուժեր, այնպես էլ նոր բացված կուսակցություններ։

ԵՐԵՎԱՆ, 26 մայիսի - Sputnik․ Կենտրոնական ընտրական հանձնաժողովն ավարտել է արտահերթ խորհրդարանական ընտրություններին մասնակցող քաղաքական ուժերի փաստաթղթերի և նախընտրական ցուցակների ընդունումը:

Վերջնաժամկետից անմիջապես առաջ ԿԸՀ են ժամանել Հայաստանի դեմոկրատական կուսակցության ներկայացուցիչները։ Այդ քաղաքական ուժի ցուցակը կգլխավորի գործարար Տիգրան Արզաքանցյանը, երկրորդը կլինի Դեմոկրատական կուսակցության առաջնորդ Արամ Սարգսյանը, նրան հաջորդում են Նարինե Դիլբարյանը, Ռադիկ Կարապետյանը և Ժասմին Ղևոնդյանը։

«Քաղաքացու որոշում» սոցիալ-դեմոկրատական կուսակցությունը գլխավորում է նրա առաջնորդը Սուրեն Սահակյանը, հաջորդում են Գոռ Հակոբյանը ու Իրինա Հովհաննիսյանը:

«Շիրինյան-Բաբաջանյան» դաշինքի առաջին եռյակում են հայտնվել անկախ պատգամավոր Արման Բաբաջանյանը, Քրիստոնեա-դեմոկրատական կուսակցության առաջնորդ Լևոն Շիրինյանը և փաստաբան Սեդա Սաֆարյանը։

«Ազգային-ժողովրդավարական բևեռ» կուսակցության ցանկում չկա Ժիրայր Սեֆիլյանը։ Փոխարենը առաջին եռյակում են Վահե Գասպարյանը, Վարուժան Ավետիսյանը և Կառա Չոբանյանը։

«Ինքնիշխան Հայաստանի» ցուցակը գլխավորում է Դավիթ Սանասարյանը։ Առաջին եռյակում են Սուրեն Պողոսյանն ու Նարինե Մարտիրոսյանը։

Ծառուկյան, Մելքումյան, Տոնոյան․ հայտնի է ԲՀԿ նախընտրական ցուցակի առաջին տասնյակը

«Հայոց Արծիվներ» կուսակցությունը նույնպես փաստաթղթեր է ներկայացրել ԿԸՀ։ Ցուցակում առաջինը կուսակցության առաջնորդ Խաչիկ Ասրյանն է, եռյակում են Արայիկ Պարոնյանը և Արմինե Վահրամյանը։

«Հանրապետություն» կուսակցությունը նույնպես փաստաթղթեր է ներկայացրել ԿԸՀ։ Կուսակցության թեկնածուները 103-ն են։ Ցուցակը կգլխավորի կուսակցության նախագահ Արամ Սարգսյանը, երկրորդ համարը արդարադատության նախկին նախարար Արտակ Զեյնալյանն է, երրորդը Երևանի ավագանու անդամ Անի Խաչատրյանն է։

«Մենք չենք բացառում գործող իշխանության հետ համագործակցությունը։ Ամեն ինչ կախված է ընտրությունների արդյունքներից, հետագա ընթացքից։ Մենք միայն հաստատապես կոալիցիա չեն կազմի Հոկտեմբերի 27-ի հետ առնչություն ունեցած քաղաքական ուժերի հետ»,- ասաց Անի Խաչատրյանը ԿԸՀ-ում ճեպազրույցի ժամանակ։

«Ազատ Հայրենիք» դաշինքը նույնպես ԿԸՀ ներկայացրեց անհրաժեշտ փաստաթղթերը: Դաշինքում ընդգրկված է հինգ ուժ՝ Հայ կառուցողական կուսակցությունը, Ազգային ինքնորոշում միավորումը, Ազգային ժողովրդավարների դաշինքը, Հայաստանի կանաչների կուսակցությունը, Հայաստանի պահպանողական կուսակցությունը։ Եռյակում են Միքայել Հայրապետյանը, Անդրիաս Ղուկասյանը, Աննման Խաչատրյանը։

«Մեր դիրքորոշումն է, որ ոչ մի դեպքում կոալիցիա չենք կազմելու ոչ իշխող ուժի, ոչ էլ Ռոբերտ Քոչարյանի ու նրա համախոհների հետ: Մեր նպատակն է մեր քաղաքացիների համար ստեղծել արժանի ընտրություն»,- ասել է լրագրողների հետ զրույցում Անդրիաս Ղուկասյանը:

Ղուկասյանը տեղեկացրեց, որ ցուցակում ներառված չէ ԱԻՄ առաջնորդ Պարույր Հայրիկյանը:

5165 ազգային-պահպանողական շարժման ցուցակը գլխավորում է Կարին Տոնոյանը, որին հաջորդում են ժողովրդական երգիչ Արսեն Գրիգորյանը (Մրո) և ուռուցքաբան Գևորգ Թամամյանը:

Փաստաթղթերը ԿԸՀ է ներկայացրել նաև «Զարթոնք» կուսակցությունը։ Ցուցակը գլխավորում է փաստաբանների պալատի նախագահ Արա Զոհրաբյանը, եռյակում են նաև Վահագն Չախալյանը և հոգեբան Կարինե Նալչաջյանը:

«Իմ տունը Հայաստանն է» կուսակցության ցուցակի ներքո համախմբվել են Ռուսաստանի հայերի միության նախագահ Արա Աբրահամյանի թիմը, «Մեր տունը Հայաստանն է» կուսակցությունը, «Ալյանս» կուսակցությունը: Ցուցակը գլխավորում է ԱԺ պատգամավոր Տիգրան Ուրիխանյանը, երկրորդ համարն է սահմանադրագետ Վարդան Այվազյանը, երրորդը` փաստաբան, «Ալյանս»-ի փոխնախագահ Սոնա Գուլքանյանը։

Ռազմական դրություն հայտարարելու քննարկում չկա, ընտրությունները կկայանան. Մակունց

Հայաստանում արտահերթ խորհրդարանական ընտրությունները կայանալու են հունիսի 20-ին։ Մայիսի 26-ին կուսակցությունները ԿԸՀ-ին են ներկայացրել իրենց նախընտրական ցուցակները:

Նախընտրական քարոզարշավը պաշտոնապես կմեկնարկի հունիսի 7-ին։

146
թեգերը:
Հայաստան, Կենտրոնական ընտրական հանձնաժողով (ԿԸՀ), Ընտրություններ
Ըստ թեմայի
Ինչո՞ւ են Ավինյանն ու Միքայելյանը դուրս մնացել ՔՊ ցուցակից. պարզաբանում է քաղտեխնոլոգը
Ռուս փորձագետը հայտարարել է հայ հանրության շրջանում աննախադեպ պառակտման մասին
Հայտնի է «Քաղաքացիական պայմանագիր» կուսակցության նախընտրական ցուցակի առաջին 30 անունը
Սերժ Սարգսյան

Ձեր քվեարկությունից է կախված՝ Արցախը կմնա հայկակա՞ն, թե՞ ոչ. Սերժ Սարգսյան

42
(Թարմացված է 23:19 18.06.2021)
ՀՀ երրորդ նախագահը խոստանում է, որ եթե իրենց դաշինքն իշխանության գա, ապա անհապաղ գաղտնազերծվելու են ճանապարհների ապաշրջափակման գործընթացում իշխանությունների ստանձնած պարտավորությունները։

ԵՐԵՎԱՆ, 18 հունիսի - Sputnik. Մեզանից յուրաքանչյուրի ընտրությունից է կախված՝ արդյոք Սյունիքը, Տավուշը, Գեղարքունիքն ու Վայոց Ձորը կլինե՞ն պաշտպանված, թե՞ ոչ, Արցախը կմնա հայկակա՞ն, թե՞ ոչ։ ՀՀ երրորդ նախագահ Սերժ Սարգսյանը նախընտրական ամփոփիչ խոսքով դիմել է ՀՀ քաղաքացիներին՝ նշելով, որ «Պատիվ ունեմ» դաշինքը կարող է ապահովել անվտանգ, խաղաղ, արժանապատիվ, ազգային և աշխարհի հետ համաքայլ զարգացող, ուժեղ Հայաստանի Հանրապետություն։

«Դուք եք որոշելու, թե ինչպիսին է լինելու մեր պետության ապագան կամ առանց չափազանցության՝ պետություն այլևս լինելո՞ւ է, թե՞ ոչ: Ես ապավինում եմ ձեր ողջամտությանը, ես ուզում եմ հավատալ, որ ձեզ համար միևնույն չէ, թե որքան երիտասարդ կյանքեր զոհաբերվեցին, որպեսզի մեր պապերի այս սրբազան հողի վրա մենք բոլորս շարունակենք սերնդեսերունդ ապրել ազատ, անկախ, հզոր պետության մեջ, որպեսզի ստիպված չլինենք դեգերել օտար ափերում՝ թողած մեր հողն ու ջուրը, որպեսզի մեր եկեղեցիների զանգերը ղողանջեն և կիրակնօրյա պատարագի կանչեն, այլ ոչ թե պատերազմ գուժեն»,- նշել է ՀՀ երրորդ նախագահը։

Նա դիմել է նաև այն քաղաքացիներին, որոնք դեռ չեն կողմնորոշվել իրենց ընտրության հարցում։ Առաջարկել է, որ իրենք իրենց հարց տան՝ ինչի՞ համար էին երեք տարի առաջ իրենք դուրս եկել փողոց, իրենց ինչե՞ր էին խոստացել, և ի՞նչ ստացան:

«Խոսեք պատերազմից վերադարձած ձեր ընկերների, հարևանների ու բարեկամների հետ, լսեք նրանց պատմությունները և կհամոզվեք, թե ինչ անհեթեթ ձևով են պատերազմ վարել այս տգետ և դավաճան իշխանությունները, ինչի պատճառով այսքան զոհեր ու տարածքային կորուստներ ունեցանք: Կրկին վստահել սրանց՝ նշանակում է սեփական ձեռքերի մեջ ձգել նռնակի օղակը, գնալ ինքնաոչնչացման»,- հայտարարել է Սերժ Սարգսյանը։

ՀՀ սահմանների անձեռնմխելիությունը Ռուսաստանի համար «կարմիր գիծ է». Փաշինյան

Նա ընդգծել է՝ այս  կործանարար ընթացքը պետք է կանգնեցնել,  բարձրանալ ծնկած վիճակից, ուղղել մեր մեջքը, օր ու գիշեր նվիրումով աշխատել, որ կարողանանք ապրել ու ապրեցնել, շենացնել մեր երկիրը:

ՀՀ երրորդ նախագահը թվարկել է մի քանի խնդիրներ, որոնք «Պատիվ ունեմ» դաշինքը պետք է լուծի՝ իշխանության գալու դեպքում։

Դրանց թվում են՝ կառավարության կառուցվածքի վերանայումը` առնվազն գյուղատնտեսության, մշակույթի, սփյուռքի նախարարությունների վերականգնում, 44-օրյա պատերազմի հանգամանքները հետաքննող հանձնաժողովի  ստեղծում, Հայաստանի զինված ուժերի արդիականացման նոր ծրագրի մշակում  և այլն։

ՀՀ երրորդ նախագահը նաև խոստանում է՝ «Պատիվ ունեմ»-ի իշխանության գալու դեպքում

պետք է անհապաղ գաղտնազերծվեն ճանապարհների ապաշրջափակման գործընթացի վերաբերյալ նախկին իշխանությունների կողմից ստանձնած պարտավորություններն ու այդ գործընթացում հայկական շահը ներառվի։

«Ես ուզում եմ հունիսի 21-ին գլուխս բարձր գնալ Եռաբլուր, գնալ Ստեփանակերտի հուշահամալիր-պանթեոն և իմ մարտական ընկերներին ասել, որ հայրենիքը, որի համար իրենց կյանքը տվեցին, փրկված է, փրկված է վախկոտ, դավաճան, օտարի շահերը սպասարկող իշխանություններից, և մենք պատվով պահելու ենք մեր հող հայրենին»,- ամփոփել է իր ելույթը ՀՀ երրորդ նախագահ Սերժ Սարգսյանը։

Աննախադեպ խորհրդարան, եթե… ​, կամ քարոզարշավի վերջին օրն ամենաշատը հնչող բառը

Հիշեցնենք, որ Հայաստանում հունիսի 7–ից մեկնարկել է նախընտրական քարոզարշավը։ ԱԺ արտահերթ ընտրությունները կկայանան հունիսի 20–ին։ Դրանց մասնակցում է 21 կուսակցություն և 4 դաշինք։

42
թեգերը:
Արցախյան պատերազմ, Արցախ, Ազգային ժողովի ընտրություններ, «Պատիվ ունեմ» դաշինք, Հայաստան, Սերժ Սարգսյան
թեմա:
ԱԺ արտահերթ ընտրություններ 2021
Ըստ թեմայի
Ռոբերտ Քոչարյանն ասաց` որոնք են երկրի առաջ ծառացած 4 հիմնական խնդիրները
«Քարոզարշավը հաղթարշավ դարձավ». «Հայաստան» դաշինքի քայլերթը` Երևանում. տեսանյութ
«Գինի լիցն» ու հանրահավաքը. Սիրուշոն երգեց՝ ի աջակցություն «Հայաստանի»
Նիկոլ Փաշինյան. արխիվային լուսանկար

Վճռորոշ ընտրություններ, կամ անվտանգության հարց և՛ իշխանության, և՛ ընդդիմության համար

180
(Թարմացված է 23:21 18.06.2021)
Քաղաքական դիտորդները միաբերան ասում են, որ Հայաստանում թշնամանքի ու ագրեսիայի նման մթնոլորտ երբեք չի եղել։

ԵՐԵՎԱՆ, 18 հունիսի -Sputnik. Հայաստանում նախընտրական քարոզարշավն արդեն անցյալում է։ Արտահերթ խորհրդարանական ընտրությունները կկայանան հունիսի 20-ին։ Սա բոլոր առումներով Հայաստանի համար վճռորոշ օր է. քաղաքացիներն ընտրում են հետպատերազմյան առաջին խորհրդարանը, որն էլ կձևավորի կառավարություն։ Քաղաքագետները կանխատեսմամբ` ընտրողների բարձր ակտիվություն է ակնկալվում: Դա միանգամայն սպասելի է՝ հաշվի առնելով հասարակության չափազանց մեծ քաղաքականացվածությունը։ Քաղաքականությունը բառացիորեն յուրաքանչյուրի տուն ու յուրաքանչյուր ընտանիք է մտել:

Բացի այդ, 44-օրյա մարտական գործողությունների արդյունքները, Արցախի մի մասի և շրջակա շրջանների ամբողջական կորուստը, համընդհանուր ընկճախտն և պարտվողի համախտանիշն իրենց հետքն են թողել այս քարոզարշավի վրա։

Պատերազմի թեման շոշափվել է բոլոր ելույթներում, այն փոխադարձ մեղադրանքների և հարաբերությունները պարզելու առիթ է դարձել։ Դիտորդները հիմնական մրցակիցների միջև առճակատման, թշնամանքի ու ատելության հռետորաբանության աննախադեպ մեծ չափ են արձանագրում: Փորձագետները միաբերան պնդում են, որ նման լարվածություն և բևեռացում երբեք չի եղել։

Դա հատկապես վառ էր արտահայտվում վարչապետի պաշտոնակատար Նիկոլ Փաշինյանի ու նրա հիմնական մրցակցի՝ ՀՀ երկրորդ նախագահ Ռոբերտ Քոչարյանի միջև: Հասարակությունը պարբերաբար փոխադարձ սպառնալիքներ էր լսում, ակտիվորեն կիրառում էին «սև PR»–ի տեխնոլոգիաները, գործի էին դրվում վիրավորանքներն ու հայհոյանքները։

Քաղտեխնոլոգ Վիգեն Հակոբյանին չի զարմացրել ընտրությունների մասնակիցների միջև ծավալված իրական «կենաց–մահու» պայքարը։ Նա կարծում է, որ սա անսովոր ընտրություն է՝ իշխանության համար անձնական անվտանգության հարց։

«Իշխող թիմում շատերը հասկանում են, որ իշխանափոխությունը նրանց սպառնում է ոչ միայն ու ոչ այնքան բարեկեցության, ֆինանսների, կարգավիճակի կորուստով, որքան քրեական հետապնդմամբ», - ասաց նա Sputnik Արմենիայի հետ զրույցում:

Մենք մուրճը կօգտագործենք միայն նպատակային. Ռոբերտ Քոչարյան

Ի դեպ, նույնը արդիական է նաև ընդդիմության համար, Փաշինյանի հաղթանակի դեպքում ընդդիմության շատ ներկայացուցիչներ ևս հավանաբար ճաղերի հետևում կհայտնվեն։ Չարժե մտածել, որ վարչապետի պաշտոնակատարի ձեռքում չարաբաստիկ մուրճն ընդամենը ուժի խորհրդանշական ժեստ է։ Եթե նրան հաջողվի վերարտադրվել, ապա Եղվարդի բնակչի նվիրած շինարարական մուրճը սպառնում է վերածվել դատավորի մուրճի։ Դրանով ամեն անգամ հարվածելու է պատմուճանով մարդը՝ հերթական դատավճիռ կայացնելով այսօրվա ընդդիմադիրների դեմ։ Ճաղերի հետևում հայտնվելու  հեռանկարները ստիպում են մրցավազքի ֆավորիտներին բոլոր առկա ռեսուրսները ու պաշարները պայքարի նետել։

Հակոբյանը նշում է, որ ներկայիս քարոզարշավի ընթացքում խաղի հիմնական կանոնները, ինչպես և ընդհանուր մթնոլորտը, թելադրում էր իշխանությունը։ Փաշինյանի թիմը որոշակի պահի հասկացավ, որ կարող է կորցնել իշխանությունը և ընտրեց երկու հիմնական միտք՝ «նախկին ռեժիմի հանցագործություններն» ու  «պողպատե մանդատի» անհրաժեշտությունը, այստեղից էլ խորհրդանշական մուրճը, որը վարչապետի պաշտոնակատարը թափահարում է քարոզարշավի ժամանակ։ Ընդ որում` իշխանությունը հիմնականում ներկայացված է մեկ խոսնակով՝ հենց Փաշինյանով։ Նախկին իշխանության հասցեին էմոցիոնալ ելույթների, գոռոցների ու սպառնալիքների միջոցով նա փորձում էր «լիցքավորել», ոգևորել, կոնսոլիդացնել իր ընտրազանգվածին, համոզել նրանց, որ ամեն ինչ վերահսկողության տակ է։

Քոչարյանի դաշինքն իրեն ավելի շատ ցույց տվեց որպես իշխող թիմի հակապատկեր։ Այստեղ Փաշինյանի ելույթների աղաղակող տոնին հակադրեցին ցուցադրական հանդարտությամբ ու անվրդովությամբ։ Վարչապետի պաշտոնակատարի քննադատություններին ու հարձակումներին Քոչարյանն ու նրա կողմնակիցները պատասխանում էին ավելի հանգիստ։ Բայց հեռակա բանավեճը տեղի էր ունենում բառացիորեն ինտերակտիվ ռեժիմով՝ հաշվի առնելով, որ կողմերը գրեթե միաժամանակ էին անում նախընտրական հանրահավաքներն ու հանդիպումները։

Չկողմնորոշված ընտրողներ Երևանում, բևեռացվածներ` մարզերում. ո՞րն է ԼՀԿ–ի ընտրազանգվածը

Հետաքրքիր է, որ Փաշինյանի հիմնական ընդդիմախոսները՝ Քոչարյանը, Տեր - Պետրոսյանը և Վանեցյանը, հրաժարվեցին նրա հետ ուղիղ եթերում հրապարակային բանավեճից։ Որքան էլ վարչապետի պաշտոնակատարը ձգտում էր նրանց «գորգ» հրավիրել, բոլոր նախկին նախագահները, որոնք այս կամ այն կերպ մասնակցում են ընտրություններին, իրենց անհարիր համարեցին Փաշինյանի հետ հեռուստատեսային «մենամարտի» մտնելը։ Արդյունքում կառավարության ղեկավարի պաշտոնակատարն ավելի փոքր տրամաչափի մասնակիցների հետ մենակ մնաց։

Հակոբյանը կարծում է, որ այդպիսով Փաշինյանի հիմնական հակառակորդները փորձել են արժեզրկել և վարկաբեկել նրա մասնակցությամբ բանավեճի գաղափարը։ Դժվար թե Տեր-Պետրոսյանը կամ Քոչարյանը վախենային, թե Փաշինյանի հետ բանավեճի մեջ հակափաստարկներ չեն ունենա։

«Տեր-Պետրոսյանին ու Քոչարյանին բանավեճի հրավիրելը նույնպես տեխնոլոգիա էր, որը Փաշինյանը որոշեց գործի դնել ղարաբաղյան հարցում սեփական քաղաքականության առավելություններն ու նախորդների թերի լինելը ցուցադրելու համար։ Բայց նախկին նախագահները, լինելով փորձառու քաղաքական գործիչներ, նախընտրական «կուտը չկերան»,, - ասում է քաղտեխնոլոգը։

Հարկ է նշել, որ առաջիկա ընտրությունները տարբերվում են նաև մասնակիցների աննախադեպ առատությամբ: Ի սկզբանե 27 ուժ էր մասնակցության հայտ ներկայացրել։ Սակայն հետո  երկու կուսակցություններ հեռացան, ևս մեկ թեկնածուի՝ գործարար Տիգրան Արզաքանցյանին, որը Դեմոկրատական կուսակցության վարչապետի թեկնածուն էր, ԿԸՀ-ն կրթական ցենզի «բացակայության» պատճառով «որակազրկեց»:

Արդյունքում պատգամավորական մանդատների համար կպայքարեն 25 ուժ` 21 կուսակցություն և 4 դաշինք։ Ամեն դեպքում փոքր Հայաստանի համար դա չափազանց շատ է։

180
թեգերը:
քարոզարշավ, ընդդիմություն, Իշխանություն, Լևոն Տեր–Պետրոսյան, Նիկոլ Փաշինյան, Ռոբերտ Քոչարյան, Ազգային ժողովի ընտրություններ, Հայաստան
թեմա:
ԱԺ արտահերթ ընտրություններ 2021
Ըստ թեմայի
«Գինի լիցն» ու հանրահավաքը. Սիրուշոն երգեց՝ ի աջակցություն «Հայաստանի»
Աննախադեպ խորհրդարան, եթե… ​, կամ քարոզարշավի վերջին օրն ամենաշատը հնչող բառը
Քաղաքական ուժերի նախընտրական խոստումները, կամ ինչպես վերականգնել տնտեսությունը
Պուգաչովայի և Գալկինի զավակները

«Սա հիթ է». Գարի և Լիզա Գալկինները հայրիկի ծննդյան օրն անակնկալ են մատուցել. տեսանյութ

31
(Թարմացված է 23:59 18.06.2021)
Ալլա Պուգաչովան երեխաների հետ երաժշտական համար է նախապատրաստել հայտնի շոումեն ամուսնու համար։

ԵՐԵՎԱՆ, 18 հունիսի – Sputnik. Մաքսիմ Գալկինի և Ալլա Պուգաչովայի երեխաները` Գարին և Լիզան, որոշել են ուրախացնել հայրիկին արտասովոր շնորհավորանքով։ Հայտնի երգիծաբան և հեռուստահաղորդավար Մաքսիմ Գալկինը հունիսի 18-ին 45 տարեկան դարձավ։

Մեկնաբանություններում օգտատերերը նշել են, որ Գալկինն ու Պուգաչովան հրաշալի ընտանիք ունեն, երեխաներն էլ շատ դաստիարակված են։ Նրանց տոնական երգը հավանության արժանացել շատերի կողմից։

Արտիստը շնորհավորանքներ է ստանում ընկերներից, գործընկերներից և երկրպագուներից։  Բայց նախևառաջ ընտանիքի անդամներից։ Գարի և Լիզա Գալկինները հոր համար ռեփ են կատարել։ Այդ երգով նրանք շնորհավորել են հայրիկի ծննդյան օրն ու նշել, որ «նա արժանի և խելացի, օրինակելի, հավատարիմ և ուժեղ տղամարդ է մեծացել»։

Գարին և Լիզան խոստովանել են, որ ուրախ են նրա երեխաները լինելու համար և ուզում են նրա պես լինել։

«Սա հիթ է», «Վաու։ Ինչ հիանալի շնորհավորանք է։ Երեխաները հրաշք են», «Որքան լավ է նման բան տեսնելն ու լսելը», «Բրավո ռեփի աստղերին», – այսպիսի մեկնաբանություններ են թողել Գալկինի երկրպագուները։

Ալլա Պուգաչովան և Մաքսիմ Գալկինն ամուսնացած են 2011 թվականից։ Ամուսինները երկու երեխա են դաստիարակում` երկվորյակներ Լիզային և Գարիին։ Հեռուստահաղորդավար և երգիծաբան Գալկինի  համար սա առաջին ամուսնությունն է, երգչուհու համար` հինգերորդը։ Պուգաչովայի ավագ դուստրը` հայտնի երգչուհի Կրիստինա Օրբակայտեն, 50 տարեկան է։

 

31
թեգերը:
ծնունդ, երեխա, Մաքսիմ Գալկին, Ալլա Պուգաչովա
Ըստ թեմայի
Գալկինը հիանում է կնոջով, իսկ հետևորդներն այդ տեսանյութը տհաճ ու տարօրինակ են համարում
Ինչպես է հաջողվում 9 տարի շարունակ ապրել միասին. Գալկինը փակագծեր է բացել
Ծիրանագույնից մինչև «Կիմ Չեն Քարդաշյան»․ Գարիկ Մարտիրոսյանը զվարճացրել է հետևորդներին