ԵՐԵՎԱՆ, 15 մայիսի - Sputnik. Գեղարքունիքի մարզի Կութ համայնքում այս պահին ամեն ինչ խաղաղ է, ադրբեջանցիների կողմից ավելորդ շարժ չի նկատվում։ Կողմերը պայմանավորվել են վաղը բանակցությունները շարունակել։ Sputnik Արմենիայի հետ զրույցում տեղեկությունը հայտնեց Գեղամասար խոշորացված համայնքի ղեկավար Հակոբ Ավետյանը։
«Այսօրվա դրությամբ դեռ ոչ մի արդյունք չկա, կողմերը փոխհամաձայնության չեն եկել։ Իրենք նույն դիրքում են, նույն վայրում, տեղաշարժ չի եղել։ Այս պահին ճիշտ է` վիճակը լարված, բայց կայուն է։ Սպասում են վաղվա բանակցություններին»,- ասաց նա։
Հակոբ Ավետյանի կարծիքով`եթե բանակցություններն արդյունավետ ընթանան`ադրբեջանցիները հետ կգնան ելման դիրքեր, եթե ոչ` բախումներն անխուսափելի են։
«Վաղը որոշիչ օր է` կամ այս կողմ, կամ այն կողմ։ Եթե վաղը իրենց հրամանատարությունը հրաման տա, որ հետ գնան`հրաման կատարողները կգնան»,- նշեց Ավետյանը։
Գեղամասար համայնքի ղեկավարը հավաստիացնում է` մինչ այս պահը Կութի և Նորաբակի ուղղությամբ հայ-ադրբեջանական սահմանը հատած հակառակորդի զինծառայողների կողմից որևէ կրակոց կամ բախում չի եղել, հույս ունի` բանը դրան չի հասնի։
Հիշեցնենք, որ ադրբեջանցիները մայիսի 12-ին խախտել են Հայաստանի սահմանները Սյունիքի ու Գեղարքունիքի մարզերում։
Հայաստանը հարցի առնչությամբ դիմել է ՀԱՊԿ-ին։
Ադրբեջանցիները մոտ 500 մ առաջ են եկել Ակներ գյուղի ուղղությամբ. գյուղապետ
