ԵՐԵՎԱՆ, 23 մարտի — Sputnik. ՀՀ պաշտպանության նախկին նախարար Սեյրան Օհանյանն այսօր լրագրողների հետ զրույցում ասել է, որ Գլխավոր շտաբում տիրող իրավիճակը վարչապետ Նիկոլ Փաշինյանի կամայականությունների արդյունքն է։
«Կառավարության ղեկավարը չի հասկանում բանակում «հներ» ունենալու կարևորությունը։ Հներ զինվորականության մեջ նշանակում է փորձ, մարտական ունակություններ, ռազմական կյանքի լիարժեք պատկերացումներ։ ՀՀ զինված ուժերի գլխավոր շտաբն իր հայտարարությամբ իրադրությունը գնահատել է ու ցանկացել է ժողովրդի հետ լինել։ Իսկ ժողովրդի մեծ մասը պահանջում է, որ այս պարտված իշխանությունը հեռանա», - ասաց Օհանյանը։
Նրա համար անընդունելի է ԳՇ–ի կարևորագույն պատշոնների հաճախակի ազատումներն ու նշանակումները։
«Օնիկ Գասպարյանը փորձառու անձնավորություն է, իսկ նշանակված նոր շտաբի պետը (Արտակ Դավթյան – խմբ.) որոշ ժամանակ առաջ ազատվել էր վարչապետի կողմից։ Կասեմ նաև, որ Մովսես Հակոբյանի ու ՊԲ նախկին հրամանատար Լևոն Մնացականյանի` պաշտոններից ազատումը չափազանց բացասական կերպով է ազդել մարտական գործողությունների ընթացքի վրա», – ասաց ՀՀ պաշտպանության նախկին նախարարը։
Դատարանի կայացրած որոշմամբ Օնիկ Գասպարյանը չի կարող վերականգնվել իր պաշտոնում. նախարար
ՊՆ նախկին ղեկավարը վստահ է, որ ամեն դեպքում հայկական բանակն այն կառույցն է, որ դժվար իրավիճակից ամենաարագը կարող է դուրս գալ։
Հիշեցնենք, որ Հայաստանում ներքաղաքական իրավիճակը սրվեց, երբ ԶՈւ գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը։ Ի պատասխան Նիկոլ Փաշինյանը հայտարարեց, որ ստորագրել է ԳՇ շտաբի պետ Օնիկ Գասպարյանին պաշտոնից հեռացնելու փաստաթուղթը։ Մարտի 22-ին այդ պաշտոնում նշանակվեց Արտակ Դավթյանը։
