ԵՐԵՎԱՆ, 18 մարտի - Sputnik. Արտահերթ ընտրությունների օրը կհրապարակվի այսօր կամ վաղը։ Կառավարության նիստից հետո լրագրողների հետ զրույցում ասաց շրջակա միջավայրի նախարար Ռոմանոս Պետրոսյանը։
«Իշխանությունն առաջիկայում պատրաստվում է արտահերթ ընտրությունների գնալ։ Այսօր-վաղը, կարծում եմ, որոշումը կհրապարակվի»,–ասաց Պետրոսյանը։
Նրա խոսքով` չնայած խորհրդարանական և արտախորհրդարանական ուժերի կողմից արտահերթ ընտրությունների առնչությամբ հնչեցված մերժումներին՝ ճգնաժամն այդպես էլ չի հանգուցալուծվում։ Բացի այդ, ըստ նրա, ընդդիմության փողոցային պայքարն էլ որևէ էական նշանակություն չունեցավ ու հանրության կողմից չողջունվեց, ինչի մասին էին փաստում հանրահավաքներին մարդկանց մասնակցության պատկերը։
Պետրոսյանը նշեց, որ քաղաքական պրոցեսների սահմանադրական ճանապարհով հանգուցալուծումը տեսնում են միայն արտահերթ ընտրությունների միջոցով։ Նրա խոսքով` արդեն ժամանակն էր իրավիճակը հանգուցալուծման տանելու։
Լրագրողները հետաքրքրվեցին` ինչպե՞ս է պատկերացնում նման լարված մթնոլորտում քարոզարշավ իրականացնելը, երբ վարչապետ Նիկոլ Փաշինյանը երկրում շրջում է բազմաթիվ ոստիկանների ուղեկցությամբ։ Ի պատասխան Պետրոսյանը նշեց, որ կան երկրի առաջին դեպքերի հանդեպ մահափորձի նախապատրաստման դեպքերով քրգործեր, ինչպես նաև որոշ շրջանակների կողմից կյանքի նկատմամբ սպառնալիքներ։
Հավելենք, որ վարչապետ Նիկոլ Փաշինյանի հրաժարականի պահանջով ընդդիմադիր Հայրենիքի փրկության շարժումը փետրվարի 25-ից անժամկետ նստացույց է սկսել մայրաքաղաքի Բաղրամյան պողոտայում։
Ընդդիմադիրները պահանջում են, որ ժամանակավոր կառավարություն ստեղծվի՝ Վազգեն Մանուկյանի գլխավորությամբ, ապա, մոտ մեկ տարի անց՝ խորհրդարանական արտահերթ ընտրություններ անցկացվեն։
«Ժամկետը կարևոր է, քանի որ ճգնաժամը խորն է». Մարուքյանը ընտրությունների վերջնաժամկետ նշեց
Իշխանությունները, սակայն, առաջարկում են քննարկել արտահերթ ընտրություններ անցկացնելու հարցը, բայց առանց նոր վարչապետի։
