ԵՐԵՎԱՆ, 30 հունվարի – Sputnik. ՀՀ ԱԺ «Բարգավաճ Հայաստան» խմբակցության անդամ Նաիրա Զոհրաբյանը Facebook-ում վերլուծել է ՀՀ վարչապետ Նիկոլ Փաշինյանի` Շուշիի մասին հայտարարության այսօրվա մեկնաբանությունը:
«Եթե Նիկոլ Փաշինյանն ընդուներ Վլադիմիր Պուտինի առաջարկն ու հոկտեմբերի 19-ին կանգնեցներ պատերազմը, ինչին, ի դեպ, համաձայնել էր Ալիևը, ապա Շուշին կմնար հայկական վերահսկողության տակ, զոհերի թիվը չէր լինի այսքան աղետալի, որովհետև ըստ պաշտոնական թվերի, հոկտեմբերի 19-ի դրությամբ մենք ունեինք 729 զոհ, Արցախի տարածքի զգալի մասը չէինք կորցնի, որովհետև հոկտեմբերի 19-ի դրությամբ թուրքը գրավել էր Արցախի հարավից դեռ որոշակի հատվածներ միայն։ Եթե Նիկոլը ընդուներ Պուտինի առաջարկը, ու պատերազմը կանգներ, հազարավոր պայծառ տղաներ այսօր ողջ կլինեին»,- Փաշինյանի Facebook-յան ուղիղ եթերից հետո գրել է Զոհրաբյանը:
Նրա խոսքով` ադրբեջանցի փախստականների հնարավոր վերադարձը Շուշի, որով Փաշինյանը հիմա փորձում է արդարացնել Շուշիի հանձնումը, ընդամենը գավառական բլեֆ է։
«Եթե Շուշին մնար մերը, ապա որևէ անվտանգության երաշխիքի դեպքում մեկ ադրբեջանցի անգամ Շուշի չէր վերադառնա»,- համոզմունք է հայտնում Զոհրաբյանը:
Ընդդիմադիր պատգամավորը համոզված է նաև, որ այդ առաջարկն ընդունելով` Փաշինյանը կարող էր հոկտեմբերի 19-ին պատերազմը կանգնեցնել, բայց չարեց դա:
Զոհրաբյանը նաև հիշեցնում է Շուշիի քաղաքապետի՝ օրերս արած հայտարարությունն այն մասին, որ 2008 թվականից Շուշիի բնակֆոնդը սպառված է եղել, և որևէ ադրբեջանցի անգամ տեխնիկապես չէր կարող վերադառնալ Շուշի:
«Բայց եթե անգամ տեսականորեն ընդունենք այն ցնդաբանությունը, որ հենց հաջորդ օրը բոլոր ադրբեջանցիները հավաքելու էին իրենց ճամպրուկները ու գալու էին Շուշի ապրելու, այո՛, անգամ այդ տարբերակով պիտի հոկտեմբերի 19-ին պատերազմը կանգնեցվեր, որովհետև այդ դեպքում մենք կունենայինք մի քանի հազար անգամ քիչ զոհ, այդ դեպքում մենք կունենայինք Արցախից ընդամենը շատ փոքր հարավային մասում կորուստ, և այդ դեպքում Շուշին կլիներ հայկական վերահսկողության տակ։ Սակայն դա անհնար սցենար էր. որևէ ադրբեջանցի Շուշի չէր վերադառնալու, և վերջ»,- գրում է պատգամավորը:
Հիշեցնենք՝ վարչապետ Նիկոլ Փաշինյանը, ինչպես խոստացել էր հունվարի 28-ին «Եռաբլուր» զինվորական պանթեոնում, այսօր Facebook-ի ուղիղ եթերում մեկնաբանեց Շուշիի՝ հայկական քաղաք լինել-չլինելու մասին ԱԺ-ում արած իր հայտարարությունը:
Փաշինյանը մասնավորապես ասաց, որ այդ հայտարարությունն արել է ադրբեջանցի փախստականների վերադարձի և 1992թ-ի ժողովրդագրական ստատուս քվոն վերականգնելու մասին Ադրբեջանի պահանջի համատեքստում:
