Թուրքական Bayraktar TB2 ԱԹՍ

Խոցված դրոնների ուժեղ և թույլ կողմերը. արժե՞ վախենալ թուրքական ԱԹՍ-ներից

754
(Թարմացված է 19:35 29.07.2020)
Հաշվի առնելով, թե ինչպիսի համառությամբ է Անկարան Բաքվին սեփական արտադրության անօդաչուներ առաջարկում` չի բացառվում, որ հայկական բանակն ապագայում կարող է բախվել այդ դրոններին։ Նշանակում է՝ հիմա արդեն պետք է սկսել դրանց դեմ պայքարի մարտավարությամբ զինվել։

ԵՐԵՎԱՆ, 28 հուլիսի -  Sputnik. Վերջերս Տավուշի մարզում՝ հայ-ադրբեջանական սահմանին տեղի ունեցած մարտերը մեծ հետաքրքրություն են առաջացրել անօդաչու թռչող սարքերի նկատմամբ։ Դրան նպաստեցին մի քանի հանգամանք և առաջին հերթին՝ հայկական բանակի հաջող գործողությունները։

Турецкий беспилотник Bayraktar TB2
Թուրքական Bayraktar TB2 ԱԹՍ–ն

Մարտերի հաշված օրերի ընթացքում խոցվեց 14 իսրայելական արտադրության կամ մշակման ադրբեջանական ԱԹՍ, իսկ հայկական արտադրության դրոնները մարտական մկրտություն ստացան։ Ավելին, պաշտպանության նախարարության տեղեկություններով՝ երկու ադրբեջանցի բարձրաստիճան զինվորականների մահը հենց հայկական ԱԹՍ-ների հարվածի արդյունքն էր։

Եվ ահա, Տավուշում մարտական գործողությունների ակտիվ փուլի ավարտից անմիջապես հետո տեղի ունեցան հայ-ռուսական ՀՕՊ զորքերի զորավարժությունները, ինչի մասին  արդեն հայտնել ենք նախորդ հրապարակումներում։ Այդ զորավարժությունների ընթացքում, ինչպես հայտնում է ՊՆ-ն, վերլուծել են հակամարտության սրման օդային, մասնավորապես՝ «անօդաչու» բաղադրիչը։ Այլ կերպ ասած՝ քննարկվել են խոցված դրոնների ուժեղ և թույլ կողմերը, դրանց հակազդելու մարտավարությունը և մի շարք այլ հարցեր։

Այնուամենայնիվ, մի շարք ռուսաստանցի դիտորդների կարծիքով, դժվար թե հայ և ռուս զինվորականները սահմանափակվեին միայն ադրբեջանական ԶՈւ խոցված դրոնների ուսումնասիրությամբ։ Բանն այն է, որ Թուրքիան ևս ակտիվորեն իր տեղն է փնտրում դրոնների համաշխարհային շուկայում։

Թուրքական արտադրության Bayraktar TB2 ԱԹՍ-ներն այս տարվա փետրվար-մարտին կիրառվում էին Իդլիբ գավառում՝ սիրիական բանակի դեմ մարտական գործողությունների ընթացքում։ Իսկ տավուշյան սրացումից հետո ադրբեջանական և թուրքական մամուլում բազմաթիվ հրապարակումներ հայտնվեցին Ադրբեջանին այդ սարքավորումների հնարավոր մատակարարման մասին։

Դա թույլ է տալիս ենթադրել, որ ապագայում հայ զինվորականները ստիպված են լինելու բախվել այդ ԱԹՍ-ների հետ։ ԱՊՀ երկրների ինստիտուտի Կովկասի բաժնի վարիչ, ռազմական փորձագետ Վլադիմիր Եվսեևը կարծում է, որ այս ամենը հաշվի առնելով, ՌԴ հակաօդային պաշտպանության մասնագետները վերջին զորավարժությունների ընթացքում կարող էին ներկայացնել թուրքական դրոնների չեզոքացման իրենց փորձը։ Նրանք այդ դրոնների հետ միջնորդավորված կերպով բախվել են Սիրիայի և Լիբիայի մարտական գործողությունների թատերաբեմում։

Պուտինը և Էրդողանը քննարկել են հայ-ադրբեջանական սահմանին տիրող իրավիճակը

«Միանգամայն բնական եմ համարում Լիբիայում և Սիրիայում մարտական գործողությունների ընթացքում ստացած տեղեկությունները փոխանակելը։ Երկու երկրներում էլ ակտիվորեն օգտագործվել են թուրքական ԱԹՍ-ները։ Հայ զինծառայողներին շատ օգտակար կլինի տեղեկություններ ստանալ այդ հարվածային դրոնի ոչ միայն մարտավարական-տեխնիկական բնութագրիչների (նկատի ունի «Բայրակտարները»՝ խմբ․), այլև դրա կիրառման մասին։ Ընդ որում՝ կիրառման տակտիկան կարող է լինել ինչպես անհատական, այնպես է «պարսաձև»»,-ասել է Եվսեևը Sputnik Արմենիային տված հարցազրույցում։

Նրա խոսքերն անուղղակիորեն հաստատում են հայ-ռուսական զորավարժությունների կադրերը, որոնք, ըստ երևույթին պատահաբար հայտնվել են պաշտպանության նախարարության «Զինուժ» հաղորդման տեսախցիկի օբյեկտիվում։ Կադրերում երևում է, թե ինչպես է վարժանքների ժամանակ էկրանին հայտնվում Bayraktar TB2-ի՝ համացանցում ամենատարածված նկարներից մեկը։

Ի դեպ, ՊՆ-ում թուրքական դրոնների մարտավարական-տեխնիկական բնութագրիչների քննարկման մասին տեղեկությունը ոչ հաստատեցին, ոչ էլ հերքեցին։

Եվսեևի խոսքով՝ մեծ հետաքրքրություն է ներկայացնում այդ ԱԹՍ-ների դեմ ոչ միայն հարվածային համակարգերի, այլև ռադիոէլեկտրոնային պայքարի միջոցների կիրառման հնարավորությունը։ Ռուսաստանն արդեն Հայաստանին մատակարարել է ռադիոէլեկտրոնային պայքարի ժամանակակից սարքավորումներ, և դրանք կարող են հաջողությամբ կիրառվել «Բայրակտարների» դեմ։ 

«Ամեն դեպքում, պետք է պատրաստ լինել, որ ադրբեջանական բանակի ձեռքում, ի լրումն իսրայելական ԱԹՍ-ների, կարող են հայտնվել նաև դրանց թուրքական տարբերակները»,-ավելացրեց մեր զրուցակիցը։

Նրա հետ համաձայն է ռազմական վերլուծաբան Վիկտոր Լիտովկինը։ Նա Sputnik Արմենիային հայտնեց, որ չի կարծում, թե ինչ-որ հատուկ գաղտնիքներ կան, որոնք ռուսաստանցի զինվորականները կթաքցնեին հայ հրետանավորներից։

«Չնայած, մյուս կողմից, եթե հայկական զինված ուժերն արդեն իսրայելական արտադրության դրոնների դեմ բարեհաջող պայքարի հմտություններ մշակել են, չեմ կարծում, թե թուրքական ԱԹՍ-ները դրանցից շատ են տարբերվում»,-ավելացրեց Լիտովկինը։

Կմշակվեն ԱԹՍ-ի դեմ պայքարի նոր ձևեր. ՀՀ–ում պլանային վարժանքներ են մեկնարկել

Հարկ է նշել, որ Սիրիայում թուրքական դրոնների դեմ հաջողությամբ կիրառվել են Բաշար Ասադի բանակի տրամադրության տակ գտնվող «Բուկ Մ2Է» զենիթահրթիռային համալիրները։

Հայկական բանակը նույնպես «Բուկ»-եր ունի, սակայն Եվսեևը պնդում է, որ Bayraktar TB2-ի դեմ կարելի է պայքարել նաև Հայաստանում արդիականացված Оса АКМ զենիթահրթիռային համալրիներով։ «Իշամեղուները» (Оса`թարգմ․) իրենց լավ են դրսևորել Տավուշի իրադարձություններում, մասնավորապես հենց դրանցով է խոցվել Ադրբեջանի Hermes 900 թանկարժեք հետախուզական դրոնը։

754
թեգերը:
Ռուսաստան, Հայաստան, Տավուշ, Սահման, հայ-ադրբեջանական, Ադրբեջան, Թուրքիա, Elbit Hermes 900 ԱԹՍ, անօդաչու թռչող սարք
Ըստ թեմայի
«Սիրուն է, չէ՞». Արծրուն Հովհաննիսյանը հրապարակել է խոցված ԱԹՍ–ի լուսանկարները
Հրապարակվել է ՀՀ ԶՈւ-երի կողմից խոցված ադրբեջանական ԱԹՍ-ի լուսանկարը
Ինչ կլինի այն երկրների հետ, որոնք կուշանան ԱԹՍ-ների մրցավազքից. Վրթանեսյանի տեսակետը
Ադրբեջանի Միլի Մեջլիսը

Դիվանագիտական սկանդալ․ Բաքվում խմբագրել են Արցախի վերաբերյալ հաղորդագրությունը

536
(Թարմացված է 23:55 23.09.2020)
Միլի Մեջլսի կայքում հրապարակված մամուլի հաղորդագրության հեղինակները հիմնովին փոխել են հայտարարության տեքստը` դրանից հանելով արտահայտություններ, որոնք դիվանագիտական սկանդալի պատճառ են դարձել։

ԵՐԵՎԱՆ, 23 սեպտեմբերի – Sputnik. ՌԴ ԱԳՆ պաշտոնական ներկայացուցիչ Մարիա Զախարովայի այն հայտարարությունից հետո, որ նախարար Սերգեյ Լավրովի խոսքերը սխալ են մեկնաբանվել, Ադրբեջանի խորհրդարանի մամուլի ծառայությունը փոխել է հաղորդագրության տեքստը։

Пресс-релиз парламента Азербайджана в первоначальной версии
Ադրբեջանի խորհրդարանի մամուլի հաղորդագրության սկզբնական տարբերակը
Пресс-релиз парламента Азербайджана после брифинга Марии Захаровой
Մամուլի հաղորդագրության խմբագրված տարբերակը՝ Մարիա Զախարովայի ճեպազրույցից հետո

Սեպտեմբերի 23-ին Միլի Մեջլիսի նախագահ Սահիբա Գաֆարովայի գլխավորած խորհրդարանական պատվիրակությունը հանդիպում ունեցավ ՌԴ արտգործնախարար Սերգեյ Լավրովի հետ։ Հանդիպման արդյունքում Ադրբեջանի խորհրդարանի կայքում տեղեկություն հայտնվեց, թե իբր ՌԴ արտգործնախարարը հայտարարել է, որ «ՀՀ վարչապետ Նիկոլ Փաշինյանի խոսքերը` կապված ԼՂՀ–ի հետ, խոչընդոտում են հակամարտության կարգավորման գործընթացը»։

Մամուլի հաղորդագրության մեջ նաև այսպիսի մի արտահայտություն կար, որը վերագրվել էր Լավրովին. «Սա պաշտոնական Մոսկվայի դիրքորոշումն է։ Ռուսական կողմը կարգավորման գործընթացում հանդես է գալիս 5 «օկուպացված» շրջանները վերադարձնելու, տարածքում խաղաղապահներին տեղակայելու և տրանսպորտային հաղորդակցման համակարգը վերականգնելու օգտին»։

Պատասխանելով Sputnik–ի հարցին՝ Զախարովան ընդգծել էր, որ Ռուսաստանի դիրքորոշումն այդ հարցի առնչությամբ քաջ հայտնի է։ Նա խնդրել էր այսուհետ կողմնորոշվել հենց այդ դիրքորոշմամբ, այլ ոչ թե «տարատեսակ մեկնաբանություններով, որոնք արվում են ոչ ռուսական կողմից»։

Ինչ վերաբերում է ԼՂՀ հակամարտության կարգավորմանը, ապա այսօր ադրբեջանական կողմի հետ Լավրովի հանդիպման ընթացքում, ըստ նրա, քննարկվել են հակամարտության կարգավորման` նախկինում հնչած հիմնական սկզբունքները, «որոնք ենթադրում են ԼՂՀ կարգավիճակի հարցի լուծում, ինչպես նաև դրա շուրջ գտնվող տարածքների ազատում»։

Եվ ահա դիվանագիտական սկանդալից հետո Ադրբեջանի խորհրդարանի կայքում հրապարակված հաղորդագրության տեքստը խմբագրվել է, մեջբերումը գլխիվայր փոփոխվել, իսկ Նիկոլ Փաշինյանի մասին հիշատակումը, «օկուպացված 5 տարածքների վերադարձի» և «խաղաղապահների տեղակայման» մասին խոսքերն անհետացել ։

«Սերգեյ Լավրովը ԼՂՀ հակամարտության առնչությամբ հայտարարել էր, որ Ռուսաստանը որպես ԵԱՀԿ ՄԽ համանախագահ աջակցում է խնդրի լուծմանն ու ջանք չի խնայում այս ոլորտում։ Ռուսաստանը սատարում է Ադրբեջանի տարածքային ամբողջականությանը»,– նշված է փոփոխված տարբերակում։

Բացի այդ, այս մեջբերումից առաջ երկու նախադասություն է հայտնվել Գաֆարովային վերագրվող, որոնք չկային նախորդ տարբերակում։ Ահա դրանք. «Ցանկացած դեպքում Ադրբեջանը կազատի իր հողերը բռնազավթումից։ Ադրբեջանցի ժողովուրդը երբեք թույլ չի տա իր տարածքում երկրորդ հայկական պետություն ստեղծել»։

Ավելի վաղ ՀՀ ԱԳՆ–ից Sputnik Արմենիային հայտնել էին, որ ադրբեջանական հաղորդագրությունները տեղեկատվության հուսալի աղբյուր չեն։

536
թեգերը:
Նիկոլ Փաշինյան, Արտաքին գործերի նախարարություն (ԱԳՆ), Ղարաբաղյան հակամարտություն, Մարիա Զախարովա, Սերգեյ Լավրով, Ադրբեջան, Հայաստան
Ըստ թեմայի
Ադրբեջանական կողմի գործողությունները սահմանին մեծացնում են լարվածությունը. Ստեփանյան
Տեղեկություններ կան, որ օտարերկրյա ահաբեկիչ զինյալներ են տեղափոխվել Ադրբեջան. Մնացականյան
Ադրբեջանական ԶԼՄ–ները փորձել են Շահումյանի հայկական եկեղեցին ներկայացնել որպես ալբանական
Նախապայման դնում է Ադրբեջանը. Փաշինյանն արձագանքել է համանախագահների առաջարկին
ԿԸՀ

Հայտնի է՝ ով կստանա Ջուլֆալակյանի մանդատը. ԿԸՀ որոշումը

97
(Թարմացված է 16:26 23.09.2020)
Ջուլֆալակյանը վայր էր դրել պատգամավորական մանդատը ԿԳՄՍ նախարար Արայիկ Հարությունյանի հետ սկզբունքային տարաձայնությունների պատճառով:

ԵՐԵՎԱՆ, 23 սեպտեմբերի - Sputnik. Սեպտեմբերի 23-ին կայացած նիստում Հայաստանի կենտրոնական ընտրական հանձնաժողովը արձանագրություն է կազմել իշխող «Իմ քայլը» դաշինքից Արսեն Ջուլֆալակյանին սեփական դիմումի հիման վրա պատգամավորական մանդատից զրկելու մասին, տեղեկացնում են ԿԸՀ-ից։

Մեկ այլ արձանագրությամբ ԿԸՀ-ն հաստատել է մանդատը Նարեկ Ղահրամանյանին փոխանցելու մասին արձանագրությունը, ով Ջուլֆալակյանից հետո հաջորդն էր իշխող «Իմ քայլը» դաշինքի համամասնական ցուցակում:

Հիշեցնենք, որ օրեր առաջ Ջուլֆալակյանը վայր էր դրել պատգամավորական մանդատը ԿԳՄՍ նախարար Արայիկ Հարությունյանի հետ սկզբունքային տարաձայնությունների պատճառով:

Ջուլֆալակյանը նախորդ ամիսներին որևէ հարց չի ուղղել ինձ. նախարարը հստակեցում է պահանջում

97
թեգերը:
Կենտրոնական ընտրական հանձնաժողով (ԿԸՀ), մանդատ, Արսեն Ջուլֆալակյան
Ըստ թեմայի
Ջուլֆալակյանին չեն պարտադրել. Լիլիթ Մակունց
Արսեն Ջուլֆալակյանը վայր է դնում պատգամավորական մանդատը. պատճառը Արայիկ Հարությունյանն է
Արմեն Փամբուխչյանը հրաժարվել է պատգամավորական մանդատից
Հայաստանում ՌԴ դեսպանատուն

«Ազատություն» ռադիոկայանը ընտրողաբար է ներկայացրել մեր մեկնաբանությունը». ՌԴ դեսպանություն

1
(Թարմացված է 20:59 24.09.2020)
Մեդիայի հրապարակման մեջ հնչում է այն միտքը, որ Ռուսաստանը հատուկ չի բացում սահմանները Հայաստանի հետ`ելնելով իր «կայսերական ու ճնշող քաղաքականությունից»։

ԵՐԵՎԱՆ, 24 սեպտեմբերի – Sputnik. Հայաստանում Ռուսաստանի դեսպանությունը հաղորդագրություն է տարածել, որով անդրադարձել է «Ազատություն» ռադիոկայանի հայկական ծառայության՝ «Ուզում ենք գնալ Ռուսաստան, չենք կարողանում». բողոքի ակցիա կառավարության շենքի դիմաց» հրապարակմանը։ Հրապարակման մեջ հնչում է այն միտքը, որ Ռուսաստանը հատուկ չի բացում սահմանները Հայաստանի հետ`ելնելով իր «կայսերական ու ճնշող քաղաքականությունից»։

«Կորոնավիրուսի համաճարակի պատճառով ժամանակավորապես դադարած ավիահաղորդակցության խնդիրը անբարեխիղճ կերպով օգտագործվում է քաղաքական երանգներ հաղորդելու համար։ Նյութում ասվում է, որ ավիաչվերթերի վերսկսման հարցի լուծումը տրվում է բացառապես քաղաքական հարթության մեջ և, իբր, կախված է ռուսական կողմի որոշակի «քաղաքական պահանջներից»։ Անհեթեթ է թվում նաև այն թեզը, թե Ռուսաստանն այս իրավիճակն օգտագործում է ներքին լարվածությունը սրելու համար ՝ հետագայում «օգուտ կորզելու» նպատակով, ինչը, իբր, «կայսերական քաղաքականության» դրսևորում է»,– նշված է հաղորդագրության մեջ։

Դեսպանատան դիտարկմամբ` մեդիան ընտրողաբար է ներկայացրել դեսպանության մեկնաբանությունը` պատասխանից վերցնելով մի  հատված, որը հստակ պատկերացում չի տալիս ստեղծված իրավիճակի մասին։ Նրանց համար, ովքեր հետաքրքրված են խնդրով, դեսպանատունը ներկայացրել է լրատվամիջոցին ներկայացված մեկնաբանության ամբողջական տարբերակը։

«Ձեր հարցմանն ի պատասխան հայտնում ենք, որ Ռուսաստանի տարածքում նոր կորոնավիրուսային վարակի տարածման կանխման օպերատիվ շտաբի կողմից որոշում է ընդունվել 2020 թվականի սեպտեմբերի 21-ից Ղազախստանի, Ղրղզստանի և Բելառուսի, իսկ 2020 թվականի սեպտեմբերի 27-ից ՝ Հարավային Կորեայի հետ փոխադարձ հիմունքներով միջազգային ավիահաղորդակցությունը վերսկսելու մասին: Նշված երկրներ չվերթերը կիրականացվեն փոխադարձ հիմունքներով ՝ շաբաթական մեկ անգամ պարբերականությամբ։ Որքան մեզ հայտնի է, օդային հաղորդակցության վերականգնման մասին որոշումներն ընդունվում են երկկողմ բանակցությունների արդյունքում և պարտադիր հաշվի առնելով կոնկրետ օտարերկրյա պետություններում Ռոսպոտրեբնադզորի մշակած սանիտարահամաճարակային իրադրության գնահատման օբյեկտիվ չափանիշները։ Ավելի ճշգրիտ տեղեկատվություն, հավանաբար, ավելի ճիշտ կլինի ստանալ Հայաստանի իրավասու գերատեսչություններում, որոնք ամբողջ ծավալով այն ստանում են իրենց ռուս գործընկերներից»,– ասված է դեսպանատան` ռադիոկայանին ուղղված պատասխանի մեջ։

Հիշեցնենք` մարտի 27-ից կորոնավիրուսի համավարակով պայմանավորված` Ռուսաստանը դադարեցրել է ավիահաղորդագրությունը Հայաստանի հետ, բացառություն են միայն բեռնատար և հումանիտար չվերթերը, ինչպես նաև հատուկ չվերթերը, որոնց շնորհիվ ՌԴ և ՀՀ քաղաքացիները կարող են հայրենիք վերադառնալ։

 

1
թեգերը:
չվերթ, դեսպանատուն, Ռուսաստան, Հայաստան