ԵՐԵՎԱՆ, 4 դեկտեմբերի — Sputnik. Հայաստանի քաղաքական դաշտում նոր կուսակցություն կհայտնվի։ Քաղաքագետ Սուրեն Սուրենյանցը Sputnik Արմենիայի մուլտիմեդիոն մամուլի կենտրոնում կայացած մամուլի ասուլիսում տեղեկացրեց, որ վերադառնում է քաղաքականություն։ Նախկինում Սուրենյանցը եղել է Արամ Սարգսյանի «Հանրապետություն» կուսակցության անդամ, ինչպես նաև քաղաքական վերլուծաբան աշխատել մի շարք պարբերականներում։ Այժմ նա որոշել է վերադառնալ քաղաքականություն։
«Երկրում իրավիճակ է ստեղծվել, որը պահանջում է իմ քաղաքական մասնակցությունը տեղի ունեցող գործընթացներին։ Ես որոշել եմ ստեղծել «Դեմոկրատական այլընտրանք» կուսակցությունը։ Շատ առումներով դա պայմանավորված է նրանով, որ Հայաստանում վերականգնվել են քաղաքականություն մտնելու հավասար պայմանները, չեզոքացվել է ընտրակեղծիքների մեխանիզմը», – ասաց նա։
«Դեմոկրատական այլընտրանքը» կլինի լիբերալ–պահպանողական ուղղվածության կուսակցություն, կսատարի շուկայական մեթոդներին, կպայքարի տնտեսության մեջ պետության դերի նվազեցման համար։
Քաղաքական առումով Սուրենյանցն անհրաժեշտ է համարում քաղաքական միջավայրի ստեղծումը, որը կվերացնի ավտորիտարիզմի վերադարձի սպառնալիքները։
Սերժին ասացի` ձեր գյուղի տղան թալանում է գործարանը. Սուքիասյանը հիշել է երիտասարդ տարիները
«Թեև հիմա ընդունված է խոսել հակահեղափոխության կամ ռևանշի թեմայով, բայց կարծում եմ, որ շատ առումներով նման մտավախությունները չափազանցված են։ Անցած տարվա խորհրդարանական ընտրությունների արդյունքում ուղիղ ռևանշը բացառված է։ Ուղիղ ռևանշ ասելով ես նկատի ունեմ ՀՀԿ–ի կամ Ռոբերտ Քոչարյանի գալը իշխանություն։ Բայց եթե հեղափոխության ձեռքբերումները չկապիտալիզացվեն, ապա շատ արագ կգլորվենք դեպի ավտորիտար համակարգ», – կարծում է Սուրենյանցը։
Նոր կուսակցությունը իր քաղաքականությունը չի կառուցի գործող իշխանությունների հետ դիմակայության սկզբունքով` համարելով դա արհեստական օրակարգ։
Այնուամենայնիվ, Սուրենյանցը բազմաթիվ առիթներ է տեսնում իշխանության հասցեին քննադատության համար։ Առաջին հերթին, դա սուպերվարչապետական համակարգից հրաժարվելու, խորհրդարանը որպես գործադիր իշխանության իրական հակակշիռ ուժեղացնելու ցանկության բացակայությունն է։
«Բանն այն է, որ միայն թափանցիկ ընտրությունները բավական չեն ժողովրդավարություն կառուցելու համար։ Ժողովրդավարությունն անհնար է ընդդիմության սահմանափակ դերի պայմաններում, որտեղ հնարավոր չէ վերահսկել իշխանության աշխատանքը», – ասում է Սուրենյանցը։
Նա համոզված է, որ Հայաստանում ժողովրդավարությունն առայժմ կրում է զգացմունքային, իներցիոն բնույթ։
Ծառուկյանի և Սուքիասյանի հարաբերությունները լարվել են. «Հրապարակ»
Սուրենյանցի կուսակցությունը պատրաստ է համագործակցել այլ ուժերի հետ։ Քաղաքական գործիչը մեծ համակրանքով է վերաբերվում ընդդիմադիր խորհրդարանական խմբակցություններին` «Լուսավոր Հայաստանին» և «Բարգավաճ Հայաստանին»։ Սակայն նա նշեց, որ մյուս կուսակցությունների հետ դաշինք կազմելու հարցը դրված չէ օրակարգում։
