ԵՐԵՎԱՆ, 4 նոյեմբերի — Sputnik. Արտակարգ իրավիճակների նախարար Ֆելիքս Ցոլակյանը չի պատրաստվում ԱԱԾ տնօրեն դառնալ։ Այս մասին նա ասաց Ազգային ժողովում, լրագրողների հետ զրույցում ` անդրադառնալով լուրերին, թե գուցե հենց ինքը նշանակվի ԱԱԾ տնօրենի թափուր պաշտոնում։
«Իզուր բաներ են դրանք, չգիտեմ ով է նստում, ձեռքի ափ նայում ու նման բաներ տարածում»,–ասաց նա։
Անդրադառնալով այն լուրերին, որ ինքն է ԱԱԾ նախկին տնօրեն Արթուր Վանեցյանին աշխատանքի ընդունման համար երաշխավորել` Ցոլակյանն արձագանքեց, թե կա նման բան։ Սակայն, ըստ նրա, նա երաշխավորել է, որպեսզի Վանեցյանն համակարգ ընդունվի աշխատանքի, այլ ոչ թե դառնա ԱԱԾ տնօրեն։
Նշենք, որ այս տարի` սեպտեմբերի 18–ին, ԱԱԾ տնօրեն Արթուր Վանեցյանն ազատվեց աշխատանքից։
Լրագրողները հետաքրքրվեցին Ցոլակյանից, թե ինչ ընթացքի մեջ են ԱԻՆ–ում անցկացվող ստուգումները, ինչին ի պատասխան նախարարը հայտնեց, որ դրանց պատասխանը մի քանի օր անց հայտնի կլինի։
«Ես եմ խնդրել վարչապետին, որ մեզ մոտ ստուգումներ իրականացնեն։ Խնդիրն այն է, որ աշխատանքից ազատել էինք փրկարար ծառայության տնօրենին ու դրանից հետո խոսակցությւոններ սկսեցին տարածվել, թե ԱԻՆ–ում խախտումներ կան։ Որևէ ֆինանսական խախտում չի կարող լինել ԱԻՆ–ում, մնացածը` թող ստուգեն ու հայտարարեն»,–ասաց նա։
Նրա խոսքով` լուրերը, որ ԱԻՆ–ում նախարարն իր բարեկամներին է աշխատանքի դասավորել, սուտ են։ Ցոլակյանը վստահեցրեց` ԱԻՆ–ում աշխատող որևէ բարեկամ չունի, բայց ունի ծանոթներ, որոնց աշխատանքի է ընդունել մասնագիտական կարողությունները հաշվի առնելով։
Նախարարն այցելել է Բազումի հրդեհի ժամանակ տուժած հրշեջ-փրկարարին. տեսանյութ
Հիշեցնենք, որ վարչապետ Նիկոլ Փաշինյանի հոկտեմբերի 22-ի որոշմամբ Արտակ Նահապետյանն ազատվել է Փրկարար ծառայության տնօրենի պաշտոնից:
Sputnik Արմենիայի հետ զրույցում Ֆելիքս Ցոլակյանը դեռ հոկտեմբերի 24–ին էր հայտնել, որ խնդրել է վարչապետ Նիկոլ Փաշինյանին, որ նախարարությունում համապատասխան ստուգումներ իրականացվեն։
