ԱԺ «Իմ քայլը» խմբակցություն

Քվեարկեք, հետո ոնց կուզեք` իրար նայեք. «Իմ քայլը» դեմ քվեարկեց անգամ Փաշինյանի նախագծին

319
(Թարմացված է 12:19 22.10.2019)
ԱԺ իշխանական խմբակցությունը թույլ չտվեց, որպեսզի ընդդիմության օրենսդրական նախաձեռնությունները ներառվեն ԱԺ նիստերի օրակարգում։ «Իմ քայլը» դեմ քվեարկեց բոլոր 9 նախագծերին, անգամ վարչապետի, փոխվարչապետի, նախարարների` նախկինում մշակած օրինագծերին։

ԵՐԵՎԱՆ, 22 հոկտեմբերի — Sputnik. ԱԺ հերթական նստաշրջանն այսօր մեկնարկեց լարված մթնոլորտում։ Իշխող «Իմ քայլը» խմբակցությունը մերժեց օրակարգում ներառել ընդդիմադիր «Լուսավոր Հայաստան» ու «Բարգավաճ Հայաստան» խմբակցությունների բոլոր նախագծերը։

Ներկայացնելով «Երևան քաղաքում տեղական ինքնակառավարման մասին» օրենքում առաջարկվող փոփոխությունները`ԱԺ «Լուսավոր Հայաստան» խմբակցության անդամ Անի Սամսոնյանն ասաց, որ այն այնքան երկար ճանապարհ է անցել, որ պետք է ԱԺ ամբիոնից ներկայացներ դեռ ԵԼՔ խմբակցության ղեկավար Նիկոլ Փաշինյանը։

«Բայց, քանի որ նա չհացրեց դա անել, հիմա ներկայացնում եմ ես` «Լուսավոր Հայաստան» խմբակցության անունից»,– ասաց Սամսոնյանը։ Նա հայտնեց, որ առաջարկվող փոփոխությունները միտված են Երևանի ավագանու աշխատանքն ավելի թափանցիկ ու արդյունավետ դարձնելուն։

Բայց անգամ վարչապետի մասին հիշատակումը չխոչընդոտեց ԱԺ «Իմ քայլը» խմբակցության պատգամավորներին` դեմ քվեարկել նախագծին։

Մինչ քվեարկությունը ԱԺ մեծամասնությանը դիմեց նաև «Լուսավոր Հայաստան» խմբակցության նախագահ Էդմոն Մարուքյանը` նշելով, որ նախագիծը մշակվել է այն ժամանակ, երբ Երևանի ավագանու «Ելք» խմբակցությունում հավաքված էին այսօրվա նախարարները, փոխվարչապետը, ԱԺ փոխխոսնակը։

«Այդ նախագիծն այնտեղ է ծնվել, ու ես զարմացած եմ, որ հանձնաժողովում դեմ են քվեարկել։ Կոչ եմ անում կողմ քվեարկել, որովհետև ձեր` դեմ քվեարկելով, ստացվելու է, որ այն, ինչ Տարոն Մարգարյանի ժամանակ սահմանափակվել է, դուք դրա հետ համաձայն եք»,–ասաց Մարուքյանը։

ԱԺ մեծամասնությունը, սակայն, մերժեց ընդդիմության առաջարկը։

Մեկ այլ նախագծով «Լուսավոր Հայաստանն» առաջարկում էր փոփոխություններ կատարել Հարկային օրենսգրքում, մասնավորապես`ավելացնել հիփոթեքային վարկավորման համար վերադարձվող եկամտահարկի շեմը և թույլ տալ, որ դրանից օգտվեն մինչև 55 մլն դրամ արժեքով անշարժ գույք ձեռք բերողները։

Ազգային ժողովը մտադիր է ուսումնասիրել մետաղական հանքավայրերի ֆինանսական հաշվետվությունները

«55 մլն դրամ արժեքով գույք ձեռք բերող քաղաքացու համար մենք սոցիալական խնդիր լուծելու բարոյական իրավունք չունենք, որովհետև ավելի նեղ վիճակում գտնվող մարդիկ կան։ Եթե 115 000 դոլարանոց տուն է գնում մարդը, մի հատ հաշվենք, տեսնենք այդ վարկը սպասարկելու համար մարդը որքան գումար է ծախսելու ու ինչ եկամուտներով, հետո եկեք քննարկենք` այդ մարդը սոցիալական աջակցության կարիք ունի՞, թե՞ ոչ»,– ներկայացնելով ընդդիմության առաջարկի վերաբերյալ «Իմ քայլի» տեսակետը` ասաց Տնտեսական հանձնաժողովի նախագահ Բաբկեն Թունյանը` միաժամանակ նախագծի հեղինակ Մանե Թանդիլյանին խնդրելով իրեն այնպես չնայել, կարծես իրենք չեն ուզում, որ մարդկանց խնդիրները լուծվեն։

«Քվեարկենք, հետո ոնց կուզեք` իրար նայեք, պարոն Թունյան»,– գործընկերոջն ընդհատեց ԱԺ նախագահ Արարատ Միրզոյանը։

Քվեարկության արդյունքը նույնն էր` ընդդիմության առաջարկը մերժվեց։

Նույն կարգով մերժվեցին նաև «Լուսավոր Հայաստանի» հեղինակած «Քրեական դատավարության օրենսգրքում և  «Զինվորական ծառայության և զինծառայողի կարգավիճակի մասին» օրենքում փոփոխություններ կատարելու մասին նախագծերը, ինչպես նաև «Բարգավաճ Հայաստան» խմբակցության «Վարչական իրավախախտումների վերաբերյալ», «Ներդրումային ծրագրերի իրականացման պետական աջակցության մասին», «Կրթության մասին» օրենքում լրացում կատարելու մասին առաջարկները։

319
թեգերը:
Արարատ Միրզոյան, Մանե Թանդիլյան, Նիկոլ Փաշինյան, Բարգավաճ Հայաստան կուսակցություն (ԲՀԿ), «Լուսավոր Հայաստան» կուսակցություն, «Իմ քայլը» դաշինք, ՀՀ Ազգային ժողով
Ըստ թեմայի
«Բարգավաճ Հայաստանն» առաջարկում է բարձրացնել կրթաթոշակները
«Լուսավոր Հայաստանը» հորդորում է վարչապետին վերանայել դատարաններն արգելափակելու կոչը
«Լուսավոր Հայաստանի» համար Քոչարյանի գործն առաջնային նշանակություն չունի