ԵՐԵՎԱՆ, 15 սեպտեմբերի – Sputnik. Առանց իշխանության կողմից դրսևորած քաղաքական կամքի (իհարկե, ոչ բացահայտ) դատարանը չի կարող որոշում կայացնել ՀՀ երկրորդ նախագահ Ռոբերտ Քոչարյանի գործով՝ չնայած իրավական հիմքերի առկայությանը։ Այս մասին Sputnik Արմենիայի հետ զրույցում ասաց քաղտեխնոլոգ Վիգեն Հակոբյանը։
Քաղտեխնոլոգի կարծիքով՝ գործի ընթացքը մեծ մասամբ կախված է այն բանից՝ ինչ որոշում կկայացվի Քոչարյանին անհապաղ կալանքից ազատելու վերաբերյալ՝ պաշտպանության ներկայացրած առաջին միջնորդության վերաբերյալ։
«Չի բացառվում, որ դատարանը կարող է բավարարել միջնորդությունը։ Ես հեռու եմ իրավաբանությունից, բայց հասկանում եմ, որ Սահմանադրական դատարանի որոշման պարզաբանում կարող է տալ միայն ՍԴ-ն, ոչ թե դատախազությունը, փաստաբանները կամ Առաջին ատյանի դատարանը»,-ասաց Հակոբյանը։
Նա տրամաբանական է համարում, որ գործը քննող՝ Ընդհանուր իրավասության դատարանը դիմի ՍԴ ու խնդրի պարզաբանել՝ ինչ են նրանք ասել, նաև խորհուրդ տալ՝ ինչ է դրանից բխում։
Հենց դա պետք է դիլեմայի տրամաբանական լուծում դառնա, հակառակ դեպքում՝ և՛ փաստաբանները, և՛ մեղադրող կողմը՝ իր օգտին է մեկնաբանելու այն։
Միաժամանակ, քաղտեխնոլոգը նշում է, որ գործընթացը վաղուց իրավականից քաղաքականի է վերածել։
«Այն տարբեր քաղաքական օրակարգեր է գեներացնում։ Օրինակ, Սահմանադրական դատարանի շուրջ ստեղծված իրավիճակը, բյուրեղացման որոշ գործընթացներ ընդդիմադիր դաշտում (թույլ նկատելի համախմբում), հայ-ռուսական հարաբերությունները», - ասաց Հակոբյանը։
Ելնելով այդ ամենից՝ Քոչարյանի գործը սահմանափակում է «մանևրելու» հնարավորություններն անձամբ Նիկոլ Փաշինյանի համար՝ ինչպես ներքին, այնպես էլ արտաքին քաղաքականության մեջ։
Այդ պատճառով պաշտպանության միջնորդությունների հետ կապված հնարավոր որոշումները, ակնհայտորեն իրավական բաղադրիչ ունենալով, քաղաքական որոշում (ոչ բացահայտ) են պահանջում»,-նշեց Հակոբյանը։
Ինչ էլ հետո փորձեն ասել, ինչքան էլ չփորձեն պահպանել դեմքը, քաղաքական որոշում է անհրաժեշտ։
Հիշեցնենք, որ հունիսի 25–ին ՀՀ Վերաքննիչ քրեական դատարանի դատավոր Արմեն Դանիելյանը որոշում կայացրեց կրկին կալանավորել Քոչարյանին, իսկ նրա և մյուսների վերաբերյալ գործի վարույթը կասեցնելու՝ Առաջին ատյանի դատարանի դատավոր Դավիթ Գրիգորյանի որոշումը բեկանել և գործն ուղարկել նոր քննության։
Պատճառը Ռոբերտ Քոչարյանի հետ լուսանկարը չէ՞. ինչու է Բաղդասարյանն ազատվել պաշտոնից
Սակայն Առաջին ատյանի դատավորը, որը պետք է քններ Քոչարյանի գործը, Դավիթ Գրիգորյանն է, որի լիազորությունները ժամանակավորապես դադարեցվել են։ Գրիգորյանի դեմ քրգործ էր հարուցվել։ Ավելի ուշ Քոչարյանի գործը մակագրվեց մեկ այլ դատավորի` Աննա Դանիբեկյանին։
