ԵՐԵՎԱՆ, 27 օգոստոսի — Sputnik. Եթե Ադրբեջանն անկեղծորեն շահագրգռված է հակամարտության խաղաղ կարգավորմամբ, ապա պետք է նույնչափ շահագրգիռ լինի Արցախի ժողովրդի ընտրյալ ներկայացուցիչների հետ բանակցելու մեջ։ Այս մասին ՀՀ ԱԳ նախարար Զոհրաբ Մնացականյանը հայտնեց այսօր մեկնարկած ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի ժամանակ։
«Ադրբեջանն իր անփոփոխ հայատյաց քաղաքականությամբ շարունակում է մնալ Արցախի ժողովրդի գոյության սպառնալիքը։ Ռազմաքաղաքական հավասարակշռության պահպանումն է մեր տարածաշրջանային անվտանգության և խաղաղության անհրաժեշտ պայմանը։ Հայաստանը հետևողական ջանքեր է գործադրում այդ ուղղությամբ»,– ասաց նա։
Նրա խոսքով` Ղարաբաղյան խաղաղ գործընթացում կարգավիճակի և անվտանգության խնդիրները մեզ համար առաջնային նշանակություն ունեն։ Մնացականյանը նշեց, որ Հայաստանը չի կարող գնալ կարգավորման որևէ տարբերակի, որը կարող է վտանգել Արցախի ժողովրդի անվտանգությունը և սահմանափակել ինքնորոշման իրավունքը իրականացման շրջանակը։ Ըստ նրա` Արցախի ժողովրդի ինքնորոշման իրավունքը և բոլոր պայմաններում կիրառելի մարդու անօտարելի իրավունքները ենթադրում են նաև ազատ կամարտահայտում, որը ներառում է նաև Արցախում ազատ ընտրությունների իրականացում, և այդ ընտրությունների արդյունքում ձևավորված իշխանության ներկայացուցիչների գործուն ներգրավվումը բանակցային գործընթացում։
«Ադրբեջանի կողմից ռազմաքաղաքական հավասարակշռությունը խախտելու փորձերը, որոնք մինչ օրս արտահայտվել են նաև ուժի կիրառմամբ, տարածաշրջանային անվտանգության և խաղաղության սպառնալիք են»,–ասաց նա։
Ըստ Մնացականյանի` Հայաստանը հանդես է գալիս Ղարաբաղյան հակամարտության խաղաղ կարգավորման դիրքերից, սակայն չի կարող ընդունել Ադրբեջանի կողմից բացահայտ կամ քողարկված ուժի կիրառման սպառնալիքները և հրադադարի ռեժիմը պայմանական դարձնելու որևէ նկրտում։
Նա նշեց նաև, որ լարվածության պայմաններում բանակցություններ վարելու Ադրբեջանի ջանքերը խոչընդոտում են խաղաղությանը նպաստող միջավայրի ձևավորմանը, և չեն նպաստում հիմնախնդրի տևական կարգավորմանը։
«Խաղաղությունն այլընտրանք չունի և ՀՀ–ն ու Արցախն ունեն բավարար ուժ` խաղաղության ապահովման համար։ Մենք բարձր ենք գնահատում ԵԱՀԿ Մինսկի խմբի համանախագահության և համանախագահ երկրների դերակատարումն Արցախյան հիմնահարցի կարգավորման գործում։ ՀՀ–ն հստակ արտահայտել է իր մոտեցումները Ղարաբաղյան խաղաղ կարգավորման առնչությամբ։ Այս տեսակետից կցանկանայի հատուկ ընդգծել ՀՀ վարչապետ Նիկոլ Փաշինյանի` մարտի 12–ին Ստեփանակերտում ՀՀ–ի և Արցախի Անվտանգության խորհրդների նիստին և օգոստոսի 5–ին` Արցախի Վերածննդի հրապարակում անցկացրած հանրահավաքին հնչեցրած դրույթները»,–ասաց նախարարը։
Հայաստանի արտաքին քաղաքականության երեք հիմնարար սկզբունքները. նախարարը բացում է փակագծերը
Մնացականյանն անդրադարձավ նաև Թուրքիայի հետ հարաբերություններին` ասելով, որ Թուրքիայի կողմից Հայաստանի հետ հարաբերությունների հաստատման մերժումը, Հայաստանի տնտեսական շրջափակումը, Հայոց ցեղասպանության շարունակական ժխտումը, իսկ վերջին շրջանում` ցեղասպան գործողությունների արդարացումը, Ադրբեջանին Ղարաբաղյան հակամարտության շրջանակում բացահայտ աջակցությունը, Հայաստանի անվտանգության համար լուրջ սպառնալիք են ստեղծում։
