ԵՐԵՎԱՆ, 25 հունիսի — Sputnik. Հաշվեքննիչ պալատի նախագահ Լևոն Յոլյանը չի պատրաստվում հրաժարականի դիմում ներկայացնել: Այս մասին նա այսօր հայտարարեց խորհրդարանում հրավիրված ասուլիսի ընթացքում` պատասխանելով երեկ ԱԺ-ում իրեն ուղղված «Լուսավոր Հայաստան» խմբակցության պատգամավոր Արման Բաբաջանյանի հրաժարականի պահանջին:
«Ես ասեմ,որ այդպես կառչած չեմ այս գործին, բայց կան որոշակի սկզբունքներ,- ասաց Յոլյանը,- երբ գտնեմ, որ արդեն անելիք չունեմ, հրաժարական կտամ»:
Հիշեցնենք` ընդդիմադիր պատգամավորը Լևոն Յոլյանին անվանել էր հին համակարգից մնացած պաշտոնյա`թվարկելով անցած տարիներին նրա ունեցած մի շարք բիզնեսները:
Յոլյանն այսօր հրավիրած ասուլիսում պարզաբանումներ ներկայացրեց նաև իր անվան հետ կապվող բիզնեսների վերաբերյալ:
Նա հաստատեց. 1996 թ.-ին գնել Ամիրյան 12 հասցեում գտնվող շենքը, որտեղ բացել է «Սամսունգ» խանութը, որի սեփականատերը նրա ստեղծած «Մարկ Ինթերնեյշընըլ» ընկերությունն էր: Այս ընկերությունը խոշոր հարկատուների ցանկում 96-րդն էր:
«Նաիրիտի» վերջը կտա՞ն․ գործարանի եղած–չեղածն աճուրդի է հանվել
Ավելի ուշ բացել է նաև «Մակրո Երևան» ընկերությունը, որը ևս եղել է խոշոր հարկատուների ցուցակում, բայց արդեն 244-րդը:
Ներգրավված է եղել նաև հանքարդյունաբերության ոլորտի բիզնեսում, բայց բացառապես ռեսուրսների գնահատման և ոչ թե շահագործման բնագավառում:
Բայց իր ղեկավարած բոլոր կազմակերպությունները, իր խոսքով, «երկրում եղած մրցակցային պայմաններին չդիմանալով` փակվել են»: Յոլյանը վստահեցրեց, որ այսօր ոչ մի բիզնես չունի:
«Լինելով այդպես հզոր մարդ, ինչպես ներկայցվում է, փաստորեն, բիզնեսներս ստիպված էի հերթով փակել»,- ասաց Յոլյանը:
Ինչ վերաբերում է նշված բիզնեսների համար հիմք դարձած միջոցներին, Յոլյանը նշեց, որ մինչև 1996թ.-ն աշխատել է Մոսկվայում, ապա վերադարձել Հայաստան ու այստեղ նոր գործունեություն սկսել:
Իրեն ուղղված քննադատությունները Յոլյանը որակում է իբրև «որոշ մարդկանց ցավեցնելու հետևանք»: Լրագրողների հարցին, թե ում է ինքը ցավեցրել և ինչպես, Յոլյանը հրաժարվեց հստակեցնել` խորհուրդ տալով ավելի ուշադիր ուսումնասիրել Հաշվեքննիչ պալատի ուսումնասիրությունների արդյունքները:
Ինչ վերաբերում է նախկին իշխանավորների հետ ունեցած հարաբերություններին, Յոլյանը նշեց, որ նախկին վարչապետներ Արմեն Դարբինյանի, Անդրանիկ Մարգարյանի հետ ունեցել է շատ լավ հարաբերություններ: «Ռոբերտ Քոչարյանի հետ չեմ ունեցել, քանի որ առիթ չի եղել, ընդամենը մեկ անգամ նշանակվելու ժամանակ եղել եմ իր մոտ` հարցազրույցի»,- ասաց Յոլյանը` հավելելով, որ ՀՀ երրորդ նախագահ Սերժ Սարգսյանի հետ ևս ունեցել է լավ հարաբերություններ:
Խաղամոլություն, թե սոցիալական լարվածություն. չարիքի դեմ պայքարի ի՞նչն է սխալ Հայաստանում
Բայց իր հաջողությունները նրանց հետ չի կապում, այլ միայն իր ու իր աշխատանքի:
