ԵՐԵՎԱՆ, 11 հունիսի– Sputnik. Հայ-ռուսական հարաբերություններում վերջին տարում, այսինքն` Հայաստանում տեղի ունեցած հայտնի քաղաքական իրադարձություններից հետո, պահպանվել է նույն դինամիկան։ Դրանք կայուն զարգանում են և կրում ռազմավարական դաշնակցության բնույթ։ Այդ մասին այսօր կայացած ասուլիսում հայտարարեց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը։
Նրա խոսքով` կանոնավոր կերպով իրականացվում են շփումներ բարձր մակարդակում։ Վերջին անգամ երկու երկրների առաջնորդները հանդիպել են Սանկտ Պետերբուրգում` միջազգային տնտեսական համաժողովի շրջանակում։
Դիվանագետը ընդգծեց նաև Եվրասիական տնտեսական միությունում իր նախագահությունն արժանի կերպով անցկացնելու Հայաստանի կառավարության ձգտումը։ Նա հավելեց, որ Եվրասիական տնտեսական բարձրագույն խորհրդի նիստին մասնակցելու համար հոկտեմբերին սպասվում է Ռուսաստանի նախագահ Վլադիմիր Պուտինի այցը Երևան։
«Շատ կարևոր է, որ դեկտեմբերյան խորհրդարանական ընտրություններից հետո Հայաստանն առանց հապաղելու սկսել է կապեր հաստատել երկու երկրների օրենսդիր մարմինների միջև», – հավելեց Կոպիրկինը։
Նրա խոսքով` այդ շրջանում ակտիվորեն զարգացել են նաև միջխորհրդարանական կապերը աշխատանքային մակարդակում։
«Սադրիչներին մի լսեք». Զախարովան թարմացրել է Փաշինյանի ելույթին վերաբերող գրառումը
Կոպիրկինը հավաստիացնում է, որ Ռուսաստանը շարունակում է մնալ Հայաստանի առանցքային տնտեսական գործընկերը։ 2018թ.–ին 2 երկրների միջև ապրանքաշրջանառությունն աճել է 11 տոկոսով` հասնելով 2 միլիարդ դոլարի։ Դեկտեմբերի վերջին ռուսական ներդրումների ծավալը կազմել է 2 միլիարդ, իրական հատվածում մաքուր ներդրումների ծավալը` 125 միլիոն դոլար։ Հայաստանի տնտեսության առաջատար ոլորտներում գործում են ռուսական ընկերություններ։ Դեսպանը նշեց, որ այդ ընկերություններից շատերը ընդգրկված են երկրի խոշորագույն հարկ վճարողների ցուցակում։
Ռուսաստանն առաջին տեղն է զբաղեցնում նաև Հայաստան մտնող մասնավոր փոխանցումների ծավալով։ 2018թ.–ի տվյալներով` փոխանցումների հոսքը կազմել է ավելի քան 1 միլիարդ դոլար։
