Նիկոլ Փաշինյան

Մենք ուզում ենք երկրում նոր Սերժ Սարգսյա՞ն. Փաշինյանը` սուպերվարչապետական համակարգի մասին

94
Սուպերվարչապետական համակարգի մասին խոսելիս` ՀՀ վարչապետ Նիկոլ Փաշինյանը հիշեցրեց Սերժ Սարգսյանի պաշտոնավարման ժամանակահատվածը։

ԵՐԵՎԱՆ, 8 Մայիս — Sputnik. Սուպերվարչապետական համակարգ Հայաստանում չկա։ Այսօր հրավիրած հաշվետու ասուլիսում այս մասին հայտարարեց ՀՀ վարչապետ Նիկոլ Փաշինյանը` պատասխանելով սուպերվարչապետական համակարգը վերացնելու իր նախկինում արված հայտարարության մասին լրագրողի հարցին։

«Կարող եք ասել` սուպերվարչապետն ինչու է կարմիր լույսի տակ կանգնում, սուպերվարչապետն ինչու է ասուլիսով հանդես գալիս լրագրողներին։ Ձեզ որևէ մեկը ինստրուկտաժ արե՞լ է, թե ինչ հարցեր պետք է տաք»,– լրագրողի հարցին հարցով արձագանքեց վարչապետը։

Նա նաև շեշտեց, որ սուպերվարչապետական համակարգը միայն օրենքն ու օրենսդրական լծակները չեն։

«Սուպերվարչապետը նա է, ով ասում է` դու շաքարավազ կներկրես, դու չներկրես, բանանի գործը` քեզ, բենզինի գործը` քեզ, սալյարկի գործը` քեզ, ես այստեղ 50 տոկոս եմ փայ, այստեղ 50 տոկոս էն մյուսն է փայ, էստեղ պետք է գյուղապետ ընտրվի այսինչը, այստեղ պիտի չընտրվի այսինչը, էս մեկի նկատմամբ գործը հարուցեք, էս մեկի նկատմամբ կարճեք, դատավորները թող իրենց վճիռները ինձ հետ համաձայնեցնեն, նոր կայացնեն։ Սուպերվարչապետական համակարգը դա է»,– ասաց Փաշինյանը։

Նա նաև շեշտեց, որ Բաղրամյան 26 –ը վերադարձվել է ՀՀ նախագահին, ԱԺ և նախագահական նստավայրի դռները բաց են հանրության առաջ։ Փաշինյանը նշեց, որ սուպերվարչապետական համակարգը քննադատելով` ինքը հենց այդ համակարգն է քննադատել, իսկ այսօր սուպերվարչապետական համակարգ Հայաստանում չկա, նրա խոսքով, վերացված է, կառավարման համակարգն էլ` թափանցիկ։

«Որովհետև ժողովրդավարական երկրում չի կարող լինել սուպերվարչապետ։ Եթե խոսքը մեկ–երկու գերատեսչության կարգավիճակին է վերաբերում, այդտեղ էլ կան փաստարկներ։ ԱԱԾ–ն նախարարություն դարձնելու վերաբերյալ. մենք ուզում ենք երկրում նոր Սերժ Սարգսյա՞ն։ Սերժ Սարգսյանի քաղաքական կարիերան ո՞նց է ձևավորվել։ ԱԱԾ–ի ժամանակներից կամաց– կամաց,– ասաց նա,– ՀՀ–ում ես իշխանություն չունեմ, ՀՀ–ում իշխանությունը պատկանում է ժողովրդին»։

Հիշեցնենք` երեկ ԱԺ–ում կառավարության կառուցվածքի մասին օրենքի նախագծի քննարկմանը ընդդիմությունը հայտարարել էր, որ սուպերվարչապետական համակարգը, հակառակ Փաշինյանի տված խոստման, այդ օրենքով չի վերացվում։

Այսօր ԱԺ–ում օրենքն ընդունվեց միայն «Իմ քայլը» խմբակցության պատգամավորների կողմ քվեարկությամբ։ Ընդդիմությունը դեմ քվեարկեց կառավարության նոր կառուցվածքին։

94
թեգերը:
Սերժ Սարգսյան, Նիկոլ Փաշինյան, Հայաստան
թեմա:
ՀՀ վարչապետ Նիկոլ Փաշինյան (886)
Ըստ թեմայի
Ներդրողները խոստացել են 4000 նոր աշխատատեղ և 255 մլրդ դրամի ներդրում. Փաշինյան
Ո՞ր ոլորտի աշխատակիցների աշխատավարձերն են բարձրացել և ի՞նչ է խոստանում Փաշինյանը
Փաշինյանը թվարկեց քրեական գործերով անցնող պաշտոնյաներին
Եթե թևեր ի հայտ գան, ես դրանք կկտրեմ. ի՞նչ թևեր է պատրաստվում կտրել Փաշինյանը
Մեր դիրքորոշումները հստակ արտահայտել ենք. Փաշինյանը` գազի գնի հնարավոր նվազման մասին