ԵՐԵՎԱՆ, 11 փետրվարի — Sputnik. Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայը Հայաստանի ղեկավարության հետ քննարկել է Սիրիա մարդասիրական առաքելություն ուղարկելու հարցը։ Այս մասին այսօր Երևանում կայացած ասուլիսի ժամանակ ասաց ինքը` Ջեյմս Ապատուրայը` պատասխանելով Sputnik Արմենիայի հարցին։
«ՆԱՏՕ–ն սիրիական առաքելության հարցում պաշտոնական դիրքորոշում, որպես այդպիսին, չունի։ Բայց այսօր այդ հարցը քննարկեցինք ՀՀ արտգործնախարարության և պաշտպանության նախարարության ներկայացուցիչների հետ։ Ես լսեցի նրանց տեսակետները, նաև այն շարժառիթները, որոնք Հայաստանին դրդել են այդ քայլին», – նշեց ՆԱՏՕ–ի ներկայացուցիչը։
Նրա խոսքով` ՆԱՏՕ–ում հստակ հասկանում են այն քաղաքական ու հումանիտար նկատառումները, որոնք դրդում են Հայաստանին օգնության ձեռք մեկնել Սիրիայի հայ համայնքին։
Հիշեցնենք` փետրվարի 8–ին ՀՀ պաշտպանության նախարարությունը հայտնել էր, որ 83 հոգուց բաղկացած մասնագետների խումբը Հայաստանից մեկնել է Սիրիա։
Խմբի կազմում ներգրավված են հումանիտար ականազերծման մասնագետներ, բժշկական անձնակազմ և մասնագետների անվտանգությունն ապահովող բրիգադներ։
