Աննա Նաղդալյան

Նիկոլ Փաշինյանի կառուցողական հայտարարություններն Ադրբեջանն անարձագանք է թողնում. ԱԳՆ

177
Ի պատասխան Հայաստանի հայտարարությունների` Բաքվից սպառնում են, որ կարող են իրենց հասարակությանը պատրաստել ոչ թե խաղաղության, այլ հիմնախնդրի` այլ ձևերով հանգուցալուծման։

ԵՐԵՎԱՆ, 9 մարտի – Sputnik. ՀՀ վարչապետ Նիկոլ Փաշինյանի կառուցողական հայտարարություններն Ադրբեջանի կողմից անարձագանք են մնում։ Այս մասին մեկնաբանություն է տարածել ՀՀ արտաքին գործերի նախարարության (ԱԳՆ) մամուլի խոսնակ Աննա Նաղդալյանը։

«Այն պայմաններում, երբ Հայաստանի վարչապետը Եվրոպական խորհրդարանում հայտարարում է մեր տարածաշրջանում երկխոսության, հանդուրժողականության և փոխզիջման մշակույթի ներդրման անհրաժեշտության մասին, Բաքվից սպառնում են, որ կարող են իրենց հասարակությանը պատրաստել ոչ թե խաղաղության, այլ հիմնախնդրի այլ ձևերով հանգուցալուծման: Նման հռետորաբանությունը, ինչպես նաև առավելապաշտական, ոչ կառուցողական դիրքերից հնչվող հայտարարությունները չեն նպաստում բանակցությունների համար համապատասխան մթնոլորտի ձևավորմանը»,–նշում է Նաղդալյանը։

Նա, անդրադառնալով Ադրբեջանի վարած քաղաքականությանը, նկատում է, որ վերջին շրջանում նկատելիորեն կոշտացել են Ադրբեջանի տարբեր պետական օղակների կողմից ԼՂ հիմնահարցի կարգավորման վերաբերյալ արվող հայտարարությունները: Ըստ ԱԳՆ խոսնակի` Ադրբեջանի հայտարարություններում առավել շեշտադրվում է ուժի կամ ուժի սպառնալիքի կիրառումը, ռազմական ճանապարհով հիմնահարցի լուծումը, առավելապաշտական, ոչ կառուցողական հայտարարությունները, ինչը դատապարտելի է։

«Հենց սա է արտացոլված նաև համանախագահների վերջին հայտարարության մեջ: Բաքվից լսում ենք, որ «ուժի գործոնը մշտապես եղել և մնում է օրակարգում», «ռազմական գործոնը հատուկ տեղ է գրավում հիմնախնդրի լուծման առանցքում», «ուժն է ծնում իրավունք» և այլն: Ավելին, երկրների ղեկավարների միջև հանդիպման մասին հայտարարության ֆոնին Ադրբեջանը ձեռնարկում է հարձակողական բնույթի զորավարժություններ, որոնք չեն ծանուցվել՝ հակառակ միջազգային պարտավորությունների պահանջների»,–նշում է Նաղդալյանը:

Իսկ ահա հայկական կողմը, նրա խոսքով, բազմիցս հայտարարել է, որ չի ընդունում նման մոտեցումները, ինչպես նաև զենքի փողի սպառնալիքի ներքո բանակցությունների պարտադրանքը։

«Մեր այդ հանձնառության վառ ապացույցներից է, որ Հայաստանում տեղի ունեցած թավշյա հեղափոխությունից հետո խաղաղության գործընթացը ոչ թե կասեցվեց, այլ նոր դինամիկա ստացավ: Խաղաղության մթնոլորտի ձևավորումը, ռիսկերի նվազեցման և միջադեպերի կանխարգելման մեխանիզմների և փոխվստահության ամրապնդման միջոցառումների ներդրումը, ինչպես դա ամրագրվել է Դուշանբեի, իսկ մինչ այդ նաև Վիեննայի ու Սանկտ Պետերբուրգի գագաթաժողովների շրջանակներում, շարունակում են մնալ առարկայական»,– նշում է նա։

ԱԳՆ խոսնակն ավելացնում է նաև, որ Հայաստանը մշտապես սատարել է ԵԱՀԿ Մինսկի խմբի համանախագահության հովանու ներքո հիմնախնդրի բացառապես խաղաղ կարգավորմանը` նշելով, որ հայկական կողմի առաջնահերթություններն են Արցախի անվտանգությունն ու կարգավիճակը։

Նշենք, որ Հայաստանի ղեկավարությունը` ի դեմս վարչապետ Նիկոլ Փաշինյանի, պնդում է, որ բանակցությունների սեղանի մոտ պետք է նստի նաև Ղարաբաղը։

177
թեգերը:
Արցախ, Նիկոլ Փաշինյան, Հայաստան
թեմա:
Ղարաբաղյան հակամարտություն (173)
Ըստ թեմայի
Գլխավոր խնդիրը Լեռնային Ղարաբաղի ճակատագիրն է. Կազիմիրով
Նիկոլ Փաշինյանը վերահաստատել է Ղարաբաղյան հակամարտության մեր դիրքորոշումը
Փաշինյանն ու Կասպրչիկը քննարկել են ղարաբաղյան հակամարտության խաղաղ կարգավորման հարցեր
Պետք է լուծել Ղարաբաղի հարցը. Չավուշօդլուն պատասխանել է Փաշինյանին
Բոլտոնը Ալիևի հետ քննարկել է ղարաբաղյան հիմնախնդիրը
Լավրով. Մոսկվան ղարաբաղյան կարգավորման հարցում առաջընթացի հույս ունի