ԵՐԵՎԱՆ, 19 փետրվարի — Sputnik. «Հրապարակ» թերթը գրում է. «Մեր տեղեկություններով, թեժ պայքար է ընթանում ապագայում ստեղծվելիք սփյուռքի գործերի գլխավոր հանձնակատարի պաշտոնի համար։ Առաջամարտիկը սփյուռքի փոխնախարար Բաբկեն Տեր-Գրիգորյանն է»։
Նշենք, որ «Կառավարության կառուցվածքի և գործունեության մասին» նախագծով առաջիկայում սփյուռքի նախարարությունը կվերակազմակերպվի՝ միանալով վարչապետի աշխատակազմին եւ աշխատակազմում ստեղծելով Սփյուռքի գործերի գլխավոր հանձնակատարի գրասենյակ:
«Այն լինելու է պետական հայեցողական պաշտոն, որը զբաղեցնողը ենթակա ու հաշվետու է վարչապետին։ Նա է հանձնակատարին պաշտոնի նշանակելու, ազատելու և այլն։ Սփյուռքի գործերի գլխավոր հանձնակատար կարող է նշանակվել առնվազն 2 օտար լեզվի իմացությամբ, 5 տարվա աշխատանքային ստաժ և բարձրագույն կրթություն ունեցող անձը»,–նշում է թերթը։
Հիշեցնենք` կառավարությունն արդեն հրապարակել է «Կառավարության գործունեության ու կառուցվածքի մասին օրենքի նախագիծը։
Կառավարության նոր կառուցվածքի մասին օրենքը, որով նախատեսվում է գործող 17 նախարարությունները վերամիավորելու արդյունքում ունենալ 12–ը, կառավարության ընդունումից հետո միայն կներկայացվի ԱԺ հաստատմանը։
