Էդմոն Մարուքյան

Իշխանության մեջ կարծիքը փոխե՞լ է. Մարուքյանը հիշեցրել է ընդդիմադիր Փաշինյանի տեսակետը

117
(Թարմացված է 13:56 18.02.2019)
Հայաստանի նոր իշխանությունը կհրաժարվի՞ սուպերվարչապետությունից, թե՞ ոչ։ «Լուսավոր Հայաստանն» անտեսում է սպառնալիքներն ու վարչապետին հիշեցնում անցյալը։

ԵՐԵՎԱՆ, 18 փետրվարի — Sputnik. Մենք չէինք սպասում, որ ընդդիմադիրների ասածը կարող է արժանանալ ձեռք առնելու, մուննաթի, որոշ դեպքերում նաև` սպառնալիքների։

Այս մասին այսօր ԱԺ–ում, լրագրողների հետ հանդիպմանը, մեկնաբանելով անցած շաբաթ խորհրդարանում ընթացող կառավարության ծրագրի քննարկման մթնոլորտը, ասաց «Լուսավոր Հայաստան» խմբակցության ղեկավար Էդմոն Մարուքյանը։

«Ասեմ, որ նիստից հետո կուսակցությունը դարձյալ ատելության խոսքի ու կեղծ լուրերի տարածման, հարձակման տակ է, և դրանում մեծ դերակատարություն ունեն իշխանական լրատվամիջոցները»,– ասաց Մարուքյանը` վստահեցնելով, որ դա չի ազդելու խմբակցության ու կուսակցության բնականոն աշխատանքի վրա։

Մարուքյանը հստակեցրեց, որ սպառնալիք ասելով, նկատի ունի սոցիալական կայքերում արված գրառումները, որով իրենց խորհուրդ են տալիս` ինչ ասել և ինչ չասել։

Մեկնաբանելով «Իմ քայլը» խմբակցության ղեկավարության այն դիտարկումները, թե ընդդիմությանը կառավարության ծրագրի քննարկման ընթացքում ազատ հնարավորություն է տրվել հարցեր տալու` Մարուքյանն ասաց. «Չէ լո՞ւրջ, տենց բան են ասել։ Նոր Հայաստանը նրանով է լա՞վը, որ կարողանում ենք հարցեր տալ։ Ինչի՞ նախկինում մեզ չեն թողել հարցեր տալ։ Եվ վերջում, որ ասում են` ընդդիմությունը կարողացավ ազատ քվեարկել։ Ի՞նչ պիտի անեին, թևերներս կապեին, չթողնեին քվեարկել։ Եթե դա է արձանագրված պրոգրեսը, ես ցավում եմ»։

Անդրադառնալով խորհրդարանական կառավարման համակարգից կիսանախագահականին վերադառնալու ՀԱԿ–ի առաջարկին` Մարուքյանը կարծիք հայտնեց, որ դա հետընթաց կլինի։

«Պառլամենտական կառավարումը չհամտեսած նորից հետ գնանք կիսանախագահականի։ Ես կարծում եմ` դա հետընթաց է։ Մենք պետք է առաջ գնանք։ Այն սուպերվարչապետական համակարգը, որ հիմա դրված է, պետք է փոխենք ու էլ ավելի առաջ գնանք` դեպի լիարժեք խորհրդարանական համակարգ»,– ասաց նա։

«Լուսավոր Հայաստանի» ղեկավարը նաև հիշեցրեց, որ ժամանակին սահմանադրական փոփոխությունները ներկայացնող ՀՀԿ–ն խոստանում էր ոստիկանությունը, քննչական մարմինները, ԱԱԾ–ն ու ՊԵԿ–ը ներառել գործադիրում` որպես նախարարություններ, բայց դա տեղի չունեցավ ու արդյունքում դրանք մնացին վարչապետի իրավասության տակ։ ԱԺ–ն էլ զրկվեց դրանց նկատմամբ վերահսկողությունից։

Մարուքյանը հիշեցրեց, որ այս համոզմունքը ընդդիմություն եղած ժամանակ ունեցել է նաև Նիկոլ Փաշինյանը։ «Դա եղել է ամբողջական ընդդիմության համոզմունքը, այդ թվում և պարոն Փաշինյանի, և մենք միասին ենք սա լոբբինգ արել։ Մենք շարունակում ենք սա լոբբինգ անել։ Եթե իրենք իրենց կարծիքը փոխել են իշխանության ներսում, թող ասեն` ինչու են փոխել»,– ասաց Մարուքյանը։

«Լուսավոր Հայաստանը» համոզված է, որ միայն այս փոփոխությունների արդյունքում Հայաստանը կդառնա լիարժեք խորհրդարանական երկիր ու ժողովրդավարական կղզյակ տարածաշրջանում։

117
թեգերը:
Նիկոլ Փաշինյան, Էդմոն Մարուքյան, ՀՀ Ազգային ժողով
թեմա:
7–րդ գումարման Ազգային ժողով (79)
Ըստ թեմայի
ՀՅԴ–ն կառավարության ծրագրում նկատել է Լևոն Տեր–Պետրոսյանի հայտնի սկզբունքը
ԲՀԿ–ն ուզում է կառավարության ծրագրում նոր գլուխ ավելացնել, ԼՀԿ–ին հետաքրքրում են աղքատները
Ազգային ժողովն ընդունեց կառավարության ծրագիրը