Արմեն Ռուստամյան

Դեժավյու է հիշեցնում. ՀՅԴ–ն համեմատում է Փաշինյանի ու Տեր–Պետրոսյանի իշխանություններին

183
ՀՅԴ–ն Նիկոլ Փաշինյանին ու նրա թիմին զգուշացնում է չկրկնել Լևոն Տեր–Պետրոսյանի իշխանության` 30 տարի առաջվա սխալները։

ԵՐԵՎԱՆ, 29 հունվարի — Sputnik. ՀՅԴ–ն այլևս որևէ կոալիցիայի մեջ չի մտնի, որտեղ առանց նրանց որոշումներ կկայացնեն։ Այս մասին այսօր ՀՅԴ Բյուրոյի նորընտիր ղեկավար կազմի ասուլիսում հայտարարեց Բյուրոյի նախագահ Արմեն Ռուստամյանը` պատասխանելով հարցին, թե ինչ տեղ կունենա ՀՅԴ–ն Հայաստանի նոր քաղաքական դաշտում։

«Մենք այլևս որևէ կոալիցիայի, որևէ համագործակցության մեջ չենք մտնի, որտեղ առանց մեզ կարող են որոշումներ կայացվել։ Մենք տեսել ենք, որ երբ դա չենք պահպանում, մեր առաջ քաշած խնդիրները թերի են լուծվում, կիսատ–պռատ են լուծվում։ Ստանձնում ես պատասխանատվություն, գին ես վճարում քո վարկանիշի հետ կապված, բայց քո ուզած չափով, քո հետապնդած ծրագրերին համապատասխան լուծումների չես հասնում»,– ասա Ռուստամյանը։

Ռուստամյանը հայտարարեց` ՀՅԴ–ն թե՛ ներքին, թե՛ արտաքին քաղաքականության մեջ ընտրել է «Զարգանալ` չզիջելով» կարգախոսը և հավատարիմ է մնալու դրան։ Նա նշեց, որ նոր խորհրդարանում իրենց գաղափարական այս մոտեցումն ամբողջապես կիսող ուժեր չկան, հետևաբար ՀՅԴ–ն համագործակցության եզրեր դեռ չի տեսնում։

«Այս խորհրդարանը պետք է ամեն ինչ անի, որ գրեթե 100 տոկոսանոց վստահությունն արագ վերածվի կոնկրետ գործերի, այլապես այդ հսկայական ակնկալիքները շատ արագ կվերածվեն հիասթափության, ինչը մենք տեսել ենք 90- ականներին։ Սա մեզ դեժավյու է հիշեցնում։ Նույն վիճակն է եղել, եղել է էյֆորիկ վիճակ, պաթոս, համաժողովրդական զարթոնք ու դրա վրա ձևավորված իշխանություն։ Բայց հետո այդ իշխանությունը ժողովրդի ունեցած ակնկալիքները չի բավարարել և դրան հետևել են ձախողումներն ու հիասթափությունը»,– ասաց նա։

ՀՅԴ–ն չի ուզում, որ գործող իշխանությունը ձախողվի։ Ռուստամյանի խոսքով` իրենց ձեռնտու է, որ այսօր այդ զարթոնքի արդյունքը մարդիկ զգան իրենց կենցաղում, կյանքի բոլոր բնագավառներում։

2018թ–ի դեկտեմբերի 9-ին կայացած ԱԺ արտահերթ ընտրություններում ՀՅԴ–ն ստացել էր ընտրողների քվեների 3.88%–ը` չհաղթահարելով նվազագույն 5%-ի արժեքը։

183
թեգերը:
Հայաստան
Ըստ թեմայի
Հանճարեղ և պարզ. Նիկոլ Փաշինյանի երեք քայլը դեպի Կարեն Կարապետյանի «Սինգապուր»
Գերսպասումներ և ոչ միայն. ինչո՞ւ են Փաշինյանի թիմին ավելի շատ քննադատում
Բոզոյան. «Փաշինյանի թիմը միայն ընդհանուր պատկերացումներ ուներ երկրի զարգացման մասին»
Հայաստանին տնտեսական բեկում է պետք. Փաշինյանը հարցազրույց է տվել Euronews–ին