ԵՐԵՎԱՆ, 16 հոկտեմբերի — Sputnik. Հայաստանի վարչապետ Նիկոլ Փաշինյանի ՝ ամեն ինչ ժողովրդին վերագրելը մեղք է։ Այդ մասին խորհրդարանում լրագրողներին ասաց պատգամավոր, ՀՀԿ փոխնախագահ Արմեն Աշոտյանը։
Նրա խոսքով` շատ թե քիչ ադեկվատ կարելի է համարել Փաշինյանի վերջին հայտարարությունն այն մասին, որ ժողովուրդը ճնշում է գործադրել ՀՀԿ որոշ պատգամավորների վրա։
«Ես տեսա, թե ինչ ինտենսիվությամբ իշխանական քարոզչամեքենան փորձում էր հերքել իմ հայտարարությունը առ այն, որ որոշ պատգամավորների վրա եղել են ճնշումներ, բայց վարչապետը, այնուհանդերձ, իր յուրահատուկ փաթեթավորմամբ ընդունեց, որ եղել են ճնշումներ՝ դրանք վերագրելով ժողովրդին: Չի կարելի ամեն ինչ վերագրել ժողովրդին՝ Սահմանադրական բարեփոխումների պահանջ վերագրել ժողովրդին, հետո դեկտեմբերյան արտահերթ ընտրությունների պահանջ վերագրել ժողովրդին, ճնշումները վերագրել ժողովրդին: Ամեն ինչ ժողովրդին վերագրելը մեղք է, այդպիսի քաղաքական ոճը բոլոր դեպքերում շատ մեծ հեռանկարներ չունի», — ասաց Աշոտյանը։
Նրա խոսքով` հասկանալի չէ` իշխանությունը ցանկանում է փոփոխություններ կատարել Ընտրական օրենսգրքում, թե ոչ, և ինչու են դրանք այդքան հապճեպ ընդունվում։
«Երբ ընտրական օրենսգրքում փոփոխություններ էր նախաձեռնել մեր իշխանությունը, ապա մենք մի քանի ամիս քննարկումներ անցկացրինք ընդդիմության և քաղաքացիական հասարակության հետ։ Մամուլն այդ քննարկումները մանրամասն լուսաբանելու հնարավորություն ունեցավ։ Իսկ ընտրությունները տեղի ունեցան միայն 10-11 ամիս անց, որպեսզի կուսակցությունները նախապատրաստվելու հնարավորություն ունենան։ Ինչի՞ն նախապատրաստվելու։ Բացատրեմ։ Ենթադրենք, որ Ընտրական նոր օրենսգրքում, ինչպես պահանջում է ներկա իշխանությունը, չեղյալ է հայտարարվում ռեյտինգային համակարգը։ Այդ դեպքում լիովին փոխվում է թեկնածուներ առաջադրելու ռազմավարությունը։ Կարծում եմ` դա ակնհայտ է։ Նշանակում է, որ այդ փոփոխություններին պետք է պատրաստվել», — նշեց Աշոտյանը։
Հիշեցնենք, որ վարչապետ Նիկոլ Փաշինյանը չի հայտարարել իր հրաժարականի մասին կառավարության այսօրվա արտահերթ նիստում։ Նա ասել է, որ երեկոյան հանդես կգա հայտարարությամբ։
Ավելի վաղ նա հայտարարել էր խորհրդարանական արտահերթ ընտրությունների անհրաժեշտության մասին, որոնց համար էլ պետք էր վարչապետի հրաժարականը։
